وحدت نیوز(صحبت پور) بلوچستان میں حالیہ سیلاب اور بارشوں کے باعث جن مساجد کا نقصان ہوا ان نقصانات کا جائزہ لینے کے مختلف علاقوں میں مساجد کا جائزہ لیا گیا۔ اس موقع پر مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی ایم ڈبلیو ایم بلوچستان کے صوبائی صدر علامہ سید ظفر عباس شمسی انجمن حسینیہ خواجگان نارووالی کے برادر امداد حسین انجینئر رانا آصف و ضلعی ذمہ داران ہمراہ تھے ۔
اس موقع پر صحبت پور سٹی بھنڈ مراد علی کھوسہ تاج پور جمالی ڈیرہ مراد جمالی بختیار آباد ڈومکی نوتال و دیگر مقامات پر گفتگو کرتے ہوئے علامہ مقصود علی ڈومکی نے کہا کہ مسجد معاشرے کی اصلاح کا مرکز ہے جہاں معاشرے کی دین و دنیا آباد کرنے کی رہنمائی ہونی چاہیئے۔ دین اسلام جامع نظام حیات ہے جو انسان کی انفرادی معاملات کے ساتھ اجتماعی معاملات میں مکمل رہنمائی کرتا ہے۔ جس سے انسانی معاشرے کی درست سمت میں رہنمائی ہوتی ہے۔ حقیقی اسلام سے دوری کے سبب آج بدقسمتی سے مسجد کا معاشرتی کردار محدود ہوچکا ہے۔ ہمیں چاہئے کہ مساجد کو آباد کرنے کے ساتھ ساتھ مسجد محور معاشرہ تشکیل دیں۔
انہوں نے کہا کہ دین اسلام نے رہبانیت اور ترک دنیا کی تعلیم نہیں دی اسی لئے اکیلے نماز پڑھنے کی بجائے نماز باجماعت اور نماز جمعہ کی تاکید کی۔ پیغمبر اسلام صلی اللہ علیہ وآلہ وسلم نے مدینہ طیبہ میں جو مسجد قائم کی وہ نماز باجماعت جمعہ تلاوت قرآن کریم کے ساتھ ساتھ تعلیم و تربیت کا مرکز تھی جہاں مجلس مشاورت منعقد ہوتی اور معاشرے کی ہر پہلو سے رہنمائی کی جاتی۔انہوں نے کہا کہ مجلس وحدت مسلمین کی جانب سے مسجد محور یونٹ اور ضلع کا پروگرام دیا گیا ہے جس سے کارکنوں کا مسجد سے تعلق مضبوط ہوگا۔
