وحدت نیوز(اسلام آباد) خیرالعمل فاﺅنڈیشن پاکستان کے چیئرمین نثار فیضی کی زیر صدارت ایگزیکٹو کونسل کا اجلاس مرکزی دفتر میں منعقد ہوا۔ جس میں ممبر بورڈ آف گورنرزعلامہ اعجاز بہشتی نے خصوصی شرکت کی جبکہ دیگر ارکان میں مختلف شعبہ جات و کور کمیٹی کے عہدیداران و صوبائی سیکرٹریز فلاح و بہبود سندھ، بلوچستان، پنجاب، خیبر پختونخواہ، گلگت بلتستان شریک تھے اجلاس میں خیرالعمل فاﺅنڈیشن پاکستان کے زیر اہتمام ملک بھر میں جاری فلاح و بہبود کے منصوبوں کا تفصیلی جائزہ لیا گیا تمام صوبائی سیکرٹریز نے اپنے اپنے صوبوں کی رپورٹس پیش کی۔

چیئرمین خیرالعمل فاﺅنڈیشن نثار فیضی نے اجلاس کے شرکاء کا شکریہ ادا کیا اور صوبائی سیکرٹریز کی کاوشوں کو سراہتے ہوئے کہا کہ خیرالعمل فاﺅنڈیشن کی فعالیت ہم سب کی مشترکہ جدوجہد کا نتیجہ ہے تین سال کے مختصر عرصے میں خیرالعمل فاﺅنڈیشن نے اب تک ملک کے مختلف علاقوں میں مساجد، واٹر پراجیکٹ، سکولز کے 34 منصوبے مکمل کیے اور 2010 کے سیلاب زدگان کے لیئے تعمیر وطن پروگرام کے تحت 300 کمرے تعمیر کیے گئے، 4 ڈسپنسریاں اور ہزاروں یتیموں کو ماہانہ وظیفہ بھی دیا جا رہا ہے جبکہ اس کے علاوہ اسوقت ملک کے مختلف علاقوں میں مساجد، امام بارگاہوں، ڈسپنسری اور سکولز کے 42 منصوبوں پر کام جاری ہے۔

انہوں نے خیرالعمل فاﺅنڈیشن کے لیے ماہ رمضان کو تنظیمی مہینہ قرار دیتے ہوئے کہا کہ ہمیں اس ماہ کی فضیلتوں اور برکتوں سے فیض یاب ہونا چاہیے اور اس ماہ مقدس میں خدمت خلق کو اپنا اولین مقصد بنا کر خصوصی طور پر یتیموں، غربا، مساکین کی خدمت و مدد کرنی چاہیے انہوں نے صوبائی سیکرٹریز کو ہدایت کی کہ وہ اپنے صوبوں میں فعالیت کا مظاہرہ کرتے ہوئے ماہ رمضان کے پروگرامات کو کامیاب بنائیں اجلا س کے آخر میں  علامہ اصغر عسکری نے دعا کرائی۔