وحدت نیوز(اسلام آباد) مجلس وحدت مسلمین پاکستان کےسربراہ  علامہ ناصرعباس جعفری نے کہا ہے کہ امام خمینیؒ کی زیر قیادت سرزمین ایران پر رونما ہونے والا اسلامی انقلاب پوری دنیا میں غلبہ اسلام کا نقطہ آغاز ثابت ہوا ،آج استعماری قوتیں غلبہ اسلام سے خوفزدہ ہیں اور اسلامی انقلاب کے اثرات سے محفوظ رہنے کے لیے ملت اسلامیہ کے خلاف سازشوں کے جال بن رہی ہیں لیکن وہ اپنے مقاصد میں کامیاب نہیں ہو سکیں گی ،انقلاب اسلامی کی 36ویں سالگرہ کے موقع پر ایم ڈبلیو ایم کے مرکزی سیکرٹریٹ سے جاری ہونے والے بیان  میں انہوں نے کہا کہ انقلاب اسلامی کی سب سے بڑی خاصیت یہ ہے کہ اس نے مذہب و مسلک کی قید سے بالا تر ہو کر انسانی ذہنوں کو بیدار کیا اور بالخصوص ملت اسلامیہ کو استعماری طاقتوں سے آزادی کے حصول کا راستہ دکھایا ، انہوں کہا کہ ا نقلاب کسی علاقہ، سرزمین، یا مذہب کے لیے مختص نہیں ہوتے اور نہ ہی ان کے اثرات کو روکا جا سکتا ہے۔

فرانس، روس، چین یا دوسرے ممالک میں انقلاب آئے تو انہوں نے بھی باقی اقوام پر اپنے اثرات ڈالے، لیکن ایران میں آنے والے انقلاب اور باقی ممالک میں آنے والے انقلابات میں بنیادی فرق یہ ہے کہ ایران کا انقلاب "اسلامی" یعنی دین مبین اسلام کے بنیادی اصولوں پر قائم تھا جبکہ دوسرے ممالک میں آنے والے انقلابات خاص اقتصادی، یا معاشرتی نظریہ کی بنیاد پر تھے، کہ جنکا دین اسلام سے کوئی براہ راست رابطہ نہ تھا۔انہوں نے کہا کہ انقلاب اسلامی ایران نے جہاں پورے عالم اسلام پر اپنے اثرات مرتب کئے وہاں اس سے سرزمین پاکستان پر بھی مثبت تبدیلیاں رونما ہوئیں، اس خطے میں شہید علامہ عارف حسین حسینی اور شہید ڈاکٹر محمد علی نقوی نے پاکستانی معاشرے کو انقلاب اسلامی کی حقیقت سے روشناس کرانے کے لئے کلیدی کردار ادا کیا اور ملت تشیع پاکستان کو آج بھی شہید حسینی کے وہ تاریخی کلمات اچھی طرح یاد ہیں جن میں انہوں نے کہا تھا کہ ہم ولایت فقیہ سے ایک انچ بھی پیچھے ہٹنے کیلئے تیار نہیں ہیں اور پاکستانی سرزمین سے کسی کو بھی برادر اسلامی ملک ایران میں انقلاب کے خلاف کام کرنے کی اجازت نہیں دیں گے، علامہ ناصر عباس جعفری نے کہا امریکہ، اسرائیل اور سامراجی سازشوں کا راستہ روکنے کے لئے ملت اسلامیہ کے ہر فرد کو اسلامی انقلاب کا ساتھ دینا ہوگا، تاکہ شیطان بزرگ اپنے مقاصد میں کامیاب نہ ہوسکے۔

وحدت نیوز(حیدر آباد) امام خمینی کے فرمان پر فلسطینی عوام سے اظہار یکجہتی کے لیئے  ملک بھر کی طرح حیدرآباد میں بھی مجلس وحدت مسلمین ، امامیہ اسٹوڈنٹس آرگنائزیشن اور اصغریہ آرگنائزیشن کے زیر اہتمام غزہ کے مظلومین کے ساتھ ہمدردی کے لئے  قدم گاہ مولا علی ع سے پریس کلب حیدرآباد تک القدس ریلی نکالی گئی جس کی قیادت ، برادر عالم کربلائی، مولانا امداد علی نسیمی اور دیگر علماء کر رہے تھےجبکہ امامیہ اسٹوڈنٹس آرگنائیزِیشن حیدرآبادڈویژن ، اصغریہ اسٹوڈنٹس آرگنائیزِیشن پاکستان کے مرکزی قائدین   اور مردوں سمیت خواتین اور بچوں کی بڑی تعداد نے شرکت کی، مظاہرین نے ہاتھوں میں بینرز اور پلے کارڈز اٹھا رکھے تھے جن پر غزہ کے مظلوم عوام سے اظہار ہمدردی کے لئے نعرے اور جملے آویزاں تھے۔

