The Latest
وحدت نیوز (کراچی) مجلس وحدت مسلمین پاکستان کے سربراہ علامہ راجہ ناصرعباس جعفری نے گذشتہ روز کراچی میں سر عام شفق موڑ پر نماز جمعہ سے واپسی گھر جاتے ہوئے گھات لگائے ہوئے ملزمان کی جانب سےایک شیعہ باپ بیٹے اور بھتیجے کی ٹارگٹ کلنگ کی پر زور مذمت کرتے ہوئے واقعہ کو ریاستی اداروں کی نا اہلی قرار دیا ہے ۔ وحدت ہاؤس کراچی سے جاری اپنے بیان میں انہوں نے کہا کہ شہر قائد ایک بار پھر کالعدم دہشتگرد جماعتوں کی آماجگاہ بنتا جا رہا ہے جس کی بڑی وجہ حکومت و ریاستی داروں کی جانب سے ابتک کسی کالعدم جماعت کے خلاف آپریشن نہیں ہے شہر میں دوبارہ فرقہ واریت پھیلانے کی سازش کی جا رہی ہے جس کی واضح مثال آج بفرزون جامع مسجد و امام بارگاہ باب نجف سے نماز جمعہ کی ادائیگی کے بعد گھر جاتے ہوئے ایک ہی خاندان کے تین افراد کو دہشتگردی کا نشانہ بنایا گیاواقعے میں ایک ہی گھر کے دو بے گناہ افراد 55سالہ شاہد حسین کاظمی عرف ہاشم اور ان کے بیٹے 28سالہ علی سجاد کاظمی دہشتگردوں کی فائرنگ سے موقع پر ہی شہید ہو گئے جبکہ ان کے عزیز25سالہ شمیم رضوی شدید زخمی ہیں دہشتگری کے اس واقع کی جتنی مذمت کی جائے کم ہیں ۔علامہ راجہ ناصرعباس نے واقعے میں شہید ہونے والے افراد کے اہل خانہ سے اظہار ہمدردی کرتے ہوئے حکومت سے قاتلوں کی جلد از جلد گرفتاری سمیت شہرمیں کالعدم جماعتوں کے خلاف آپریشن کا مطالبہ کیا۔دریں اثناء دہشتگردی کے واقعے میں شہید شاہد حسین کاظمی اور ان کے لخت جگرعلی سجاد کاظمی کی نماز جنازہ بعد نماز عشاء مسجد و امام بارگاہ خیر العمل انچولی میں ادا کی جائے گی جبکہ تدفین وادی حسین کی قبرستان سپر ہائیوے میں جائے گی ۔
وحدت نیوز (کوئٹہ) مجلس وحدت مسلمین کوئٹہ ڈویزن کے میڈیا سیل سے جاری شدہ بیان میں کہا گیا ہے کہ پانامہ لیکس کے انکشافات حقیقات پر مبنی ہیں۔ ہمارے ملک میں کرپشن اور بدعنوانی اس لئے بڑھی کہ کسی نے بھی آئین اور قانون کی پابندی نہیں کی۔ پانامہ لیکس اسکینڈل میں جو بھی ملوث ہیں اُن کو عوام کے سامنے جوابدہ ہونا چاہئے، جب تک ملک میں آئین اور قانون کی پاسداری نہیں کی جاتی اُس وقت کسی کا احتساب کرنا مشکل ہے، ملک اس لئے بحرانوں سے دوچار ہے۔ یہاں جب تک کوئی بھی کرپشن یابدعنوانی میں ملوث ہوتاہے تو وہ اپنی سرمایہ کاری کسی اور ملک منتقل کرکے پھر اُس کو صاف و شفاف قرار دیئے ہیں، وزیر اعظم ایک با اختیار کمیشن بنائیں۔ میاں نواز شریف اپنے بچوں کے ساتھ کمیشن میں پیش ہوں۔ پانامہ لیکس پر جیو ڈیشل کمیشن بنانے کی ضرورت نہیں ہے۔ انکشافات کی تحقیقات الیکشن کمیشن، ایف آئی اے، نیب اور ایف بی آر کو کرنی چاہئے۔ چیف جسٹس آف پاکستان اس معاملہ پر از خود نوٹس لیں۔ ہمارے حکمران، سیاستدان اور اشرافیہ احتساب سے ماورا ہیں، ان کا جوڈیشل کمیشن سے کچھ نہیں بگڑے گا۔ ہمارے ملک کو دہشت گردی اور بہت سے دیگر مسائل کا سامنا ہے، لیکن ہمارے حکمران اور اشرافیہ فرضی کمپنیوں کے ذریعے سمندر پار دولت کےَ انبار رکھتی ہے۔ یہ تمام افراد پاکستان کے با اثر خاندان ہیں، یہ خاندان پاکستان کے مختلف جماعتوں سے تعلق رکھتے ہیں۔ اوریہ وہ کمزوری ہے، جس کی وجہ سے پاکستان میں کرپشن اور منی لانڈرنگ کے کسی مقدمے کا فیصلہ نہیں ہوتا، کیونکہ ملک کی ہر حکومت اور اپوزیشن کے ڈانڈے پانامہ کی اس فرم سے جاکر ملتے ہیں۔ ملک میں مقدمہ بنانے، تحقیقات کرنے اور فیصلہ کرنے والے بھی اس فرم کے کلائنٹ ہیں۔ یہ تمام لوگ ایک خاص مقام پر ایک ہو جاتے ہیں، یہ ایک دوسرے کے مفادات کا خیال رکھتے ہیں۔ یہ بہت سنگین معاملہ ہے اس میں ملک کے وزیر اعظم کا نام اتنے بڑے اسکینڈل میں آیا ہے، لہذا اس معاملے کو صاف کرنے، شفاف بنانے اور پوری قوم کا اعتماد بحال کرنے کے لئے سخت تحقیقات اور احتساب کی ضرورت ہے۔
