وحدت نیوز(بھٹ شاہ) حضرت شاہ عبدالطیف کی سرزمین بھٹ شاہ میں مجلس وحدت مسلمین سندھ کے زیر اہتمام بیداری امت و استحکام پاکستان کانفرنس سے خطاب کرتے ہوئے مجلس وحدت مسلمین پاکستان کے سربراہ علامہ راجہ ناصر عباس جعفری کا کہنا تھا کہ ہر محب وطن کو ملک دشمن قرار دینے کی روش کوختم کرنا ہوگا،ریاستی اداروں کو ماضی سے سبق سیکھتے ہوئے اپنی پالیسیوں میں تبدیلی لانا ہوگی،ہمیں اپنے ملک کی سلامتی و استحکام کے لئے کام کرنے کی ضرورت ہے 34 رکنی اتحاد میں شامل ہونے کے نتائج افغان جہاد سے بد تر ثابت ہونگے،حکمرانوں کی ناکام خارجہ پالیسی قوم کی رسوائی کا سبب بن رہی ہے،پاک چائنہ اقتصادی راہ داری پاکستان کی معاشی شہ رگ ہے اس کے خلاف کسی سازش کو برداشت نہیں کریں گے،انہوں نے کہا کہ سندھ بھر میں موجود کالعدم تکفیری مدارس کے خلاف آپریشن کا نہ ہونا سندھ حکومت اور شرپسندوں کے گٹھ جوڑ کو ثابت کرتا ہے،ان نا اہل مورثی سیاست دانوں نے غربت افلاس اور محرومیاں سندھ کے باسیوں کا مقدر بنا دی ہیں،سندھ کے مظلوم عوام قیام پاکستان سے لے آج تک جاگیرداروں اور وڈیرہ شاہی کے ظلم ستم کا شکار ہے،تھر میں قحط سالی سے ہونے والے اموات انسانیت اور ان ظالم صفت حکمرانوں کے ماتھے پر کلنک کا ٹیکہ ہے،ان کا کہنا تھا کہ مجلس وحدت مسلمین مظلوموں اور محروموں کے حقوق کی جدو جہد سےکسی صورت دستبردار نہیں ہوگی،بھٹ شاہ کے عوام نے گذشتہ ضمنی الیکشن میں ایم ڈبلیوایم پر جس اعتماد کا اظہار کیا ہم اس پر شکر گذار ہیں۔انہوں نےکہا کہ ہمارے حکمرانوں نے ملک بھر میں تکفیریوں کے لشکر تشکیل دیئے، لیکن ہم ان کے مقابلے میں کھڑے ہوئے اور ان کے عزائم کو شکست دی، وحدت مسلمین ہمارے شعور، بیداری،بصیرت اور فہم کا نام ہے، ظالم چاہے جرنیل ہو یا سیاستدان، حکمران ہو جج ہو یا ملا ہم اس کے دشمن ہیں، امریکہ کے ساتھ مل کر بھارت سے پاکستان کی سرزمین پر بمباری کروانے والے را کے ایجنٹ ہیں، مودی کو بغیر ویزا پاکستان بلانے والے را کے ایجنٹ ہیں، بھارت کے ساتھ بزنس کرنے والے را کے ایجنٹ ہیں، ہم را کے ان تمام ایجنٹوں کو بے نقاب کرتے ہیں، انشاء اللہ جب تک زندہ ہیں کسی پاکستان دشمن کو یہ اجازت نہیں دیں گے کہ وہ وطن کی سالمیت سے کھیلے۔انہوں نے کہا کہ استعماری گماشتوں کی ایماءکی تشکیل کردہ تحفظ خواتین بل قرآن وسنت کی سریحاًمنافی ہے۔مسلم لیگ ن امریکہ ، اسرائیل اور برطانیہ کی خوشنودی کی خاطر قانون الہٰی میں تبدیلی کےگناہ کے مرتکب ہو رہی ہے ۔