القدس ریلی سے خطاب کرتے ہوئے مجلس وحدت مسلمین ضلع حیدرآباد کے سیکریٹری جنرل مولانا امداد علی نسیمی نے کہا کہ فلسطینیوں کی مدد اور نصرت کرنا ہر مسلمان پر فرض ہے اور ہم فلسطینیوں کی مدد اس وقت تک کرتے رہیں گے جب تک مسلمانوں کا قبلہ اول بیت المقدس بازیاب نہیں کروا لیا جاتا،مظلوم فلسطینیوں نے بہت سے مظالم برداشت کیے ہیں اور اسرائیل دن بہ دن مظالم میں اضافہ کرتاجارہاہے۔امت مسلمہ کا فریضہ بنتا ہے کہ مظلوم فلسطینی بھائیو کا ساتھ دیکر اس کہ امریکہ کے ناجائز اولاد اسرائیل سے آزادی دلوائی جاَئے۔مولانا امداد علی نسیمی نے مزید کہا کہ آج ہم نےقائداعظم کے فرمان کو نظر انداز کرکے نہتے فلسطینیوں کو ظالم اسرائیل کے رحم وکرم پر چھوڑ رکھا ہے،مغربی ممالک خاص طور پر امریکہ اور برطانیہ اسرائیل کے ایسے مجرمانہ اقدامات کی بھی کھلم کھلا حمایت کرنے میں مصروف ہیں، جنہیں ایک عام انسان بھی قبول نہیں کرسکتا۔بیت المقدس کو آزاد کروانا ہمار شرعی اور اسلامی فریضہ ہے، وہاں پر آئے دن ہونے والے مظالم کو روکنا حکومتوں کا کام ہے، جبکہ خود ساختہ انسانی حقوق کے تحفظ کی تنظیمیں اب کہاں غائب ہوچکی ہیں، جن کو امریکہ میں ہونے والی زیادتی پر احتجاج کرنا تو انہیں یاد رہتا ہے مگر غزہ میں انسانی قدروں کی بدترین پامالی پر سب نے آنکھیں بند کر رکھی ہیں، صرف عالم اسلام میں قیادت کا فقدان ہے،اس موقع پر مجلس وحدت مسلمین ضلع حیدرآباد شعبہ خواتین کی سیکرٹری جنرل ہما مہدی جعفری خواتین کی بڑی تعداد کے ہمراہ ریلی میں شریک تھیں ۔

وحدت نیوز(سکھر) امام خمینی کے فرمان پرمجلس وحدت مسلمین پاکستان ضلع سکھر ،امامیہ اسٹوڈنٹس آرگنائزیشن پاکستان سکھر ڈویژن ،اصغریہ اسٹوڈنٹس آرگنائزیشن پاکستان سکھر ڈویژن اور اصغریہ آرگنائزیشن پاکستان سکھر ڈویژن کی جانب سے مشترکہ القد س ریلی برائے آزادی قبلہ اول بیت المقدس و حمایت مظلومین جھاں باالاخص مظلومین غزہ و فلسطین ، عراق ، شام، یمن ، پاکستان ، اور سعودی عرب ایک عظیم الشان ریلی بعد نمازِ جمعہ حیدری مسجد تا پریس کلب سکھر برآمد ہو ئی۔ شرکاء نے اپنے ہاتھوں میں بینرز، پوسٹرز، اور پلے کارڈ اٹھا رکھے تھے۔جن پر امریکا و اسرائیل اور بے ضمیر و بے حس مسلم عرب حکمرانوں کے خلاف نفرت و خصارت آمیز نعرہ جات و شعار تحریر تھے ۔

