وحدت نیوز (اسلام آباد) مجلس وحدت مسلمین کے صوبائی سیکرٹری جنرل پنجاب علامہ سید مبارک علی موسوی کا کہنا تھا کہ شفاف الیکشن کے لیے شکوک وشبہات کا خاتمہ ہونا چاہیے، الیکشن کے حوالے سے ابھی تک گرد وغبار موجود ہے الیکشن کمیشن کو چاہیے کہ وہ شفاف انتخابات کو یقینی بنائے۔انہوں نے کہا کہ کالعدم جماعتوں سے تعلق رکھنے والے دہشت گردوں کوعام انتخابات میں حصہ لینےکی اجازت دے کر الیکشن کمیشن نے نیشنل ایکشن پلان اور پاکستان کے مظلوم شہدا کے ساتھ دھوکہ کیاہے۔الیکشن کمیشن بخوبی جانتی ہے کہ یہ دہشتگرد جماعتیں نام بدل کرقوم کو دھوکہ دے رہی ہیں۔
انہوں نے مطالبہ کیا کہ ان کالعدم جماعتوں کو نا اہل قرار دے کر شہدا کے خون کے ساتھ انصاف کیا جائے۔ علامہ مبارک علی موسوی کا مزید کہنا تھا کہ کرپٹ حکومتوں نے عوام کو عزت کی زندگی سے محروم کیا، کرپٹ عناصر جماعتیں بدل کر دوبارہ قوم پر سوار ہونا چاہتے ہیں، ملک میں جب تک کرپشن کا خاتمہ نہیں ہوگا اس وقت تک ملک ترقی نہیں کرسکتا۔انہوں نے کہا ہے کہ مجلس وحدت مسلمین اب شیعہ قوم کی واحد امید ہے۔
