وحدت نیوز (اسلام آباد) سعودی حکومت اہل تشیع شہریوں کی جان ومال کے تحفظ میں مکمل ناکام نظرآتی ہے، ابھی شیخ باقرالنمرکی شہادت کا زخم تازہ ہی تھا کہ آج اسلام دشمن عناصرنے ایک مرتبہ پھرالاحصاءمیں دوران نماز جمعہ بے گناہ نمازیوں کو خاک وخون میں غلطاں کیا، تواترکے ساتھ الاحصاءاور قطیف میں مساجد وامام بارگاہوں پر حملے سعودی شیعہ اقلیت کے محفوظ ہونے کی دلیل ہیں، ان خیالات کا اظہار مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری نے مرکزی سیکریٹریٹ سے جاری اپنے ایک مذمتی بیان میں کیا۔

ان کاکہناتھا کہ سعودی حکومت کی داعش اور القائدہ سے متعلق دوغلی پالیسی نا فقط مشرق وسطیٰ بلکہ خود سعودی عرب کیلئے بھی کسی وبال جان بنی ہوئی ہے، اسرائیلی وزیر اعظم نیتن یاہوکا تازہ بیان نام نہادسعودی اسلام دوستی اور داعش دشمنی پر طماچہ ہے جس میں اس نے کہا کہ سعودی اور دیگر عرب ممالک ایران کے خوف سے ہمیں اپنا دوست تسلیم کرتے ہیں ، دوسری جانب امریکی وزیر خارجہ جان کیری کا بیان بھی رکارڈ پر ہے جس میں اس نے اقرار کیا ہے کہ امریکہ دنیا بھرکے تکفیری دہشت گردوں کو سعودی سرمائے سے ٹریننگ فراہم کرتا ہے، انہوں نے کہا کہ سعودی حکومت کے منافقانہ طرز سیاست کی بدولت آج پورا عالم اسلام ایک نہ بجھنے والی آگ کی ذد پر آچکا ہے۔