وحدت نیوز(سکردو)  ایم ڈبلیو ایم ضلع سکردو کے سیکریٹری جنرل مولانا فدا علی ذیشان نے حالیہ برفباری کو کئی ہفتے  گزرجانے کے بعد بھی اطراف کے علاقوں کا سکردو سٹی سے رابطہ بحال نہ ہونے پر حکومتی کارکردگی پر سوال اٹھاتے ہوئے کہا کہ یہ ایک بہت بڑا المیہ ہے۔ بلتستان ڈویژن اور ضلعی افسران کو چاہئے کہ فی الفور عوام کو شہروں تک رسائی کیلئے بیانات سے ہٹ کر اقدامات کرے تاکہ اس کٹھن سردی میں دور دراز علاقوں کے افراد مزید متاثر نہ ہوں۔اخباری بیان میں ان کا کہنا تھا کہ اب بھی بہت سارے علاقے برف میں ڈھکے ہوئے ہیں، انکی سڑکیں بحال نہیں ہوئیں۔ سردیوں کی وجہ سے لوگ بیمار پڑ رہے ہیں ۔ دوائیوں کی بھی ضرورت ہے لیکن کوئی پرسان حال نہیں۔ سیاسی نمائندوں نے سکردو ہسپتال کیلئے فنڈز کی فراہمی کا زبانی اعلان ہی کیا اور اس وقت پورے علاقے کے مریضوں کیلئے کوئی مناسب انتظام نہیں۔ عوام کو چاہئے کہ جن نمائندوں کو ووٹ دیکر چنا ہے اپنے حق کیلئے ان کا گریبان پکڑیں ۔