وحدت نیوز(کوئٹہ) مجلس وحدت مسلمین بلوچستان کے سیکریٹری جنرل علامہ مقصود علی ڈومکی نے کہا ہے کہ بھٹو کے دیس کے غریب عوام، آج بھی روٹی،کپڑا،اور مکان کے لیے پریشان ہیں،نصف صدی گذر جانے کے باوجود عوام کی حالت بہتر کی بجائے بد ترہوئی ہے۔ عوام یہ سوچنے پر مجبور ہے کہ غریب قوم کے حکمران آخر دیکھتے ہی دیکھتے کھرب پتی کیسے بن گئے،جبکہ ملک کے غریب شہری آج بھی غربت اور کسمپرسی کی زندگی گذار رہے ہیں ۔انہوں نے کہا کہ تمام اراکین اسمبلی اور سول اور فوجی حکمرانوں کو اپنے اثاثے قوم کے سامنے لاتے ہوئے احتساب کے لیے تیار ہونا چاہیے۔
انہو ں نے الیکشن کمیشن کی طرف سے منتخب ممبران کے اثاثوں کی تفصیل ویب سائیٹ پہ شایع نہ کرنے کے فیصلے کو افسوس ناک قرار دیا۔انہوں نے کہا کہ نیب ملک میں احتساب کا شفاف نظام دینے میں ناکام ہوچکا ہے ،اس وقت ملک کو ایسے طاقتور اور شفاف ادارے کی ضرورت ہے جو تمام مصلحتوں سے بالا تر ہوکر ملک کو کرپشن کی لعنت سے نجات دے سکے ۔
وحدت نیوز (مظفرآباد) مجلس وحدت مسلمین آزاد کشمیر نے انتخابات 2016کے لیے مشاورت کا سلسلہ شروع کر دیا ، اس سلسلے میں شعبہ سیاسیات ایم ڈبلیو ایم آزاد کشمیر کے زیرا ہتمام ضلع مظفرآباد کے تمام حلقہ جات کے عمائدین کا مشاورتی اجلاس سنگم ہوٹل مظفرآباد میں منعقد ہوا ، اجلاس کی صدارت مرکزی سیکرٹری سیاسیات مجلس وحدت مسلمین پاکستان سید ناصر عباس شیرازی ایڈووکیٹ نے کی، اجلاس میں ریاستی سیکرٹری جنرل ایم ڈبلیو ایم آزاد کشمیر علامہ سید تصور حسین نقوی الجوای، ریاستی سیکرٹری سیاسیات سید محسن رضا سبزواری ایڈووکیٹ ، ممبران پولیٹیکل کونسل ایم ڈبلیوایم آزاد کشمیر کے علاوہ ضلع مظفرآباد کے تمام حلقہ جات سے عمائدین نے کثیر تعداد میں شرکت کی۔
مشاورتی اجلاس سے خطاب کرتے ہوئے مرکزی سیکرٹری سیاسیات سید ناصر عباس شیرازی ایڈووکیٹ نے کہا کہ آزاد کشمیر کے پرامن خطے میں باشعود عوام رہتے ہیں ، ووٹ ایک امانت ہے جو امانتدار کے سپرد کرنی ہے، مجلس وحدت مسلمین ایک سیاسی جماعت ہے ، پاکستان اور گلگت بلتستان الیکشن کے بعد آزاد کشمیر میں بھی اپنا بھرپور کردار ادا کرے گی، مجلس وحدت خطے میں امن ،بھائی چارے اور اخوت کی فضا کو برقرار رکھتے ہوئے محروموں اور مظلوموں کی آواز بلند کرے گی، اقتدار نہیں خدمت خلق مشن ہے ، بلاتفریق مذہب،مسلک، رنگ ، نسل و برادری خدمت کا جذبہ رکھتے ہیں ۔ملک کو بنانے والے ملک کو بچانے کے لیے بھی ایک ساتھ ہو کر چلیں گے، آزاد کشمیر کے تمام مسائل سے باخبر ہیں ، خطے کی محرومیوں کو دیکھتے ہوئے عوام کی آواز بننے کا فیصلہ کیا، نیلم سے بھمبر تک اپنے فعال کردار کے ذریعے مجلس وحدت مسلمین متوسط طبقے کی نمائندہ جماعت ثابت ہو گی ، گراس روٹ لیول سے منظم انداز کے ساتھ آگے بڑھیں گے ، ہماری قیادت کا فیصلہ نہیں بلکہ کارکنان کا فیصلہ ہوتا ہے، مشاورتی عمل کے ذریعے خطے کی عوام سے لائحہ عمل لیں گے ، باشعور و بافہم عوام ساتھ دیں ، ان کے معیار پر پورا اتریں گے ۔
