وحدت نیوز (مظفرآباد) مجلس وحدت مسلمین پاکستان آزاد جموں و کشمیر کے سیکرٹری سیاسیات سید تصور عباس موسوی نے کہا ہے کہ بلدیاتی انتخابات کروانے کے اعلان کا خیر مقدم کرتے ہیں ، عدلیہ کا فیصلہ حق و سچ پر مبنی تھا، حکومت جلد از جلد انعقاد یقینی بنائے، ان خیالات انہوں نے ریاستی دفتر مجلس وحدت مسلمین سے جاری ایک بیان میں کیا انہوں نے کہا کہ وزیر اعظم آزاد کشمیر کی طرف سے اعلان کیا گیا کہ جلد بلدیاتی انتخابات کروائے جائیں گے، ہم اس امید و یقین کا اظہار کرتے ہیں کہ اس اعلان کو عملی جامہ پہنایا جائے گااور انتخابات کے انعقاد میں کوئی تاخیری حربہ استعمال نہیں کیا جائے گا۔ اعلیٰ عدلیہ کا فیصلہ حق و سچ پر مبنی تھا، مجلس وحدت مسلمین خراج تحسین پیش کرتی ہے،انہوں نے کہا کہ مقبوضہ کشمیر میں بھارتی فوج ظلم و ستم کے بازار گرم کر رہی ہے، اس صورتحال میں ہمیں چاہیے کہ ہم آزاد کشمیر کے اس خطے کو مثالی نمونہ بنا کر دنیا کو دکھا دیں، بلدیاتی انتخابات کے بغیر لوگوں کی ترقی ممکن نہیں ، جمہوریت کے ثمرات عوام تک نہیں پہنچ سکتے ، حکومت اعلیٰ سطح تک محدود ہو کر رہ جاتی ہے، حالانکہ ہر آنے والے اعلیٰ سطح کا عہدیدار عوام کا خادم ہوتا ہے، اس لیئے ضروری ہے کہ اعلیٰ سطح کے چکروں سے نکلتے ہوئے اقتدار عوام کے سپرد کرنے کے لیئے اقدامات کیئے جائیں۔