اس کے علاوہ شرکاء امریکا و اسرائیل کے غزہ میں تازہ ترین مظالم و بربریت کے خلاف نعرہ جات کے ذریعے اپنے عیض و عضب کا اظہار کررہے تھے ۔ اور بیت المقدس کی آزادی کا مطالبہ کررہے تھے ۔ شرکاء نے اس بات پر بھی اپنے غم وغصے کا اظہار کیا کہ پاکستان میں گزشتہ کئی دہائیوں سے ریاستی و غیر ریاستی اداروں ، طالبان، لشکرجھنگوی ، سپاہ یزید، حکومت سندھ ، حکومت پنجاب کی سرپرستی میں شیعہ نسل کشی کی جارہی ہے ۔

پریس کلب سکھر پر شرکاء نے ریلی سے خطاب کرتے ہوئے مجلس وحدت مسلمین پاکستان ضلع سکھر کے سیکریٹری جنرل چوہدری اظہر حسن ، امامیہ اسٹوڈنٹس آرگنائزیشن پاکستان کے ڈویژنل صدر موسیٰ کاظم ، اصغریہ آرگنائزیشن ، کے مرکزی جنرل سیکریٹری اشرف حسین اسدی اور علمائے کرام میں حجتہ الاسلام مولانا سید محمد عالم شاہ موسوی محرک آل پاکستان شیعہ ایکشن کمیٹی سکھر، حجتہ الاسلام مولانا علی بخش سجادی، امام جمعہ و جماعت حیدری مسجد پراناسکھر و یگر علمائے کرام نے اپنے خطاب میں باور کرایا کہ امریکا، اسرائیل، سعودی عرب ، قطر ، بحرین ، یمن ، پاکستان ، مصرو دیگر اسلامی ممالک کے مظلوم عوام کے خلاف موت کا بازار گرم کر رکھا ہے ، لوگوں کی جان ومال ، ننگ و ناموس اور چادر و چاردیواری کے تقدس کو پائمال کیا جارہا ہے ۔

ریلی سے خطاب کرتے ہوئے ایم ڈبلیوایم کے سیکریٹری جنرل چوہدری اظہر حسن نے کہا کہ ان تمام مظالم کے دلسوز حقائق کو عالمی میڈیا سے دور رکھا جاتا ہے ان مظلوموں کی آواز کو دبایا جاتا ہے ، عالمی انسانیت کو خبرہی نہیں کہ سعودی عرب میں مظلو م عوام پر وہاں کی حکومت کیا کیا مظالم ڈھارہی ہے ، شام و عراق میں کس طرح مقامی حکومتوں کو درھم برہم کرنے کی کوششیں کی جارہی ہیں اور مظلوم عوام کو ISIS اور ISILجیسے دہشتگردوں قاتلوں کے رحم وکرم پر چھوڑا جارہا ہے ، کراچی پاکستان میں ٹارگٹ کلنگ کا بازار گرم ہے قاتل دن دھاڑے مظلوم عوام کی جانوں سے کھیل رہے ہیں ۔

لیکن افسوس ان تمام مظالم پر عالمی ضمیر، اقوام متحدہ ,OIC,عرب لیگ ،سب خاموش تماشائی کا مظاہر ہ کررہے ہیں ، ان تمام تر مظالم کی ڈوریا ں امریکا و اسرائیل سے ہلتی ہیں اور مسلم وعرب حکمران ان کے آلۂ کار کی حثیت سے کام کررہے ہیں ۔ مقررین نے تمام مظلوم قوموں کے آپس میں اتحاد و وحدت پر زور دیا انہوں نے کہا کہ وہ دن ظالم کاآخر دن ہوگا جب دنیا کے تمام مظلوم ایک ہوجائیں گے۔مقررین نے آخر میں قبلہ اول کی آزادی، مظلوموں کی ظالمین و ظلم کے خلاف کامیابی اور استعمارو استکبار کی نست ونابودی نیز امام مہدی علیہ السلام جلدازجلد ظہور کے ساتھ القدس ریلی کا اختتام کا اعلان کیا ۔

