وحدت نیوز (اسلام آباد) مجلس وحدت مسلمین پاکستان کے مرکزی ڈپٹی سیکرٹری جنرل و سیکرٹری امور خارجہ نے اپنے ایک بیان میں کہا کہ ملک بھر و بالخصوص شہر قائد میں غیر اعلانیہ لوڈ شیڈنگ سے عوام الناس مر رہی ہے اور نااہل حکمران اپنے پروٹوکول میں مصروف ہیں۔ سندھ حکومت کی نااہلی پہلے تھر اور اب کراچی میں کھل کے واضح ہوگئی ہے۔ پہلے لوگ بھوک سے مر رہے تھے اور اب بجلی کے تعطل سے مر رہے ہیں۔ پی پی پی کے قائدین کو ریاستی اداروں کے خلاف بیان بازی سے اگر فرصت مل جائے تو ایک نظر سندھ کی غریب عوام پر بھی ڈال لیں۔ روزانہ کی بنیاد پر کراچی میں شرح اموات میں اضافہ ہو رہا ہے اور ان کرپٹ اور نااہل حکمرانوں کو ذرا فکر نہیں ہے۔ مسلسل کئی سالوں سے سندھ میں ایک ہی حکومت چلتی آرہی ہے، اس کے  باوجود اب تک سندھ کے مسائل جوں کے توں ہیں۔ کاش یہ حکمران کوئی عوام دوست پالیسی بنائیں، جس سے صحیح معنوں میں عوام کو ریلیف ملے۔ بدقسمتی سے یہاں پر ہر پالیسی حکمرانوں کے ذاتی مفادات کو مدنظر رکھ کر بنائی جاتی ہے۔

ایم ڈبلیو ایم کے مرکزی رہنما کا مزید کہنا تھا کہ جب بے رحم اور ظالم حکمران عوام پر اپنا تسلط جما لیتے ہیں تو عذاب الہی نازل ہوتا ہے۔ پاکستان بھر کے عوام اور بالخصوص سندھ کے پسے ہوئے محروم اور مظلوم عوام کو اٹھنا ہوگا، اربوں کھربوں کی مالیت کی سمگلنگ، بھتہ خوری و ٹارگٹ کلنگ کرنے والے سرمایہ داروں سے حساب لینا ہوگا، حقیقی عوامی درد رکھنے والے اور وطن دوست لیڈرشپ کا ساتھ دینا ہوگا۔ ہم اس مصیبت اور غم کے موقع پر ہونے والی ناگہانی اموات میں لواحقین کے دکھ میں برابر کے شریک ہیں اور خداوند متعال سے دعائے مغفرت کرتے ہیں۔