وحدت نیوز(لاہور)مجلس وحدت مسلمین پاکستان کے مرکزی ڈپٹی سیکرٹری جنرل علامہ احمد اقبال رضوی کی زیرِ صدارت پنجاب کی صوبائی کابینہ کا اجلاس منعقد ہوا. اجلاس میں مرکزی سیکرٹری سیاسیات سید اسد نقوی, مرکزی ڈپٹی سیکرٹری تنظیم سازی آصف رضا، سیکرٹری جنرل پنجاب علامہ عبدالخالق اسدی، ڈپٹی سیکرٹری جنرل پنجاب علامہ سید حسن رضا ہمدانی ، سینئر ممبر پولیٹیکل کونسل سید حسین زیدی سمیت دیگر صوبائی رہنماؤں نے شرکت کی۔

 اجلاس سے خطاب کرتے ہوئے علامہ سید احمد اقبال رضوی نے کہا کہ اوورسیز پاکستانیوں کو ووٹ کا حق ملنا ایک احسن اقدام ہے تاہم اس بابت الیکشن کمیشن پر سخت ذمہ داری عائد ہوتی ہے کہ انتخابات میں دھاندلی نہ ہو سکے۔ انہوں نے کہا کہ بیرون ممالک میں رہائش پذیر پاکستانی مادر وطن کی فلاح کیلئے ہر ممکن اقدامات میں کوششیں جاری رکھتے ہیں. 70 سالوں بعد اوورسیز پاکستانیوں کو ووٹ کا حق ملنا خوش آئند ہے۔