ریاستی سیکرٹری جنرل علامہ سید تصور حسین نقوی الجوادی نے کہا کہ مجلس وحدت مسلمین اپنے مشن و مقصد کو کر آگے بڑھ رہی ہے ، بہت جلد عوام کے درمیان ہو گی ، اب یہاں وہ ہو گا جو عوام چاہے گی ، اب عوامی آواز بن کر گلی گلی کوچے کوچے جائیں گے ، الیکشن کا شفاف انعقاد چاہتے ہیں کسی صورت بھی کہیں سے کوئی مداخلت قبول نہیں کریں گے، وہ سیاست کہ جو خیانت سے پاک ہو ، وہ سیاست جو دھونس دھاندلی سے پاک ہو ، وہ سیاست جو کرپشن سے پاک ہو ، وہ سیاست جو ظلم سے پاک ہو ، وہ سیاست کریں گے جو عبادت ہو،وہ سیاست کہ جس میں مظلوموں کی بات ہو ، وہ سیاست جس میں محروموں کی بات ہو ،وہ سیاست جس میں خطے کی تعمیر و ترقی کی بات ہو ، حق دار کو اس کا حق ملے ، پرامن و جمہوری لوگ ہیں عملاً جمہوریت نافذ ہو اس کے لیے جدوجہد کریں گے۔
ریاستی سیکرٹری سیاسیات سید محسن رضا سبزواری ایڈووکیٹ نے کہا کہ مجلس وحدت مسلمین مشاورتی عمل مکمل ہو جانے کے بعد لائحہ عمل کا اعلان کرے گی ، سیاسی جماعت ہیں ، سیاسی رول ادا کریں گے ، صاف و شفاف انتخابات چاہتے ہیں ، اتحاد و وحدت کی فضا کو فروغ دینا چاہتے ہیں ۔ریاستی سیکرٹری سیاسیات سید محسن رضا سبزواری ایڈووکیٹ نے تمام عمائدین اور مہمانان گرامی کا شکریہ ادا کرتے ہوئے کہا کہ ہم آپ کے مشکور ہیں کہ آپ قومی درد لیکر ہمارے پاس تشریف لائے ، انشاء اللہ ہم آپ کو مایوس نہیں کریں ، عوامی امنگوں کے ترجمان ثابت ہوں گے ، اجلاس سے سید ممتاز نقوی ایڈووکیٹ، سید تبریز علی کاظمی، مولانا سید طالب حسین ہمدانی ، سید یاسر نقوی ، سید قلندر نقوی ، سید بشیر نقوی ،مولانا معصوم سبزواری و دیگر نے بھی خطاب کیا۔
وحدت نیوز (لاہور) دہشت گردوں کیخلاف بے رحمانہ آپریشن کے بغیر پنجاب میں امن کا خواب دیکھنے والے احمقوں کی جنت میں رہتے ہیں،کالعدم جماعتوں کیخلاف بھر پور کاروائی کے بغیر دہشت گردی سے نجات ممکن نہیں،دہشت گردوں کے سہولت کار اور سیاسی سرپرستوں کو بے نقاب کرنا ہوگا،ان خیالات کا اظہار مجلس وحدت مسلمین پنجاب کے سیکرٹری جنرل علامہ عبدالخالق اسدی نے صوبائی سیکرٹریٹ میں کارکنوں کے اجلاس سے خطاب میں کیا انہوں نے کہا کہ پنجاب میں دہشت گردوں کیخلاف آپریشن ہمارا دیرینہ مطالبہ تھا لیکن حکمرانوں کو خواب غفلت سے بیداری کے لئے سینکڑوں بیگناہوں کی لاشوں کا انتظار تھا،گلشن اقبال میں بربریت کی تاریخ رقم کرنے والے دہشت گرد اور ان کے ہمدردوں کا اسلام اور انسانیت سے کوئی تعلق نہیں،یہ لوگ ملک دشمنوں اور اسلام دشمنوں کے آلہ کار ہیں جو اپنے سوا سب کو کافر اور مرتد سمجھتے ہیں،ہمیں اس سوچ کے خلاف ایک قوم و ملت بن کر سامنے آنا ہوگا،پاکستان میں مسلمانوں کے جتنے حقوق ہیں اتنے حقوق ہمارے دیگر مذاہب سکھ،ہندو،عیسائی بھائیوں کا بھی ہے،وہ ہمارے برابر کے شہری اور اس مادر وطن کے بیٹے ہیں،انہوں نے کہا کہ مجلس وحدت مسلمین گلشن اقبال پارک کے متاثرین اور غمزدہ فیمیلز کے ساتھ ہیں اور ہم اس دہشت گردی کے ناسور سے نجات کے لئے ہر وقت آواز بلند کرتے رہیں گے خواہ اس کے لئے ہمیں جان کی بھی قربانی دینی پڑے پیچھے نہیں ہٹیں گے۔
وحدت نیوز (ملتان) مجلس وحدت مسلمین پنجاب کے ڈپٹی سیکرٹری جنرل علامہ سید اقتدار حسین نقوی، ضلعی سیکرٹری جنرل علامہ قاضی نادر حسین علوی، محمد عباس صدیقی اور ثقلین نقوی نے اپنے مشترکہ بیان میں کہا ہے کہ پانامہ لیکس نے کرپٹ حکمرانوں کے چہروں سے نقاب الٹ کر انہیں بےنقاب کر دیا ہے۔ وزیراعظم کو فوری مستعفی ہو کر اپنے آپ کو تحقیقات کیلئے پیش کر دینا چاہیئے۔ پانامہ لیکس کی رپورٹ منظر عام پر آنے اور اس میں حکمران خاندان کی آف شور کمپنیوں کی تفصیلات شائع ہونے کے بعد اپنے مشترکہ بیان میں ردعمل کا اظہار کرتے ہوئے انہوں نے کہا کہ حکمرانوں کی عجب کرپشن کی غضب کہانی منظر عام پر آنے سے پوری دنیا میں پاکستان کی بدنامی اور جگ ہنسائی ہوئی ہے۔ اب پانامہ لیکس کی رپورٹ جاری ہونے کے بعد حکمرانوں کے اپنے عہدوں پر فائز رہنے کا جواز ختم ہوچکا ہے۔ قوم جاننا چاہتی ہے کہ جب اس رپورٹ کے شائع ہونے کے بعد بھارت سمیت دنیا کے بیشتر ممالک میں حکمرانوں کے خلاف تحقیقات شروع ہوچکی ہیں تو پھر پاکستان میں ایسا کیوں نہیں ہو رہا۔ یہ پاکستان کے مقتدر اداروں پر بھی سوالیہ نشان ہے۔ اس رپورٹ سے ثابت ہوگیا ہے کہ موجودہ حکمران خاندان ہی پاکستان میں معاشی دہشت گردی کا بانی اور سرپرست ہے۔
