وحدت نیوز (لاہور) مجلس وحدت مسلمین پاکستان کی جانب سے صوبائی سیکرٹیریٹ پنجاب میں یوم یکجہتی کشمیر کے حوالے سے سیمینار کا انعقاد کیا گیا۔ سیمینار میں مجلس وحدت مسلمین کے مرکزی سیکرٹری سیاسیات اسد عباس نقوی ، ضلعی سیکرٹری جنرل سیدحسن رضا ہمدانی اور دیگررہنماؤں نے شرکت کی۔ سیمینار سے خطاب کرتے ہوئے ایم ڈبلیو ایم کے مرکزی سیکرٹری سیاسیات سید اسدعباس نقوی نے کہا کہ ہم کشمیری بھائیوں کی بھرپور حمایت کا اعادہ کرتے ہیں اور کشمیریوں کی تحریکِ حق خودارادیت کی غیرمتزلزل حمایت جاری رکھیں گے۔

سید اسد عباس نقوی نے کہا کہ مسئلہ کشمیرحل کیے بغیر پائیدارامن کا خواب شرمندہ تعبیر نہیں ہوسکتا، عالمی برادری بھارت کو جنگی جرائم سے روکنے میں کردار ادا کرے ۔ سید حسن رضا ہمدانی نے اپنے خطاب میں کہا کہ پاکستان کشمیری بھائیوں کی اخلاقی، سفارتی اور سیاسی حمایت جاری رکھے گا۔ انہوں نے کہا کہ سلامتی کونسل کی قراردادوں کےمطابق جموں و کشمیر تنازع کا جلد حل یقینی بنایا جائے اورعالمی برادری بھارت پر انسانی حقوق کے منشور کے احترام کے لیے دباؤ ڈالے۔