وحدت نیوز(کراچی) وطن عزیز کو درپیش چیلنجز کا مقابلہ کرنے کے لئے ہمیں ایک امت بننا ہو گا، معاشرے میں اچھائی کے فروغ اور برائی کے تدارک کے لئے سیر ت پیغمبر اکرم ﷺ پر عمل پیرا ہو نا ہو گا، جب تک معاشرہ میں عدل و انصاف کا قیام یقینی نہیں ہوتادہشت گردی پر قابو پانا مشکل ہے، مجلس وحدت مسلمین کے تمام کارکنان جلوس عید میلاد البنی ﷺ میں بھر پو رشرکت کریں گے، شرکائے جلوس کے استقبال کے لئے کیمپ اور سبیلیں لگائی جائیں گی ۔ ان خیالات کا اظہار مجلس وحدت مسلمین پاکستان صوبہ سندھ کے سیکریٹری جنرل علامہ مختار احمد امامی نے وحدت ہاؤس کراچی میں منعقدہ صوبائی کابینہ کے اجلاس سے خطاب کرتے ہو ئے کیا۔
ان کاکہناتھا کہ دہشت گردی ہمارے وطن عزیزکی جڑوں کو کھوکھلا کر نے میں مصروف ہیں ،عوام کی جان و مال دہشت گردوں کے رحم و کرم پر ہے، حکمران ملک میں عدل و انصاف کے قیا م میں مسلسل ناکام نظر آتے ہیں ،معاشرتی بے تفاودگی کے خاتمے کیلئے سیر ت نبی کریم حضرت محمد مصطفیٰ ﷺ پر عمل پیرا ہو نے کی ضرورت ہے ، امت مسلمہ کے درمیان اتحاد و یگانگت کی جتنی ضرورت آج ہے پہلے کھبی نہیں تھی، دشمنان اسلام امت مسلمہ کے درمیان موجود معمولی اختلافات کو ہوا دے کر اپنے مضموم عزائم کی تکمیل چاہتا ہے ۔
ایم ڈبلیو ایم کے صوبائی رہنما عالم کربلائی نے شرکائے اجلاس کو بتایا کہ کراچی کے مختلف علاقوں میں جلوس عید میلاد البنی ﷺ کے دوران استقبالیہ کیمپ اور سبیلیں لگائی جائیں گی،مرکزی استقبالیہ کیمپ نمائش چورنگی جب کے انچولی ،نارتھ کراچی ، عباس ٹاؤن ،گلشن اقبال، بھٹائی آباد، ملیر ، جعفر طیار سوسائٹی،کھوکراپار ،اسٹیل ٹاؤن ، کورنگی، لانڈھی برف خانہ ، شاہ فیصل کالونی، پہلوان گوٹھ اور دیگر علاقوں میں استقبالیہ کیمپ اور سبیلیں بھی لگائی جائیں گی ۔