وحدت نیوز(اسلام آباد)مجلس وحدت مسلمین پاکستان کے دوسرے تنظیمی دور کے اختتام پر کارکنان اور ملت جعفریہ کے نام پیغام میں مرکزی سیکریٹری جنرل علامہ ناصرعباس جعفری نے کہا ہے کہ الحمد اللہ ایم ڈبلیوایم دستوری طورپر اپنا دوسرا تنظیمی دور کامیابی کے ساتھ مکمل کرچکی ہے، پروردگارکے لطف اور امام زمان عج کی خصوصی نگاہ کرم سے آج مجلس وحدت مسلمین ملت تشیع پاکستان سمیت دنیا بھر کے مظلوموں اور محروموں کی مضبوط سیاسی ، فکری اور اجتماعی آوازبن چکی ہے،ایم ڈبلیوایم اللہ کی زمین پر عدل الہیٰ کے قیام اور مظلوموں اور محروموں کے حقوق کی جدوجہد جارہ رکھے گی اور عالمی استکباری قوتوں امریکہ، اسرائیل اور بھارت کے مقابل صف آراءرہے گی، ہم کسی کو اجازت نہیں دیں گےکہ وہ وطن عزیز میں مظلوموں کے حقوق کو تلف کرےاور پاکستان کو سامراجی طاقتوں کی غلامی میں دھکیل دے، مجلس وحدت مسلمین پاکستان کی نظریاتی وجغرافیائی سرحدوں کی محافظ ہےاور اس نے اپنی چھ سالہ تنظیمی جدوجہد میں ثابت کیا کہ وہ پاکستان کے مظلوموں اور محروموں کی متفقہ آواز ہے، جو اپنے قیام سے لیکر آج تک وطن عزیز کی سلامتی اور خودمختاری کے ساتھ ساتھ شیعہ سنی اتحاد کیلئے اپنی بھرپور توانائیاں بروئے کارلائی۔
انہوں نے کہاکہ قومی و بین الاقوامی سطح پر ایم ڈبلیوایم نے ملت میں موجود مایوسی ، خوف اور ناامیدی کے خاتمے کا جو عہد کیا تھا اس میں خدا نے سرخرو کیا ہے، شہید قائد علامہ عارف حسین الحسینی ؒ کے فکر وفلسفے کی روشنی میں ہم نے جس سفر کا آغاز کیا وہ تیزی سے اپنی منزل کی جانب سے گامزن ہے ، پاکستان میں مکتب اہل بیت ؑ کے تحفظ اور عزاداری سید الشہداءؑ کی بقاءکے لئے ہم ہر محاذ پر ہمیشہ صف اول میں موجود رہے ،سانحہ عاشورہ راولپنڈی میں مکتب اہل بیت کا دفاع ہو یا وارثان شہدائے شکار پو راور جیکب آباد کے حقوق کاحصول مجلس وحدت مسلمین ہر لمحہ میدان عمل میں نبردآزمارہی ہے، سانحہ راولپنڈی کے نتیجے میں عزاداری مظلوم کربلا ؑ کے مقابل آنے والے تمام تکفیری سیاسی ومذہبی عناصر کا میڈیا اور سیاسی میدان میں ڈٹ کر مقابلہ کیااور جلوس عزاءکے روٹ کی تبدیلی پر حکومتی دبائوکے مقابل آہنی دیوار ثابت ہوئے، سانحہ راولپنڈی میں گرفتار بے گناہ عزاداروں کی رہائی کے لئے شب وروز کوشاں رہے ، جس واقعے میں ریاست خود مکتب تشیع کے مقابل مدعی ہو اس میں ہم نے کروڑوں روپے دیکر اسیران کو رہا کروایا، سانحہ کوئٹہ،کوہستان، بابوسراور چلاس سمیت ملک بھر میں ہو نے والی تشیع کی نسل کشی پر ہم نے آبرومندانہ احتجاجی اقدامات اٹھائے جس کی بدولت سنگین حالات میں قوم کو آزمائشوں سے نکالا۔
