وحدت نیوز(لاہور) مجلس وحدت مسلمین پنجاب کے قائم مقام صدر ملک اقرار حسین علوی نے قوم سے دردمندانہ اپیل کی ہے کہ وہ سیلاب متاثرین کی مدد کیلئے دل کھول کر امداد فراہم کرے۔ حکومتیں اپنی ذمہ داری احسن طریقہ سے انجام نہیں دے رہیں، لاکھوں لوگ بارشوں کے دوران کھلے آسمان کے نیچے بیٹھے ہیں، بچوں کے کھانے کیلئے راشن، پینے کیلئے دودھ نہیں، بچوں میں دست، قے کی بیماریاں پھیل رہی ہیں، ادویات موجود نہیں، متاثرین کو فوری طور پر ٹینٹس کی ضرورت ہے۔
لاہور میں کارکنوں سے گفتگو میں انہوں نے کہا کہ وفاقی اور صوبائی حکومتوں کے اعلان کردہ فنڈز لوگوں تک نہیں پہنچ رہے، حکومتوں نے راشن اور ٹینٹ سیلاب زدہ علاقوں میں اپنے ایم این ایز اور ایم پی ایز کو فراہم کر دیئے ہیں، متاثرین کو سیاسی سپورٹ کی یقین دہانی کرانے پر اور جاگیرداروں اور وڈیروں کے ڈیروں کا طواف کرنے پر امداد فراہم کی جاتی ہے۔
انہوں نے کہا کہ ظالم حکمران مصیبت کے وقت بھی سیاست کر رہے ہیں، نیشنل ڈیزاسٹرمینجمنٹ اتھارٹی کا پروسیجر اتنا سست ہے کہ قیامت گزر جانے کے بعد ہی متاثرہ فرد کو کچھ نہ کچھ امداد پہنچتی ہے۔ انہوں نے کہا کہ وزیراعظم اور وزرائے اعلیٰ کو کہتا ہوں کہ امدادی سرگرمیوں کی خود نگرانی کریں، ان کے ایم این ایز اور ایم پی ایز متاثرہ علاقوں سے بھاگ گئے ہیں۔
انہوں نے کہا کہ مجلس وحدت مسلمین دکھ کی اس گھڑی میں اپنے تمام وسائل مصیبت زدگان کی مدد کیلئے استعمال کر رہی ہے۔ ہمارے رضاکار جگہ جگہ موجود ہیں، قوم ہماری مدد کرے، مخیر اور درد دل رکھنے والے لوگ اپنے تئیں بھی جس قدر ممکن ہوسکے اللہ تعالیٰ کی خوشنودی کی خاطر بے سہارا لوگوں کی امداد کیلئے آگے بڑھیں۔
