وحدت نیوز(اسلام آباد) مجلس وحدت مسلمین پاکستان کے مرکزی ڈپٹی سیکریٹری جنرل سید ناصرعباس شیرازی نے ماہ مبارک رمضان میں اشیائی خوردونوش میں تاجروں کی جانب سے ناجائز منافع خوری کی مذمت کرتے ہوئے کہا ہےکہ اسلامی ریاست میں رمضان المبارک جیسے بابرکت مہینے میں ناجائز منافع خوری قہر الہیٰ کو دعوت دینے کے مترادف ہے،افسوس کا مقام ہے کہ غیر اسلامی ممالک میں تو کافر حکمران ماہ مبارک رمضان کے احترام میں خصوصی رعائتی نرخوں کا اعلان کرتے ہیں لیکن اسلام کے نام پر وجود میں آنے والے ہمارے وطن پاکستان میں پورے سال کا منافع تاجر اور حکمران مل کر صرف ماہ رمضان میں کمانے کی کوشش میں مصروف نظر آتے ہیں ،
انہوں نے کہا کہ موسمی پھل اور دیگر کھانے پینے کی اشیاءاس قدر مہنگی ہیں کہ ایک عام شہری انہیں خریدنے اور اپنے روزے دار بچوں کو کھلانے کی سکت ہی نہیں رکھتا ،ایسی صورت حال میں سوشل میڈیا کے ذریعے گراں فروش تاجروں کے ہوش ٹھکانے لگانے کیلئے پھلوں کے تین روزہ بائیکاٹ کی مہم ایک منفرد اورضروری اقدام ہے ، ناجائز منافع خوری کے خلاف شہری پھلوں کے تین روزہ بائیکاٹ مہم میں بھر پور حصہ لیں ،اس کے بعد روزمرہ استعمال کی دیگر اشیاءکی آسمان سے باتیں کرتی قیمتوں میں کمی اور بجلی کے بلوں میں شامل ناجائز اضافی رقوم کے خلاف بھی اسی جذبے کے ساتھ احتجاج کرنے کی ضرورت ہے ۔