وحدت نیوز(بھٹ شاہ) سندھ کے معروف صوفی بزرگ حضرت شاہ عبدالطیفؒ بھٹائی کے مزار کے سائے تلے مجلس وحدت مسلمین صوبہ سندھ ضلع مٹیاری کے تحت عظیم الشان بیداری امت واستحکام پاکستان کانفرنس منعقد کی گئی ، گذشتہ ضمنی الیکشن  میں دوسری بڑی سیاست قوت قرار پانے کے بعد ملاکھڑا گرائونڈمیں موجود یہ عوامی سمندروڈیرہ شاہی اور جاگیرداری نظام کے خلاف ایم ڈبلیوایم کے حق میں ریفرنڈم ثابت ہوا،جس میں ایم ڈبلیوایم کے مرکزی سیکریٹری جنرل علامہ راجہ ناصرعباس جعفری سمیت مرکزی رہنما علامہ اعجاز بہشتی، علامہ باقرعباس زیدی، صوبائی رہنما علامہ مختارامامی، علامہ مقصودڈومکی، ضلعی رہنما علامہ اخترعلی شریعتی، علامہ علی انور جعفری، امام جمعہ ہالاعلامہ دوست علی سعیدی سمیت دیگر مقررین نے خطاب کیا،معروف انقلابی شاعرظفرعباس ظفر نے قائد وحدت علامہ راجہ ناصرعباس جعفری کی شان میں خصوصی کام بھی پیش کیا،جبکہ قدآوراسٹیج پر سندھ بھر سے آئے ہوئے سینکڑو ں علمائے کرام تشریف فرما تھے،سکیورٹی کے فرائض وحدت یوتھ کے رضاکاروں نے انجام دیئے،ملاکھڑا گرائونڈمیں منعقدہ جلسہ عام میں بھٹ شاہ، ہالا، مٹیاری، حیدرآباد ، ٹنڈومحمد خان، لاڑکانہ ، کراچی سمیت مختلف اضلاع سے ایم ڈبلیوایم کے کارکنان اور مردوخواتین کی بڑی تعداد شریک ہوئی،شرکاءکیلئے نیاز اور سبیل کا بھی مناسب انتظام کیا گیا تھا۔

اس موقع پرخطاب کرتے ہوئے ایم ڈبلیوایم کے سابق امیدوار برائے قومی اسمبلی سید فرمان علی شاہ کا ظمی نے کہا کہ اہلیان بھٹ شاہ کے ٹھاٹھے مارتے سمندرنے وڈیرہ شاہی اور جاگیرداری نظام کو یکسرمسترد کردیا ہے،ایم ڈبلیوایم نے ہمیشہ پسے ہوئے طبقے کے حقوق کیلئے آواز بلند کی ہے، کانفرنس سے علامہ مختار امامی ،علامہ مقصود ڈومکی،علامہ اعجاز بہشتی سمیت دیگر علمائے کرام اور عمائدین نے خطاب کرتے ہوئے دہشت گردی کے خلاف حکومتی اقدامات اور بیلنس پالیسی کے عمل کو شدید تنقید کا نشانہ بنایااور کہا کہ ریاستی ادارے قیام پاکستا ن سے آج تک ملت تشیع کی حب الوطنی پر شک کرتے ہیں ،درحقیقت ہم ہی پاکستان بنانے والے اور ہم ہی پاکستان بجانے والے ہیں ۔

وحدت نیوز (انٹرویو) اقرار حسین ملک مجلس وحدت مسلمین پاکستان کے مرکزی سیکرٹری روابط ہیں، اس کے علاوہ ایم ڈبلیو ایم کے سالانہ تنظیمی کنونشن کے چیئرمین بھی ہیں اور وہ اس وقت تنظیمی کنونشن کی تیاریوں میں مصروف ہیں، بنیادی تعلق دینہ سے ہے۔ آئی ایس او راولپنڈی ڈویژن میں 1990ء میں بطور ممبر رہے ہیں، اس کے علاوہ  دو سال شہید ڈاکٹر محمد علی نقوی کے زیرتربیت بھی رہے ہیں، یہی وجہ ہے کہ شہید ڈاکٹر محمد علی کی شہادت کے بعد سے ابتک ملی اور قومی سفر میں کسی نہ کسی شکل میں موجود رہے ہیں۔ اسلام ٹائمز نے اقرار حسین ملک سے تنظیمی کنونشن کی تیاریوں اور ایم ڈبلیو ایم کے 6 سالہ تنظیمی سفر پر ایک تفصیلی انٹرویو کیا ہے، جو پیش خدمت ہے۔ ادارہ

سوال : ایم ڈبلیو ایم اپنی تاسیس کی باضابطہ طور پر دوسری ٹرم مکمل کرنے جا رہی ہے، کیا سمجھتے ہیں کہ اب مجلس وحدت مسلمین کہاں کھڑی ہے، متعین کردہ اہداف میں کامیابی کا گراف کیا رہا ہے۔؟

