وحدت نیوز (چنیوٹ ) مجلس وحدت مسلمین ضلع چنیوٹ کا ایک اہم اجلاس ہوا جس میں تمام یونٹس اور تحصیلوں کے عہدہ داران نے شرکت کی، اجلاس جامعہ بعثت رجوعہ سادات میں منعقد ہوا۔اجلاس میں صوبائی سیکرٹری سیاسیات سید اخلاق الحسن بخاری اور ضلعی سیکرٹری سیاسیات سید عاشق حسین بخاری کی گرفتاری کی وجہ سے پیدا ہونے والی صورتحال کا جائزہ لیا گیا۔اجلاس سے خطاب کرتے ہوئے صوبائی سیکرٹری جنرل علامہ عبدالخالق اسدی نے کہاکہ چنیوٹ اور بھکر میں جان بوجھ کر ملتِ جعفریہ کے افراد کو ریاستی جبر کا نشانہ بنایا جا رہا ہے اور کسی بھی اخلاقی و قانونی جواز کے بغیر مجلس وحدت کے فعال کا رکنوں کو پابند سلاسل کیا جارہا ہے اگر حکومت پنجاب نے ہوش کے ناخن نہ لئے تو ملت جعفریہ احتجاج کا حق محفوظ رکھتی ہے ۔انہوں نے کہا کہ صوبائی حکومت فوری طور پر ضلعی سیکرٹری جنرل بھکر سفیر حسین شاہانی ،سید اخلاق الحسن بخاری اور عاشق بخاری سمیت تمام کارکنوں کو فوری طورپر رہا کرئے ۔