وحدت نیوز(اسلام آباد) مرکزی ماتمی دستہ راولپنڈی کے ماتمی عزادار مرزاظہیر حیدر عرف نومی مرزا کے مختصر علالت کے باعث خالق حقیقی سے جا ملے ان کے سانحہ ارتحال پر مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری، ایم ڈبلیوایم ضلع راولپنڈی کے سیکریٹری جنرل علامہ علی اکبر کاظمی و دیگر رہنماؤں نے دلی افسوس اور رنج وغم کا اظہار کیا ہے ۔
مرکزی سیکریٹریٹ سے جاری اپنے مشترکہ تعزیتی پیغام میں قائدین نے کہا کہ مرزاظہیر حیدرعرف نومی مرزامولا حسینؑ کے سچے عاشق تھے، وہ ماتمی حلقے کی جان تصور کیئے جاتے تھے، انہوں نے ساری زندگی مکتب اہل بیتؑ کی خدمت میں صرف کی،مرحوم علماء کی عزت اور احترام کرنے والی شخصیت تھے، ان کی اچانک وفات پر ان کے تمام پسماندگان اور ماتمی ساتھیوں کی خدمت میں ہدیہ تعزیت اور تسلیت عرض کرتے ہیں۔
قائدین وحدت نے مرحوم مرزاظہیر حیدر عرف نومی مرزا کے درجات کی بلندی کی دعا کرتے ہوئے کہا کہ خدا وند متعال مرحوم کو شہدائے کربلا ؑ کے جوار مقدس میں محشور فرمائے ان کے تمام خانوادے اور مرکزی ماتمی دستہ راولپنڈی کے تمام ماتمی ساتھیوں کو صبر جمیل عنایت فرمائے۔