انہوں نے مزید کہا کہ مجلس وحدت مسلمین سیاسی میدان میں کسی صورت غیر حاضر نہیں رہی قومی انتخابات ہوں، بلدیاتی انتخابات یا گلگت بلتستان اسمبلی کے الیکشن مجلس وحدت مسلمین نے ہر میدان میں اپنا قومی نقش ورول اپنے شہید قائد کی امنگوں کے مطابق پیش کیا،الحمد اللہ آج مکتب کے غیور فرزند بلوچستان اور گلگت بلتستان کے ایوان میں مظلوموں اور محروموں کے حقوق کا تحفظ کرنے کیلئے موجود ہیں ، مجلس وحدت مسلمین نے اپنی تاسیس کے وقت اعلان کیا تھا کہ ہم ملت کی خدمت کے لئے ادارہ سازی پر توجہ دیں گے الحمد اللہ آج مجلس فلاحی میدان میں خیرالعمل فائونڈیشن کے نام کے ایک مستقل ادارہ قائم کرچکی ہے جس کے تحت ملک کےطول وعرض میں درجنوں مساجد، امام بارگاہیں ، اسکول، ڈسپنسریز، فراہمی آب کے منصوبہ جات اور ہائوسنگ پروجیکٹس پایہ تکمیل کو پہنچ چکے ہیں ، ملک بھرمیں تبلیغی اور تربیتی نیٹ ورک کی تشکیل جاری ہے، ذرائع ابلاغ کے میدان میں آج قومی سطح پر ایم ڈبلیوایم اپنا ایک موثر مقام رکھتی ہےجو کہ ملت جعفریہ کے موقف کی ترویج واشاعت اور حقوق کے تحفظ میں شب وروزکوشاں ہے۔
انہوں نے مجلس وحدت مسلمین کے کارکنان کو مخاطب کرتےہوئے کہا کہ الہیٰ جماعت میں کام کرنے کیلئے افراد کو معنوی طور پر مضبوط ہو نا ضروری ہے، کارکنان اپنی انفرادی عبادات اور ریاضت پر خصوصی توجہ دیں ، قرآن فہمی اور مناجات سے زیادہ سے زیادہ استفادہ کریں، خدا کا وعدہ ہے کہ اس نے ظالموں کے مقابل مظلوموں اور مستضعفین کو اس زمین کا وارث قرار دینا ہے پس ہمیں اپنے آپ کو خد اکے زمین کی وراثت کا سنگین بوجھ اٹھانے کے قابل بننا ہے۔
وحدت نیوز (جعفرآباد) مجلس وحدت مسلمین ضلع جعفرآباد اورمدرسہ خاتم النبیین ﷺکے زیر اہتمام ایک روزہ دین شناسی ورکشاپ منعقد ہوئی ۔ورکشاپ کے شرکاء سے برادر حسن رضا غدیری نے احکام کے موضوع پرجبکہ آغا سیف علی حیدری نے عقائد کے موضوع پر درس دیا ۔اس موقع پر مجلس وحدت مسلمین پاکستان کے مرکزی رہنماء علامہ مقصود علی ڈومکی نے حالات حاظرہ کے عنوان سے خطاب کیا ۔
در ایں اثناء علامہ مقصود علی ڈومکی نے کہا ہے کہ دھشت گردوں کے گرد گھیرا تنگ کرنے کی بجائے زائرین مشہد مقدس و کربلا معلیٰ کو بلا جواز تنگ کیا جارہا ہے۔ دھشت گردی کا خاتمہ کرکے زائرین کی رفت و آمد کو محفوظ بنایا جاسکتا ہے۔ زائرین کے قافلے میں خواتین اور معصوم بچے بھی شامل ہوتے ہیں، مگر انہیں جگہ جگہ پر مشکلات کا سامنا ہوتا ہے۔ طویل عرصہ گزر جانے کے با وجود زائرین آج بھی شدید مشکلات کا شکار ہیں ،قلعہ نما، جیل خانہ میں کئی روز تک تفتان بارڈر پر زائرین کو روکا جاتا ہے ، اگر یہاں زائرین کو روکنا ہی ہے تو حکومت زائرین کی سہولت کا انتظام کرے۔ مختلف لوگ زائرین کوگاڑی کرایوں سمیت مختلف بہانوں سے لوٹتے ہیں۔
انہوں نے کہا کہ مقامات مقدسات کے زائرین پر بلا جواز الزامات لگانے والے خدا کا خوف کریں ۔مذہبی تعصب کی عینک اتار کر زائرین کے مقدس سفر کی اہمیت کو سمجھیں۔ انہوں نے کہا کہ وفاقی حکومت کے مسلسل اعلانات کے باوجود زائرین کے مسائل حل نہیں ہوئے۔فیری سروس کے وعدے پر بھی تا حال عمل در آمد نہیں ہوسکاْ۔
انہوں نے شامی افواج کے ہاتھوں تدمر شہر کی آزادی کو اہم پیش رفت قرار دیتے ہوئے کہا کہ تکفیری لشکر اپنی تمام تر ظلم و بربریت کے باوجود شکست و ریخت سے دوچار ہے، جبکہ اس وقت عالمی سطح پر سامراج اور اینٹی سامراج دو الائنس بر سر پیکار ہیں۔ سامراجی ایما پر دنیا کے اسی ممالک سے جمع کیا گیا تکفیری لشکر رو بہ زوال ہے۔
وحدت نیوز (دمشق) جشن میلاد حضرت فاطمہ الزہرا کی مناسبت سے حوزہ امام محمد باقردمشق (شام) میں فارغ التحصیل طلباء میں اسناد کی تقسیم کے لئے پروگرام کا انعقاد۔ جس میں ایم ڈبلیو ایم پاکستان کے سیکرٹری امور خارجہ اور حوزہ امام باقرؑ کے مدیر علامہ ڈاکٹر سید شفقت شیرازی نے شرکت اور خطاب کیا۔ کانفرنس کا انعقاد حرم مطہر حضرت سیدہ زینب سلام اللہ علیہھا میں موجود کانفرنس ہال میں کیا گیا۔ جس میں طلباء کی کثیر تعداد نے شرکت کی۔ سربراہ امورخارجہ کے علاوہ مدرسہ آیت اللہ فاضل لنکرانی کے مدیر علامہ سید طاہر المو سوی نے بھی شرکت کی۔
