وحدت نیوز(کوئٹہ) مجلس وحدت مسلمین بلوچستان کے سیکریٹری جنرل علامہ مقصود علی ڈومکی نے کہا ہے کہ قائداعظم محمد علی جناح اور حکیم الامت علامہ ڈاکٹرمحمد اقبال کی قیادت میں برصغیر کے مسلمانوں نے طویل جدوجہد کے بعد ایک آزاد وطن کیا۔ یہ پرامن ملک جمہوری جدوجہد کے ذریعے ایک سیاسی رہنما محمد علی جناح کی قیادت میں حاصل کیا گیا۔ یہ ملک اسلام کے مقدس نام پر شیعہ، سنی مسلمانوں نے اپنی وحدت کے ذریعے حاصل کیا۔ قائد اعظم محمد علی جناح شیعہ مسلمان تھے مگر انہوں نے فرقہ واریت سے بالاتر ہو کر ہمیشہ امت مسلمہ اور برصغیر کے مسلمانوں کی قیادت کی۔ فرقہ پرست تکفیری ٹولے کیلئے قائداعظم، مادر ملت فاطمہ جناح اور علامہ اقبال کے پاکستان میں کوئی جگہ نہیں۔ انہوں نے کہا کہ جشن آزادی کے موقع پر ہمیں وطن عزیز کی تعمیر اور ترقی کا عزم کرنا ہوگا۔ تفرقہ شیطانی عمل ہے، جبکہ اتحاد اور وحدت کی دعوت انبیاء الٰھی (ع) کی دعوت ہے۔ ہم ہر قسم کی تنگ نظری اور تعصبات سے بالاتر ہوکر پاک وطن کو امن و اخوت کا گہوارہ بنائیں گے۔

انہوں نے کہا کہ حکومت پرامن احتجاج کے راستے میں رکاوٹیں ڈالنے سے گریز کرے۔ پی ٹی آئی اور انقلاب مارچ کی رکن جماعتوں کا چار نکات پر اتفاق خوش آئند ہے کہ جدوجہد آئین کے دائرے میں عدم تشدد پر مبنی ہوگی۔ ہم حقیقی جمہوریت کا قیام چاہتے ہیں۔ لہذا مارشل لاء کے نفاذ کو برداشت نہیں کریں گے۔ جعلی مینڈیٹ کے حامل حکمران عوامی سیلاب سے خائف ہیں۔ اگر نواز شریف کے پاس حقیقی مینڈیٹ ہوتا تو وہ مڈٹرم الیکشن سے نہ گھبراتے۔ آئین کی معطل شقوں کو بحال کرتے ہوئے دفعہ 62 اور 63 کی روشنی میں الیکشن کرائے جائیں۔