وحدت نیوز(اسٹاف رپورٹر) مجلس وحدت مسلمین اور امامیہ اسٹوڈنٹس آرگنائزیشن پاکستان کے زیر اہتمام امام خمینی کے فرمان پر مظلوم فلسطینیوں کی حمایت میں عالمی یوم القدس منایا گیا، پنجاب، سندھ، بلوچستان، کے پی کے ، آزا دکشمیر اور گلگت بلتستان سمیت ملک کے 2300سے زائد مقامات پر القدس ریلیاں نکالی گئیں اور غزہ میں جاری اسرائیل مظالم کی شدید مذمت کی گئی۔مجلس وحدت مسلمین اور آئی ایس او کے زیراہتمام مرکزی ریلی امام بارگاہ جی سکس ٹو اثناء عشری اسلام آباد سے ڈی چوک پارلیمنٹ ہاوس تک نکالی گئی جس کی قیادت ایم ڈبلیو ایم کے سربراہ علامہ ناصر عباس جعفری نے قیادت کی، اس موقع سنی اتحاد کونسل کے سربراہ صاحبزادہ حامد رضا بھی موجود تھے۔ ریلی میں خواتین اور بچوں کی بڑی تعداد موجود تھی جنہوں نے ہاتھوں میں پلے کارڈ ز، بینرز اور فلسطین کے جھنڈے اٹھا رکھے تھے۔

 ریلی سے خطاب کرتے ہوئے مجلس وحدت مسلمین کے سیکرٹری جنرل علامہ ناصر عباس جعفری نے کہا کہ غزہ میں جاری مظالم کی تاریخ انسانیت میں کوئی مثال نہیں ملتی، ایک طرف اسرائیل، زمین، آسمان اور فضا سے آگ برسا رہا ہے تو دوسری جانب مصر اور اردن نے اپنی سرحدیں بند کی ہوئی ہیں جس کی جتنی مذمت کی جائے کم ہے۔انہوں نے کہا کہ یہ امت مسلمہ کیلئے ننگ و عار ہے کہ ڈیڑھ ارب مسلمان ہونے کے باوجود بھی صہیونی غزہ پر بمباری کررہا ہے۔ انہوں نے کہا کہ میڈیا رپورٹس سے واضح ہوگیا ہے کہ غزہ پر حملوں میں نام نہاد سعودی حکمران اور مصری فوجی آمر جنرل سسی ملوث ہیں اور ان کی شئے پر حماس کو ختم کرانے کیلئے یہ جنگ کرائی جارہی ہے۔ عالم اسلام کے ان خائن حکمرانوں نے امت مسلمہ کے دل زخمی کردئیے ہیں۔ اب وقت آگیا ہے کہ امت کو بیدار ہونا چاہیے اور ان نام نہاد مسلمان حکمرانوں کو اقتدار سے باہر کردینا چاہیے۔ انہوں نے کہا کہ نواز شریف نے یوم سوگ کا اعلان کیا ہے لیکن قوم کا تقاضا ہے کہ وہ او آئی سی کا اجلاس بلائیں اوراس معاملے کو عالمی سطح پر اٹھائیں، یوم القدس کو سرکاری سطح پر منانے کا اعلان کیا جائے۔ریلی سے خطاب کرتے ہوئے سنی اتحاد کونسل کے سربراہ صاحبزادہ حامد رضا نے کہا کہ اسرائیلی مظالم سے انسانیت بھی شرما گئی ہے، اسلامی ممالک کی خاموشی نے ثابت کردیا ہے کہ یہ حکمران صہیونیوں کے ایجنٹ ہیں۔ عرب ممالک کے سربراہ کا منافقانہ رویہ پوری قوم نے دیکھ لیا ہے۔ ہم او آئی سی سے مطالبہ کرتے ہیں کہ وہ غزہ میں جاری مظالم بند کرائے۔

