وحدت نیوز(ملتان) ایم ڈبلیوایم کے حمایت یافتہ ملتان کے حلقہ این اے149سے نومنتخب رُکن قومی اسمبلی ملک محمد عامر ڈوگر نے وحدت ہائوس (جامع مسجد الحسین )ملتان میں مجلس وحدت مسلمین پاکستان کے مرکزی سیکرٹری سیاسیات سید ناصرعباس شیرازی سے ملاقات کی۔ اس موقع پر ایم ڈبلیو ایم ملتان کے سیکرٹری جنرل علامہ سید اقتدارحسین نقوی، ڈپٹی سیکرٹری جنرل سلیم عباس صدیقی، علامہ قاضی نادر حسین علوی، مولانا عمران ظفر، سیکرٹری سیاسیات مہر سخاوت، وسیم زیدی، ملک حسنین عباس انصاری، ذیشان حیدرعابدی، ناصر عباس گردیزی، قمر زیدی، سید طاہرعباس گردیزی، حسن اختر رضوی، شبررضا زیدی اور مجلس وحدت مسلمین جنوبی پنجاب کے میڈیاکوارڈینیٹر ثقلین نقوی موجود تھے۔

مجلس وحدت مسلمین کی حمایت سے منتخب ہونے والے ممبر قومی اسمبلی ملک عامر ڈوگر سے ملاقات کے دوران گفتگو کرتے ہوئے مجلس وحدت مسلمین کے مرکزی سیکرٹری سیاسیات سید ناصر عباس شیرازی کا کہنا تھا کہ پاکستان اس وقت کرپشن، بدعنوانی، مہنگائی، بے روزگاری سمیت بہت سے مسائل کا شکا ر ہے لیکن ملک کے نام نہاد اور جعلی حکمران اپنی عیش وعشرت اور اقتدار کو طول دینے کی ہرممکن کوشش کررہے ہیں لیکن ملک میں دھرنوں سے پیداہونے والی صورتحال نے ہرپاکستانی کو ایک نیا حوصلہ دیا ہے کہ ظالم کے سامنے کھڑے ہوکر آوازحق کو بلند کرنا چاہیے۔   ناصر شیرازی کا مزید کہنا تھا کہ شیعہ سنی وحدت سے تکفیریت کا چہرہ واضح ہورہا ہے، آج پاکستان میں ایک طرف کو خوش آمدید کہا جارہا ہے اور دوسری طرف اُس سے انکار کیا جارہا ہے، مجلس وحدت مسلمین پاکستان نے آپ کی حمایت کا فیصلہ کیا اور پھر ہر ممکن کوشش کی۔ یاد رہے کہ ملک عامر ڈوگر کے مدمقابل اُمیدوار کالعدم سپاہ صحابہ کے حمایت یافتہ تھے جس پر مجلس وحدت مسلمین نے ملک عامر ڈوگر کی حمایت کی۔ جس حلقے سے ملک عامر ڈوگر کامیاب ہوئے ہیں یہ شیعہ اکثریتی حلقہ ہے اور یہ حلقہ عزادری کا مرکزہے۔

نومنتخب رُکن اسمبلی نے ضمنی الیکشن میں مجلس وحدت مسلمین کی جانب سے حمایت کرنے پر شکریہ ادا کیا اور کہا کہ ملک سے فرقہ واریت کا خاتمہ ہی ترقی کا پیش خیمہ ہے، بعض نام نہاد لیڈر بھی مصلحت کاشکار ہیں اور حق بات کہنے کی بجائے ظالم کے ظلم میں شریک ہورہے ہیں۔