8وحدت نیوز(آرٹیکل)اپریل سنہ 1980کو عراق کے سابق ڈکٹیٹر صدام کے کارندوں نے عظیم فلسفی اور عالم دین آیت اللہ سید محمد باقر الصدر اور ان کی ہمشیرہ بنت الہدیٰ کو جیل میں اذیتیں دینے کے بعد شہید کردیا۔
آیت اللہ سید محمد باقر الصدر سنہ 1934 میں عراق کے شہر کاظمین میں آقائی سید حیدر الصدر کے گھر پیدا ہوئے ۔انہوں نے ابتدائی دینی تعلیم اپنے شہر میں ہی حاصل کی اس کے بعد وہ اعلیٰ دینی تعلیم حاصل کرنے کے لئے نجف اشرف چلے گئے ۔
ابھی ان کی عمر بیس سال بھی نہیں ہوئی تھی کہ وہ درجۂ اجتہاد پر فائز ہوگئے ۔انہوں نے صرف بائیس سال کی عمر میں اپنی پہلی کتاب غایت الفکر فی علم الاصول الفقہ تحریر کی۔اس کے بعد انہوں نے دو معرکۃ الآرا کتابیں فلسفتنا اور اقتصادنا تحریر کیں جنہوں نے علمی حلقوں میں تہلکہ مچادیا۔وہ دین کو سیاست سے جدا نہیں سمجھتے تھے اور علمی سرگرمیوں کے ساتھ ساتھ سیاسی سرگرمیوں میں بھی بھر پور حصہ لیتے تھے اسی بنا پر بعث پارٹی والے ان کے وجود کو اپنے لئے خطرہ سمجھتے تھے ۔آیت اللہ باقر الصدر نے امام خمینی ؒ کی قیادت میں رونما ہونے والے اسلامی انقلاب کی حمایت میں نہ صرف اہم کردار ادا کیا بلکہ آپ امام خمینی سے اپنی محبت کے اظہاراور انقلاب اسلامی کی ھمایت کے پیش نظر فرماتے تھے ۔
’’امام خمینی کی ذات میں اسطرح ضم ہوجاؤ جسطرح وہ اسلام میں ضم ہوگئے ہیں‘‘شہید باقر الصد رکی انقلاب اسلامی کی حمایت سابق ڈکٹیٹر حکومت کے لئے انتہائی ناگوار امر تھا۔
عراق میں اسلام مخالف قوتوں کے خلاف اور بالخصوس بعث پارٹی کی اسلام دشمن کاروائیوں کو روکنے کے لئے آیت اللہ باقر الصدر نے مہدی حکیم کے ساتھ مل کر حزب الدعوۃ پارٹی کی بنیاد رکھی ۔یہ وہ موقع تھا کہ پورے عراق میں نوجوانوں اور عوام کی بڑی تعداد اسلام کے پرچم تلے جمع ہونا شروع ہو گئی تھی اوراسلام دشمن بعث پارٹی کے خلاف آواز بلند ہوئی۔اسی کے نتیجہ میں بعث پارٹی کو خطرہ محسوس ہوا تو بعث پارٹی کے کارندوں نے انہیں اور ان کی عالمہ بہن سیدہ آمنہ بنت الہدای کو گرفتار کرکے جیل میں ڈال دیا اور ان پر تشدد اور ظلم و ستم کی انتہا کردی۔آخر کار یہ دونوں بہن بھائی 8 اپریل سنہ 1980کو عراق کی بعثی حکومت کی جیل میں تشدد اور ظلم و ستم کے باعث درجۂ شہادت پر فائز ہوگئے اور صدامی فوجیوں نے دونوں کو رات کی تاریکی میں ایک گمنام مقام پر دفنا دیا ۔صدام ملعون کے دور کے ایک سیکورٹی آفیسر کی جانب سے بتائی جانے والی تفصیلات کے مطابق آیت اللہ باقر الصدر اور ان کی بہن آمنہ بنت الہدیٰ کو کس طرح شہید کیا گیا،سیکورٹی آفیسر کے مطابق وہ لوگ شہید باقر الصدر اور ان کی بہن کو بغداد کے نیشنل سیکورٹی سینٹر میں لے کر آئے اور ان کے ہاتھ پاؤں کو بھاری زنجیروں سے جکڑ دیا گیا۔کچھ دیر میں عراق کا سابق صدر صدا م ملعون پہنچا اور اس نے شہید آیت اللہ باقر الصدر سے پوچھا 146146کیا تم عراق میں حکومت بنانا چاہتے ہو145145؟اور اس کے ساتھ ہی صدام نے ان کے چہرے اور جسم پر لوہے کی ایک راڈ سے تشدد کرنا شروع کر دیا۔
