وحدت نیوز(اسلام آباد) مجلس وحدت مسلمین پاکستان کے بھوک ہڑتالی کیمپ میں علما و مشائخ کانفرنس کا انعقاد ہوا جس میں بریلوی مکتبہ فکر کے علما نے شرکت کی۔جمیعت علماء اسلام نیازی گروپ کے چیئرمین سید معصوم حسین شاہ کی قیادت سربراہی میں پنجاب سے بیس رکنی وفد بھی کانفرنس میں شریک تھا۔

کانفرنس سے خطاب کرتے ہوئے ایم ڈبلیو ایم کے سربراہ علامہ راجہ ناصر عباس جعفری نے کہا کہ وہ ظلم کے خلاف آواز بلند کرنے نکلے ہیں۔ملک میں بڑھتی ہوئی انتہا پسندی اور قتل و غارت نے عوام میں دہشت پھیلا رکھی ہے۔عدم تحفظ کے احساس سے تقویت دے کر لوگوں کو ان کے گھروں تک محصور کرنے کی کوشش کی جارہی ہے۔اپنے آئینی حقوق کے لیے آواز بلند کرنے والوں پر مقدمات قائم کیے جاتے ہیں جبکہ کالعدم جماعتوں کے سربراہان انتظامیہ کی نگرانی میں قومی مفادات کے خلاف ریلیاں نکالنے میں مصروف ہیں۔گزشتہ روز قصور اور اوکاڑہ میں پرامن احتجاج کرنے پر ہمارے لوگوں کے خلاف ایف آئی آر کاٹی گئیں ہیں اور چادر چار دیواری کا تقدس پامال کرتے ہوئے پولیس نے گھروں کے اندر گھس کر غندہ گردی کی۔پاکستان کو اس وقت دہشت گردوں اور دہشت گرد حکومت دونوں سے خطرہ ہے۔میں اس لاقانونیت کے خلاف میدان میں نکلا ہوں۔میری جنگ ان قوتوں کے خلاف ہے جو پاکستان کے استحکام اورامن کے دشمن ہیں۔اس ریاست کا کوئی بھی باوفا بیٹا پاکستان کو برباد ہوتے ہوئے نہیں دیکھ سکتا۔پارہ چنار میں ہماری کوششیں بار آور ثابت ہوئیں ہیں اور وہاں امن کے لیے معاہدہ طے پا گیا ہے۔سیاسی سطح پر ہمارے مطالبات کی منظوری میں پس وپیش سے کام لیا جا رہا ہے۔وزیر داخلہ چوہدری نثار نے عید سے قبل ملاقات میں ہمارے مطالبات کو جائز تسلیم کرتے ہوئے ایک روز میں علمی اقدامات کی یقین دہانی کرائی مگر اب تک کوئی مثبت پیش رفت نہ ہو سکی۔ہمیں آگاہ کیاجائے کہ وہ کون سی طاقتیں ہیں جو حکومتی فیصلوں اور وزراء پر اثر انداز ہیں اورانہیں محب وطن جماعتوں سے دور رکھنا چاہتی ہیں۔میں نے اپنے مطالبات کے لیے اسلام آباد سے لاہور تک پاکستان مارچ کرنے کا فیصلہ کر لیا ہے جس کی تاریخ کا جلد ہی اعلان کیا جائے گا۔

کانفرنس سے خطاب کرتے ہوئے پیر سید عثمان نوری نے کہا کہ اہل سنت کا یہ وفد علامہ ناصر عباس کے ساتھ اظہار یکجہتی کرنے آیا ہے۔جو لوگ ہمیں آپس میں لڑانا چاہتے ہیں وہ ان ناپاک ارادوں میں کبھی کامیاب نہیں ہو سکتے۔علامہ راجہ صدیق بٹ نے کہ ملک میں امن کے قیام کے لیے علامہ ناصر عباس کی کاوشیں لائق تحسین ہیں۔اہل تشیع اپنی لاشیں لے کر سڑکوں پر بیٹھے رہے لیکن حکومت ٹس سے مس نہ ہوئی یہ بدترین اور شرمناک رویہ قابل مذمت ہے۔ ہم اہلسنت کسی بھی مشکل میں اپنے اہل تشیع بھائیوں کو اکیلا نہیں چھوڑیں گے۔کانفرنس سے دیگر علما و مشائخ نے بھی خطاب کیا۔علامہ ناصر عبا س نے شرکا کا شکریہ ادا کیا۔