کراچی میں مرکزی ریلی سے خطاب کرتے ہوئے مجلس وحدت مسلمین کے ڈپٹی سیکرٹری جنرل علامہ امین شہیدی نے کہا کہ کربلا ئے غزہ پر خاموشی ظاہرکرتی ہے کہ مسلم حکمران امریکی تلوے چاٹتے ہیں اس لئے وہ اس موضوع پر بات تک نہیں کرسکتے۔انہوں نے کہا کہ آج لاکھوں کا یہ اجتماع ثابت کرتا ہے کہ مسلم ممالک کے عوام کیا چاہتے ہیں اور کس کے ساتھ ہیں، جبکہ دنیا نے یہ بھی دیکھ لیا ہے کہ حکمران کس کے ساتھ ہیں۔ انہوں نے مغربی میڈیا کی چشم پوشی پر سخت تنقید کرتے ہوئے کہا کہ ایک ملالہ ہونے والے حملے پر زمین و آسمان کے قلابے ملانے والے آج سینکڑوں ملائیں کی شہادت پر کیوں خاموش ہیں؟۔ امامیہ اسٹوڈٹنس آرگنازئشن پاکستان کے مرکزی صدر اطہر عمران نے کہا کہ آج کا یہ اجتماع امام خمینی کے فرمان کے مطابق اپنے مظلوم فلسطینیوں کے ساتھ اظہار یکجہتی ہے۔اگر ہماری ضرورت پڑی تو ہم اپنے فلسطینیوں بھائی کی حمایت کیلئے ہر حد تک جانے کیلئے تیار ہیں۔مسلم حکمرانوں کی پراسرار خاموشی کی مذمت کرتے ہیں۔ لاہور میں اسلام پورہ سے اسمبلی ہال تک نکالی جانیوالی ریلی سے خطاب کرتے ہوئے مجلس وحد ت مسلمین کے سیکرٹری سیاسیات ناصر عباس شیرازی اور ایم ڈبلیو ایم پنجاب کے سیکرٹری جنرل علامہ عبدالخالق اسدی نے کہا کہ ہماری ہزاروں جانیں اپنے مظلوم فلسطینی پر قربان ہیں، ہم ان مظلوموں کیلئے ہر طرح کی قربانی دینے کیلئے تیار ہیں۔ اس موقع پر سنی اتحاد کونسل اور تحریک منہاج القرآن کے نمائندوں نے بھی خطاب کیا۔ ملتان میں مرکزی ریلی سے خطاب کرتے ہوئے مجلس وحدت مسلمین کے مرکزی ترجمان علامہ حسن ظفر نقوی نے کہا کہ دنیا کی کوئی طاقت ہمیں فلسطین کے معاملے پر پیچھے نہیں دھکیل سکتی، ہم کل بھی مظلوم فلسطینیوں کے ساتھ تھے ہم آج بھی فلسطینیوں کے ساتھ ہیں۔

کوئٹہ میں علمدار روڈ سے برآمد ہونے والی ریلی سے خطاب کرتے ہوئے مجلس وحد ت مسلمین بلوچستان کے سیکرٹری جنرل مقصود ڈومکی اور شوریٰ عالی کے رکن علامہ ہاشمی موسوی نے کہا کہ ہم نے اس شہر میں قبلہ اول کی آزادی کیلئے ساٹھ سے زائد افراد اسی مقام پر قربان کیے ہیں، اسرائیلی ایجنٹوں نے آج سے تین سال پہلے القدس ریلی پر حملہ کرکے سوچا تھا کہ شائد ان کے اس عمل سے ہم اپنے مظلوم بھائیوں کا ساتھ نہیں دیں گے اور یہ ریلیاں روک جائیں گی لیکن دنیا نے دیکھا ہے کہ ہم نے اتنے شہدا ء دینے کے باوجود اپنے مظلوم فلسطینیوں کے ساتھ ہیں۔ غزہ میں جاری بربریت کی پرزور مذمت کرتے ہیں۔ ریلی سے ایم ڈبلیو ایم کے صوبائی رکن اسمبلی آغا محمد رضا نے بھی خطاب کیا۔

 گلگت کی مرکزی ریلی سے خطاب کرتے ہوئے مجلس وحدت مسلمین گلگت بلتستان کے سیکرٹری جنرل علامہ شیخ نئیر عباس اور سکردو کی ریلی سے خطاب کرتے ہوئے سید علی رضوی نے کہا کہ عالم اسلام کی تمام مشکلات کا ذمہ دار امریکہ ہے، اور اسرائیل اس کا ناجائز بچہ ہے۔ عالمی دنیا کی غزہ پر جاری مظالم پر خاموشی نے ثابت کردیا ہے کہ نام نہاد انسانی حقوق کے علمبردار جانبدار اور منافق لوگ ہیں۔ اس موقع پر اہل سنت علما نے بھی خطاب کیا۔ مظفرآباد آزاد کشمیر سے خطاب کرتے ہوئے صوبائی سیکرٹری جنرل علامہ تصور حسین جوادی نے کہا کہ حکومت فلسطین کے مسئلے کو عالمی سطح پر اٹھائے، جتنا فلسطین کے مسئلہ کو اٹھان ملے گی اتنا ہی ہمارا کشمیر کا موقف مضبوط ہوگا، دونوں ایشوز کی قرار دادیں اقوام متحدہ میں منظور ہوچکی ہیں۔ حیدر آباد میں ریلی سے خطاب کرتے ہوئے ایم ڈبلیو ایم سندھ کے سیکرٹری جنرل علامہ مختار امامی نے کہا کہ ہم فلسطینیوں کے ساتھ ہیں، پینتیس سال سے ہم امام خمینی کے فرمان پر یوم القدس منا رہے ہیں اور یہ دن اس وقت تک منائیں گے جب تک کہ ہمارا قبلہ اول آزاد نہیں ہوجاتا۔

