وحدت نیوز(لاہور) ایران وعراق سے وطن واپس آنے والے زائرین کی مشکلات حوالے سے مجلس وحدت مسلمین کے مرکزی سیکریٹری امورسیاسیات اور فوکل پرسن حکومت پنجاب برائے بین المذاہب ہم آہنگی سید اسدعباس نقوی کاوزیر صحت حکومت پنجاب ڈاکٹر یاسمین راشد سے ٹیلیفونک رابطہ ۔
ڈاکٹر یاسمین راشد نے اسدعباس نقوی سے گفتگو کرتے ہوئے کہاکہ کرونا وائرس کے خدشے کے بعد تفتان بارڈر سے زائرین کا پہلا کانوائے پنجاب پہنچ چکا ہے ۔ انہوں نے کہاکہ بعض خدشات کے پیش نظر زائرین کو ڈیرہ غازی خان میں ٹھرایاگیا ہے ۔
انہوں نے کہاکہ تمام زائرین کے دوبارہ ٹیسٹ کیئے جارہے ہیں رپورٹس آنے کے بعد زائرین کے قیام کی مدت کا فیصلہ کیا جائے گا، اسدعباس نقوی نے ڈاکٹر یاسمین راشد سے کہاکہ زائرین کو تمام تر سہولیات کی فراہمی حکومت کی ذمہ داری ہے ۔ زائرین طویل سفر اور شدید مشکلات کا سامنا کرتے ہوئےیہاں تک پہنچے ہیں ۔
اسد نقوی نے کہاکہ مجلس وحدت مسلمین وفاقی اور تمام صوبائی حکومتوں سے مستقل رابطے میں ہے ، ایم ڈبلیوایم اور زائرین انتظامیہ کے ساتھ مکمل تعاون کررہے ہیں اور امید کرتے ہیں کہ حکومت بھی اس سلسلے میں اپنا بہترین کردار ادا کرتے ہوئے زائرین کو کم سے کم آزمائش میں ڈالے گی۔
ڈاکٹر یاسمین راشد نے اسدعباس نقوی کو یقین دہانی کروائی کہ زائرین کیلئے تمام نتظامات کھانے وغیرہ کے انتہائی مناسب ہیں امید ہے کہ آپ کو کم سےکم شکایت ہو گی اسکے علاوہ ہم نے گلگت بلتستان گورنمنٹ سے بھی گزارش کی ہے کہ وہ جی بی کے زائرین کو ائر لفٹ کرے۔