اس کے بعد آیت اللہ سید باقر الصدر نے صدام کو جواب دیا کہ میں حکومت کو تمہارے لئے چھوڑرہا ہوں لیکن تم ایران میں آنے والے اسلامی انقلاب کی برکتوں کو نہیں روک سکوگے ،اس پر صدا م کوغصہ آیا اور اس نے اپنے گارڈزکو کہا کہ ان پر تشدد کرو۔صدام ملعون نے کہا کہ سیدہ آمنہ بنت الہدی ٰ کو لایا جائے جو کہ قید میں تھیں اور دوسرے کمرے میں ان کو تشدد کا نشانہ بنایا جا رہا تھا ،جب شہید باقر الصدر کی شہید ہ بہن آمنہ بنت الہدیٰ کو لایا گیا تو ان کی حالت انتہائی خراب تھی ،جس پر شہید آیت اللہ باقر الصدر غصے میں آئے اور انہوں نے صدام سے کہا۔اگر تم انسان ہو تو انسان کی طرح پیش آؤ۔اس کے بعد صدام نے لوہے کی راڈ سے شہیدہ آمنہ بنت الہدیٰ کو شدید تشدد کا نشانہ بنایا۔۔۔۔۔۔۔۔اس پر سید باقر الصدر شدید غصے کی حالت میں صدام سے بولے کہ اگر تم مرد ہو تو آؤ مجھ سے مردوں کی طرح لڑو اور میری بہن کو جانے دو۔اس کے بعد صدا م نے اپنی پستول نکال کر سید باقر الصد ر اور ان کی بہن آمنہ بنت الہدیٰ کوگولی کا نشانہ بنایا جس کے بعد وہ شہید ہو گئے ،اور صدام ملعون وہاں سے چلا گیا،عراق میں صدام کی ڈکٹیٹر حکومت کے خاتمے کے بعد شہید آیت اللہ باقرالصدر کی قبر کا پتہ چلا اور گمنامی میں دفنائے جانے والی اس عظیم ہستی کی قبر پر ان کے عقیدت مندوں کا ہجوم رہتا ہے ۔
َََآیت اللہ سید باقر الصدر کے آثار و تالیفات۔
شھید صدر نے مختلف موضوعات پر متعدد علمی کتابیں تالیف کی ہیں متعدد موضوعات پر آپ کی قلم فرسائی سے یہ اندازہ ھوتا ھے کہ آپ مختلف سماجی، دینی، سیاسی، اقتصادی اور فلسفی میدانوں میں وسیع النظر اور صاحب رائے تھے ۔ آپ نے ان تمام موضوعات پر گرانقدر کتابیں تالیف کی ھیں کہ جن میں درج ذیل کی طرف اشارہ کیا جاتا ھے ۔
۱ ۔ اقتصادنا ۔(یعنی ہماری اسلامی معاشیات جس میں انہوں نے واضح کر دیا کہ اسلام کا اپنا ایک معاشی نظام ہے جو دنیا کے مادی نظاموں سوشلزم،سرمایہ دارانہ نظاموں اور کمیونزم سے لاکھوں درجہ بہتر اور قابل عمل ہے ۔)
۲ ۔ الاسس المنطقیۃ للاستقراء(یہ کتاب متعدد مرتبہ چھپنے کے علاوہ فارسی میں ترجمہ ھو چکی ھے جس کا فارسی نام " مبانی منطقی استقراء
" ھے اور مترجم جناب سید احمد فھری ھیں)
۳ ۔ الاسلام یقود الحیۃ( اس مجموعہ کے کل چھ جزء ھیں جو سن ۱۳۹۹ھ میں ایران کے اسلامی انقلاب کی کامیابی کی مناسبت سے ایران میں چھپ چکی ھیاس کے چھ جز ہیں۔)
۴ ۔ البنک اللاربوی فی الاسلام،۵ ۔ بحوث فی شرح العروۃ الوثقی
۶ ۔ بحوث حول المھدی عج (یہ کتاب متعدد بار چھپ چکی ھے اور فارسی میں بھی ترجمہ ھو چکی ھے پھلے یہ کتاب سید محمد صدر کی کتاب " تاریخ الغیبۃ الصغریٰ " کے اوپر مقدمہ کی حیثیت سے تحریر کی گئی لیکن بعد میں مستقل طور کتاب کی شکل میں طبع ھوئی اس کے فارسی ترجمہ کا نام " امام مھدی حماسہ ای از نور " ھے ۔)
۷ ۔ بحث حول الولایۃ ۔
۸ ۔ بلغۃ الراغبین آیت اللہ العظمیٰ شیخ محمد رضا آل یاسین کے رسالہ عملیہ پر شھید صدر کا تعلیقہ
۹ ۔ دروس فی علم الاصول، یہ کتاب تین مرحلہ میں " حلقات " کے نام سے لکھی گئی ھے جس کا حلقہ سوم دو حصوں پر مشتمل ھے ۔
۱۰ ۔ فدک فی التاریخ اس کتاب میں صدر اسلام کے اھم ترین حادثات میں سے ایک واقعہ پر بحث کی گئی ھے جو رسول خدا صلی اللہ علیہ و آلہ و سلم کی رحلت کے بعد رونما ھوا ۔ اور آنحضرت کے بعد اسلام کی سیاسی و سماجی نظام کی تشکیل کا تحقیقی جائزہ لیا گیا ھے ۔
۱۱ ۔ فلسفتنا۔ یہ کتاب ان اسلامی فلسفہ کے مباحث پر مشتمل ھے جنھیں دوسرے جدید مادی مکاتب فکر خاص طور سے مارکسیزم کے ساتھ موازنہ کر کے پیش کیا گیا ھے ۔
۱۲ ۔ غایۃ الفکر فی علم الاصول۔
۱۳ ۔ المعالم الجدیدۃ للاصول۔
۱۴ ۔ المدرسۃ الاسلامیۃ۔یہ کتاب دو حصوں میں چھپ چکی ہے ،پہلاحصہ: الانسان المعاصر و المشکلۃ الاجتماعیۃ، دوسرا حصہ: ماذا تعرف عن الاقتصاد الاسلامی ھے۔
۱۵ ۔ منھاج الصالحین،حضرت آیۃ اللہ العظمیٰ سید محسن الحکیم کے رسالۃ عملیہ پر آپ کا تعلیقہ ھے۔
۱۶ ۔ موجز احکام الحج
