وحدت نیوز(کوئٹہ) مجلس وحدت مسلمین بلوچستان کے صوبائی نائب صدر و امام جمعہ علامہ علی حسنین حسینی نے کہا ہے کہ نوجوانوں کی معیاری تعلیم، بہترین تربیت اور تکنیکی مہارت کی فراہمی کے لئے منصوبہ سازی کر رہے ہیں۔ نوجوان ہمارے مستقبل کا اثاثہ اور قوم کا سرمایہ ہیں۔ جن پر توجہ دینے کی اشد ضرورت ہے۔ ان خیالات کا اظہار انہوں نے ایم ڈبلیو ایم بلوچستان کے مرکزی سیکرٹریٹ میں نوجوانوں کے وفد سے ملاقات کے موقع پر گفتگو کرتے ہوئے کیا۔ انہوں نے کہا کہ مجلس وحدت مسلمین بلوچستان اور ایم ڈبلیو ایم کوئٹہ کی کابینہ نوجوانوں کی تربیت پر خصوصی توجہ دے رہی ہے۔

انکا کہنا تھا کہ اسی سلسلے میں ہفتہ وار اسٹڈی سرکل کا بھی آغاز کیا گیا ہے۔ جس کا مقصد نوجوانوں میں شعور پیدا کرنا اور انہیں جدید دور کی ضروریات سے آراستہ کرنا ہے۔ انہوں نے کہا کہ نوجوان نسل ہماری قوم کا حقیقی سرمایہ ہے۔ ہمارے مستقبل کا دارومدار نوجوانوں پر ہے۔ باہنر، باشعور اور تعلیم یافتہ نوجوان ہماری قوم اور وطن عزیز پاکستان کو مشکلات سے نکالنے میں موثر کردار ادا کر سکتے ہیں۔ نوجوانوں کو چاہئے کہ اپنے وقت کا مثبت استعمال کرتے ہوئے دور حاضر کے لئے تیار ہو۔ علامہ علی حسنین نے اس موقع پر کہا کہ نوجوانوں کو مثبت سرگرمیوں میں مشغول رہنا چاہئے۔ بعض عناصر اپنے مفادات کی خاطر نوجوانوں میں منشیات و دیگر منفی سرگرمیوں کو پروان چھڑانا چاہتے ہیں۔ تاہم ان عناصر کے خلاف ہمارا معاشرہ متحد ہے۔

وحدت نیوز(کوئٹہ) مجلس وحدت مسلمین بلوچستان نے کہا ہے کہ حکومت کی پاکستان تحریک انصاف پر پابندی کے فیصلے کی سخت مخالفت کریں گے۔ جمہوری حکومت میں آمریت کی پالیسیاں اپنانے والے عوام کے نمائندے ہرگز نہیں ہو سکتے۔ کسی بھی سیاسی جماعت پر پابندی احمقانہ فیصلہ ہے، جس کی مذمت کرتے ہیں۔ کوئٹہ سے جاری کردہ بیان میں ایم ڈبلیو ایم بلوچستان نے کہا کہ فارم 47 پر قائم ہونے والی غیر جمہوری حکومت اپنے اوچھے ہتھکنڈوں سے باز نہیں آ رہی ہے۔ پہلے عام انتخابات میں عوام کے حقوق پر ڈاکہ ڈالا گیا اور جعلی نمائندوں کر اسمبلی تک پہنچایا گیا، اور اب دوسری سیاسی جماعتوں کو راستے سے ہٹانے کی تیاریاں کی جا رہی ہیں۔ حکمران جماعت جس سیاسی جماعت کا میدان میں مقابلہ نہیں کر سکتی، اس پر پابندی لگانے کی منصوبہ بندی کر رہی ہے۔ جمہوریت پسند قوتیں حکومت کے اس منصوبے کو ہرگز کامیاب نہیں ہونے دیں گی۔ آمریت کی پیداوار جماعت کسی بھی سیاسی جماعت پر پابندی کے خواب دیکھنا چھوڑ دے۔

بیان میں کہا گیا کہ پی ٹی آئی پر پابندی کی باتیں جمہوری اقدار کی منافی ہیں۔ ایسی سوچ صرف وہ حکمران ہی رکھ سکتے ہیں جنہیں فقط اپنی اقتدار کی فکر ہوتی ہے۔ ملک میں معاشی عدم استحکام کو پروان چھڑانے کے بعد حکمران مزید مشکلات پیدا کرنے کے درپے ہیں۔ ایسے غیر جمہوری سوچ رکھنے والے لوگ پاکستانی عوام کا انتخاب نہیں ہو سکتے ہیں۔ حکمرانوں کو اخلاقی جرات کا مظاہرہ کرتے ہوئے فی الفور اپنی غلطیاں تسلیم کرنی چاہئے۔ بیان میں مزید کہا گیا کہ مجلس وحدت مسلمین مشکل حالات میں بھی پی ٹی آئی کے ساتھ تھی اور آئندہ بھی ان پر کسی بھی قسم کی پابندی برداشت نہیں کریں گے۔ کسی بھی شخص یا سیاسی جماعت کو پاکستان کے مستقبل کے ساتھ کھیلنے نہیں دیں گے۔