وحدت نیوز (ملتان) مجلس وحدت مسلمین ملتان (سوتری وٹ یونٹ) نے سوتری وٹ میں مسجد کی تعمیر کا سنگ بنیاد رکھ دیا۔ تقریب کی صدارت ضلعی سیکرٹری جنرل ایم ڈبلیو ایم ملتان علامہ سید اقتدار حسین نقوی، ڈپٹی سیکرٹری جنرل محمد عباس صدیقی، علامہ قاضی نادر حسین علوی، علامہ محمد حسین مہدوی، مولانا مظہر حسین صادقی اور مولانا عمران ظفر نے کی۔ اس موقع پر اہل علاقہ کی کثیر تعداد موجود تھی۔ سنگ بنیاد کی تقریب سے خطاب کرتے ہوئے ضلعی سیکرٹری جنرل علامہ سید اقتدار حسین نقوی نے کہا کہ ایم ڈبلیو ایم سوتری وٹ یونٹ کے اراکین اور کارکنان لائق تحسین ہیں جنہوں نے عملی میدان میں اپنا کردار ادا کیا۔ اُنہوں نے کہا کہ مجلس وحدت مسلمین کے کارکنان اور چاہنے والوں میں اضافہ ہو رہا ہے جو صرف اور صرف اخلاص کا نتیجہ ہے۔

وحدت نیوز (ملتان) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری کے حکم پر ملک کے دیگر شہروں کی طرح ملتان میں بھی سانحہ کوئٹہ کے خلاف احتجاجی دھرنا دیا گیا۔ دھرنے کی قیادت مجلس وحدت مسلمین کے سیکرٹری جنرل علامہ سید اقتدار حسین نقوی، علامہ قاضی نادر حسین علوی، امامیہ اسٹوڈنٹس آرگنائزیشن پاکستان کے مرکزی جنرل سیکرٹری جواد جعفری، محمد عباس صدیقی، تہور حیدری، ثقلین نقوی، اقبال مہدی زیدی، آصف گردیزی، مجاہد حسینی، مظفر عباس نے کی۔ دھرنے کا آغاز شام 6 بجے ہوا جو رات گئے تک جاری رہا۔ مظاہرین نے حسنیت زندہ باد یزیدیت مردہ باد، لبیک یا حسین (ع)، پاکستان بنایا تھا پاکستان بچائیں گے، ہے ہماری درسگاہ کربلا کربلا، مردہ باد امریکہ، مردہ باد اسرائیل، طالبان، سمیت دیگر نعرے لگائے۔ مظاہرین نے نماز باجماعت چوک نواں شہر میں علامہ سید اقتدار حسین نقوی کی اقتداء میں ادا کی۔ بعدازاں ماتم داری اور نوحہ خوانی کی گئی۔ نوحہ خوانوں نے شہدائے کربلا، کراچی، کوئٹہ، پشاور کو خراج تحسین پیش کیا۔ آخر میں مقررین نے خطاب کرتے ہوئے کہا کہ اگر ہمارے سکیورٹی ادارے اور حکومتیں گذشتہ سانحات کے مجرموں کو کیفر کردار تک پہنچاتیں تو اس طرح کا سانحہ رونما نہ ہوتا۔

اُنہوں نے کہا کہ آج شیعوں کا خون پانی سے بھی زیادہ سستا ہو گیا ہے۔ دہشت گرد سکیورٹی حصار کو توڑتے ہوئے قتل عام کرتے ہیں۔ اگر یہ سلسلہ جاری رہا تو پھر گلگت سے کراچی اور آزاد کشمیر سے کوئٹہ تک پورا پاکستان جام کردینگے۔ ہم پاکستان بنانے والے تھے اور پاکستان بچائیں گے۔ ہم یہ سمجھتے ہیں کہ امریکہ اور آل سعود کے ایجنٹ ہیں۔ اس لیے پاکستان کو ان امریکیوں اور سعودی ایجنٹوں سے نجات دلانا ضروری ہے۔ علامہ سید اقتدار حسین نقوی نے کہا کہ آج پھر سرزمین کوئٹہ خون سے رنگین ہے ہم اُن مائوں کو سلام کرتے ہیں جنہوں نے اپنے لخت جگر راہ حسین میں قربان کیے ہیں۔