آیت اللہ شہید باقر الصدر ایک ایسے مفکر اور اسلام کے رہنما تھے کہ جنہوں نے مسلمانوں کو سکھایا کہ وہ اسلام دشمن پالیسیوں اور اسلام دشمن ثقافت کے سامنے سینہ سپر ہو جائیں۔آیت اللہ باقر الصدر ایک ایسے رہنما تھے کہ جنہوں نے نے نوجوانوں کے دلوں کو اسلام کی محبت سے مالا مال کر دیا۔
شہیدہ سیدہ آمنہ بنت الہدیٰ ؒ
یہ 1979ء کی بات ہے جب بعثی دہشت گردوں نے شہید باقر الصدر ؒ کو نجف اشرف سے گرفتار کر لیا ،اسی وقت ایک باحجاب خاتون حرم امام علی علیہ السلام میں بھاگتے ہوئے داخل ہوئی اور لوگوں سے مخاطب ہو کر کہا،اے لوگو!146146کیوں تم خاموش ہو؟جب کہ تمہارے رہنما کو گرفتار کیا جا چکا ہے ،کیوں تم خاموش ہو؟جب کہ تمہارے مرجع تقلید پر بیہمانہ تشدد کیا جا رہاہے ،باہر نکلو اور احتجاج کرو146146۔شہیدہ آمنہ بنت الہدیٰ ؒ کے ان ملکوتی اور الہیٰ الفاظ کا اثر تھا کہ ہزاروں کی تعداد میں لوگ گھروں سے نکل آئے اور شہید باقر الصدر ؒ کی گرفتاری کے خلاف احتجاج شروع کر دیا،جس کے سبب صدامیوں نے انھیں اسی دن مجبوراً رہا کر دیا۔اس احتجاج نے صدامی دہشت گردوں کو ایک واضح پیغام دیا کہ لوگ صدام ملعون کی شیطانی حکومت کے خلاف قیام کے لئے تیار ہیں۔عزم وسیرت زینبی کا پرتو سیدہ آمنہ بنت الھدیٰ 1937ء میں قدیمیہ بغداد میں پیدا ہوئیں اپنے گھر کی واحد خاتون تھیں۔شہیدہ آمنہ بنت الہدیٰ نے ابتدائی تعلیم اپنی والدہ سے حاصل کی اور بعد میں باقی تعلیم اپنے عظیم بھائی شہید باقر الصدرؒ ؒ سے حاصل کی تھی۔اپنی اس مختصر زندگی میں عظیم خاتون شہیدہ آمنہ بنت الہدیٰ ؒ نے صدامی دہشت گردوں کے خلاف بلا خوف و خطر عراقی غریب عوام کے بہبود اور تعلیم کی پسماندگی کی دوری اور شعور اسلامی کی بیداری کے لئے فعال ترین کردار ادا کیا ،اپنی زندگی اور فعالیت سے تمام شعبہ ہائے زندگی کو متاثر کیا۔شہیدہ آمنہ بنت الہدیٰ جوآپ ؒ اسلامی دعوہ پارٹی کی خواتین ونگ کی سربراہ تھیں،1966ء میں آپ نے الدعوۃ میگزین کا آغاز کیا تا کہ معاشرے میں شعور کی بیداری کے لئے کام کیا جا سکے ،آپ کی تحریروں نے جو خواتین میں انتہائی مقبول و معروف ہیں معاشرے کی بیداری میں اہم کردار ادا کیا۔1967ء میں آپ نے نجف اشرف ،بغداد اور دیگر مستضعف شیعہ علاقوں میں بچیوں کی تعلیم کے لئے اسکولوں کا جال بچھا دیا تھا تا کہ شیعہ بچیوں کو زیور تعلیم سے آراستہ کیا جا سکے ۔آپ نے سینکڑوں کتابیں تحریر کیں جن میں اکثر فکشنل کہانیاں ہیں جو معاشرے کے مسائل اور ان کے حل پر مشتمل ہیں۔آپ کی ایک معروف نظم ’’میں جانتی ہوں‘‘کو جناب ثاقب اکبر نے منظوم اردو ترجمہ کے قالب میں ڈھالا ہے جو نذر قارئین ہے
میں جانتی ہوں۔۔۔
میں جانتی ہوں کہ
حق کا رستہ بڑا کٹھن ہے
مگر میں ان خار زار راہوں کو طے کروں گی
یہ وہ سفر ہے
جو ان گلوں سے سجا نہیں ہے
جو اپنی مہکار ندیوں میں بکھیرتے ہیں
مگر مرا تو یہ فیصلہ ہے
چلوں گی کانٹوں پہ خوں بہے گا
راہِ صداقت پہ اک نیا نقش پا بنے گا۔
میں ان شگوفوں کو جانتی ہوں
پیامِ فصل بہار بن کر
مجاہدوں کا وقار بن کر
ہجومِ گل میں رہیں جو تنہا
میں جانتی ہوں کہ
حق کی نصرت وفا کے خوگر سپاہیوں کے لیے رہی ہے
اگرچہ تھوڑے ہوں وہ سپاہی، وفا کے راہی
میں جانتی ہوں کہ
حق ہمیشہ رہا ہے باقی
ہے جو بھی اس کے خلاف،
بے شک اسے تباہی کا سامنا ہے
اسی لیے تو ہے میرا پیماں
کہ میں تو اسلام پر جیوں گی
رہ حقیقت پہ جان دوں گی
مری رگوں میں لہو ہے جب تک
ہر ایک باطل کا، ہر دغاکا
شدید انکار ہی کروں گی
میں جانتی ہوں کہ حق کا رستہ بڑا کٹھن ہے ۔
تحریر۔۔۔۔(سید تصور حسین نقوی الجوادی)