وحدت نیوز(مشہد مقدس) امام خمینی رضوان اللہ کی پچیسویں برسی اور ظہور امام زمانہ ع کی مناسبت سےدفتر مجلس وحدت مسلمین شعبہ مشھد مقدس کی جانب سے ایک عظیم الشان سیمیناربعنوان انقلاب اسلامی نوید انقلاب مہدی عج  کا انعقاد کیا گیا جس میں پاکستان اور ایران کی دینی شخصیات کے علاوہ دنیا بھر سے تعلق رکھنے والے علماء کرام ،طلاب عظام اور زائرین امام رضا علیہ السلام نے شرکت کی ،سیمینار کا آغا ز تلاوت کلام مجید سے ہوااسکے بعد شعرا ئے کرام نے نذرانہ عقیدت پیش کیا۔استقبالیہ مجلس وحدت مسلمین مشھد مقدس کے سیکرٹری جنرل حجۃ الاسلام والمسلمین عقیل حسین خان نے پیش کیا اور معزز مہمانوں کو خوش آمدید کہا،سیمینار میں مجلس خبرگان رہبری کے نمایندہ اور جامعہ مدرسین کے عضو جناب آیت اللہ عباس کعبی نے خصوصی خطاب کیااسکے علاوہ پاکستان سے خصوصی طور پر مجلس وحدت مسلمین پاکستان کے مرکزی ڈپٹی سیکریٹری جنرل علامہ محمدامین شھیدی نے سیمینار میں شرکت کی اور خصوصی خطاب کیا۔پاکستان ،ایران ،افغانستان بنگلہ دیش،ھندوستان،آزربائیجان ،نائیجیریا، کینیا،اور دوسرےممالک سے تعلق رکھنے والے علمائے کرام نے سیمینار میں خصوصی شرکت کی ،مسلم لیگ ن کے رکن قومی اسمبلی  جناب شفقت گوندل نے بھی پروگرام میں شرکت کی،سیمینارکے انعقاد میں  آستان قدس رضوی شعبہ مدیریت امور زائرین غیر ایرانی کے مسئول حجۃ الاسلام والمسلمین دکتر باقری نے خصوصی معاونت کی۔

وحدت نیوز(قم المقدسہ) شہزادی کونین، ام ابیہا، حضرت فاطمۃ الزہرا (س) اور انکے باشرف فرزند، بانی انقلاب اسلامی ایران حضرت امام خمینی (رہ) کی ولادت باسعادت کی مناسبت سے قم کی مقدس سرزمین پر مجلس وحدت مسلمین شعبہ خواتین کی جانب سے ایک عظیم الشان جشن کا انعقاد کیا گیا۔ جشن کا یہ پروگرام مدرسہ زینبیہ (س) میں منعقد ہوا، جس میں خواتین کی ایک بڑی تعداد نے شرکت کی۔ اس بابرکت محفل میں خطباء نے بی بی دو عالم (س) کی سیرت پاک پر روشنی ڈالی اور امام خمینی (رہ) کو سیرت فاطمیہ کا روشن نمونہ قرار دیا۔ اس محفل کے مہمان خصوصی مدرسہ امام خمینی (رہ) قم کے مسئول امور فرہنگی حجت الاسلام والمسلمین امیر حسین  حسینی تھے۔ حجت الاسلام والمسلمین حسینی نے اپنے صدارتی خطاب میں حضرت زہرا (س) کی سیرت پر تفصیل سے روشنی ڈالی  اور کہا کہ حضرت فاطمہ (س) نہ  فقط خواتین کے لئے بلکہ مردوں کے لئے بھی اسوہ حسنہ ہیں۔ جشن  کے اختتام پر مہمانان خصوصی کے ذریعے "خطبہ فدکیہ" کے  انعامی مقابلے میں پوزیشن حاصل کرنی والی خواتین میں انعامات تقسیم کئے گئے۔