وحدت نیوز(کوئٹہ)مجلس وحدت مسلمین پاکستان کے مرکزی ترجمان علامہ مقصود علی ڈومکی نے کندہ کوٹ میں قبائلی جھگڑے کے نتیجے میں بارہ 12 بے گناہ انسانوں کی قتل عام پر شدید غم و غصے کا اظہار کرتے ہوئے کہا ہے کہ قبائلی جھگڑے اور کاروکاری ناسور کی صورت اختیار کر چکے ہیں جس کے نتیجے میں بے گناہ انسانوں کا قتل عام ہورہا ہے علمائے کرام دانشور اور معاشرے کے ذمہ دار افراد سیاسی اور مذہبی جماعتیں اس معاشرتی ناسور کے خاتمے کے لیے اپنا کردار ادا کریں۔ انہوں نے کہا کہ حکومت اور انتظامیہ اپنی ذمہ داریاں ادا کرنے میں بری طرح ناکام ہو چکی ہے۔ سندھ کا یہ علاقہ وانا اور وزیرستان کا منظر پیش کر رہا ہے جہاں بے گناہ انسانوں کا قتل عام معمول کا مسئلہ بن چکا ہے ہتھیاروں کی بھرمار اور مجرموں کی سرعام سرگرمیاں قانون نافذ کرنے والے اداروں کی کارکردگی کو بے نقاب کر رہی ہیں۔