وحدت نیوز (سکردو) ایم ڈبلیو ایم گلگت بلتستان کے صدر آغا سید علی رضوی نے اپنے ایک بیان میں کہا ہےکہ زمینوں پر قبضے کیلئے ماحول فراہم کیا جا رہا ہے، ماحول بناکر زمینوں پر قبضے کی منصوبہ بندی ہو رہی ہے مگر ہم حکومت کی نیتوں سے اچھی طرح واقف ہیں، حکومت کی نظریں بلتستان کے خوبصورت مقامات پر لگی ہیں، ہم متنبہ کرنا چاہتے ہیں کہ حکومت باز رہے اور عوام کے صبر کا مذید امتحان نہ لے۔

انہوں نے کہا کہ نت نئے حربے استعمال کر کے ہماری زمینیں ہتھیانے کی کوششیں ہو رہی ہیں، نئی فورس کو یہاں لانے کا مقصد عوام کو طاقت کے بل بوتے پر دبانا ہے مگر ہم کٹیں گے، مریں گے اپنے حقوق پر کسی کو ڈاکہ ڈالنے نہیں دیں گے، چودہ محرم کے بعد عوام کو جمع کریں گے، ان سے مشاورت کر کے زمینوں پر قبضہ کرنے کی منصوبہ بندی کرنے والوں کے خلاف علم بغاوت بلند کریں گے۔ ظالم جابر حکمرانوں کے خلاف صف آرا ہونا ہی درس کربلا ہے، ہم اپنے عوام کے حقوق کا تحفظ ہر صورت میں کریں گے۔

وحدت نیوز(لاہور) مرکزی رہنماء علامہ سید مبارک علی موسوی اور صدر مجلس وحدت مسلمین ضلع لاہور نجم خان نے وحدت ہاؤس پنجاب سیکرٹریٹ میں شیخ عمران علی، آفتاب ہاشمی مولانا شمشں الحسنین اور دیگر رہنماؤں کے ہمراہ پریس کانفرنس سے خطاب کرتے ہوئے کہا ہے کہ عزاداری سید الشہداء ہماری عبادت ہے اس پر کسی قسم کی رکاوٹ اور پابندی قبول نہیں، شیخوپورہ میں جلوس عزاء پر فائرنگ واقعے کیخلاف انتظامیہ نے کوئی کارروائی نہیں کی، حالات کی سنگینی کے پیش نظر شرپسندوں کو لگام دی جائے، مجالس و عزاداروں کی حفاظت حکومت کی زمہ داری ہے، واقعے میں ملوث قاتل دندناتے پھر رہے ہیں، ملت جعفریہ میں اس انتظامی غفلت اور لاپرواہی کیخلاف تشویش پائی جا رہی ہے، ان مٹھی بھر دہشت گردوں کو فی الفور گرفتار کر کے قانون کے کٹہرے میں لا کھڑا کیا جائے۔

انہوں نے کہا کہ شیخوپورہ میں تکفیری عناصر کی جانب سے سپیکر پر مساجد سے شیعہ نسل کشی کے اعلانات کیئے گئے لیکن انتظامیہ نے بے حسی کا مظاہرہ کیا اور کوئی ایکشن نہیں لیا گیا، شیخوپورہ، تلہ کنگ، بصیر پور اوکاڑہ اور لاہور میں 10 محرم الحرام عزاداری پر حکومت و انتظامیہ کی جانب سے قدغن لگائی گئی، ان تمام غیر آئینی وغیر قانونی اقدامات کی شدید مذمت کرتے ہیں، تلہ گنگ میں مجالس برپا کرنے پر ایف آئی آر درج کرنا سراسر خلاف قانون ہے، ان بلاجواز اور غیر قانونی ایف آئی آرز کو فوری طور پر ختم کیا جائے۔ انہوں نے کہا کہ عزاداری سیدالشہداء کو چار دیواری تک محدود کرنے کے مذموم عزائم کامیاب نہیں ہونے دیں گے، یہ ہمارا مذہبی، آئینی و بنیادی حق ہے۔

رہنماوں نے کہا کہ وزیراعلیٰ پنجاب مریم نواز کی جانب سے کچھ شہروں میں سبیلیں لگائی گئیں جس ہم نے مجلس وحدت مسلمین کے پلیٹ فارم سے سراہا بھی لیکن اس کے برعکس مریم نواز حکومت کی جانب سے ہی انتظامیہ نے سالہا سال سے ہونیوالے جلوس عزاء اور مجالس عزاء کو روکا، پنجاب حکومت نے یہ اقدامات کس کے ایماء پر کیئے، اوکاڑہ میں جلوس عزاء پر پولیس نے حملہ کیا اور خواتین عزاداروں پر بہیمانہ تشدد کیا گیا، دو صدیوں سے جاری قدیمی جلوس عزاء کو روکا گیا یہ کہاں کا انصاف ہے، لاہور کینٹ میں پولیس نے علم پاک کے تقدس کو پامال کیا، پولیس اہلکار علم حضرت عباس ع اٹھا کر جبری امام بارگاہ کے اندر لے گئے، علم پاک کو توڑ کر بے حرمتی کی گئی جس سے عزاداروں کے جذبات کو شدید ٹھیس پہنچی ہے۔ حکومت پنجاب فوری طور پر ان تمام مسائل کو حل کرے۔ فوری طور پر ان مسائل کو حل نہ کرنے کی صورت میں احتجاجی لائحہ عمل کا اعلان کیا جائیگا۔