اقرار حسین ملک: میں بہت مشکور ہوں کہ اسلام ٹائمز نے مجھے اس موضوع پر لب کشائی کا موقع دیا۔ آپ کے سوال کی طرف آتا ہوں، دیکھیں میں سمجھتا ہوں کہ قومیات چند سالوں یا برسوں کا نام نہیں ہے، قوم بنتے بنتے کئی دہائیاں درکار ہوتی ہیں، اس کیلئے کوئی ایک دو ٹرم کافی نہیں ہوتیں کہ آپ قوم کے تمام مسائل حل کرسکیں یا ہو جائیں، ہاں ہم نے جہاں سے سفر کا آغاز کیا تھا اس سے کہیں آگے بڑھ گئے ہیں، کئی امور میں کامیابی سمیٹی ہیں۔ مجلس کی کارکردگی اور کامیابیوں کا تجزیہ کرنے سے قبل اس بات کو مدنظر رکھنا ہوگا کہ اس کی تاسیس سے پہلے کیا صورتحال تھی، پاراچنار کا 3 سالہ محاصرہ، ڈیرہ اسماعیل خان میں ٹارگٹ کلنگ اور کراچی سمیت کوئٹہ کے حالات ایسے بن گئے تھے کہ یہ جماعت وجود میں آگئی، اس سے پہلے کوئی ایسی منظم سوچ موجود نہیں تھی کہ ہم نے کوئی جماعت بنانی ہے، تشیع کیخلاف ہونے والے مظالم کے خلاف جمع ہوئے، ریاست اور ریاستی اداروں کی چشم پوشی اور طالبان کو فری ہینڈ دینے کے خلاف ہم اکٹھے ہوئے، اس کے بعد سب اس نتیجے پر پہنچے کہ مکتب کی حفاظت اور اپنے حقوق کی بازیابی کیلئے اجتماعی سفر ناگزیر ہے، تب جا کر مجلس کے قیام کا فیصلہ ہوا۔

آپ نے دیکھا کہ گلگت بلتستان کے غیور فرزندوں کی ٹارگٹ کلنگ ہو اور سانحہ چلاس یا دوسرا سانحہ، اسی طرح ڈیرہ اسمعیل خان کے حالات ہوں یا پارہ چنار کی صورتحال، کوئٹہ میں ہزارہ شیعہ برادری کا قتل عام ہو یا پھر کراچی اور اندرون سندھ میں ہونے والے سانحات، ہر معاملے پر مجلس میدان میں نظر آئی ہے، مجلس نے سیاسی میدان میں آنے کا فیصلہ کیا تو عام الیکشن میں تجربات نہ ہونے کے باوجود ہم نے کوئٹہ سے ایک ایم پی اے کی نشست حاصل کی اور اس ممبر صوبائی اسمبلی کے کام دیکھیں تو اندازہ ہوگا کہ ایک وزیر بھی اتنے کام نہیں کرسکتا، جتنے اس اکیلئے بندے نے کئے ہیں۔ اسی طرح گلگت بلتستان میں الیکشن میں گئے، تمام حکومتی اور ریاستی مخالفت کے باوجود ہماری نمائندگی اسمبلی میں موجود ہے، اسی طرح مخدوم امین فہیم جہاں سے ہر بار جیتتے تھے اور ان کی رحلت کے بعد مجلس نے ضمنی الیکشن لڑا تو مخدوموں کو پہلی بار کسی جماعت سے پالا پڑا۔ ایم ڈبلیو ایم نے ضمنی الیکشن میں 17 ہزار ووٹ لیکر سب کو حیران کر دیا اور پیپلزپارٹی سمیت دیگر جماعتوں کیلئے خطرے کی گھنٹی بجا دی۔

یہ یاد رکھیں کہ اس ضمنی الیکشن میں نون لیگ، پی ٹی آئی اور ایم کیو ایم سمیت کسی قوم پرست جماعت نے حصہ لینے کی جرات تک نہیں کی۔ ہم سمجھتے ہیں کہ سفر جاری ہے اور مخلص رہنما اس فیلڈ میں آگے بڑھ رہے ہیں اور انشاءاللہ ایک دن ایک قوت بن کر دکھائیں گے۔ یاد رکھیں کہ جب مجلس کا قیام عمل میں آیا تھا تو ہمارے پیش نظر یہ تھا کہ قوم کو مایوسی سے نکالیں گے، اس کی دبی ہوئی آواز کو بلند کریں گے، اس قوم نے یہ صورت حال بھی دیکھی کہ چالیس پچاس جنازے اٹھے، لیکن کسی سیاسی جماعت نے تعزیت تک کرنا گوارہ نہ کی، کوئی ہمیں پوچھتا تک نہ تھا، حتیٰ میڈیا پاراچنار کے ایشو پر کوئی خبر چلاتا تھا تو اسے دوگرہوں کی لڑائی کرکے چلاتا تھا، کوئٹہ کے واقعات پر خبریں دبا دیتے تھے، لیکن اب ایسا نہیں ہے۔ میں یہ نہیں کہتا کہ ہم نے سب کچھ کر لیا ہے لیکن یہ ضرور کہتا ہوں کہ بہت حد تک ہم نے ایسے کام کئے ہیں، جس کی بنیاد پر قوم میں امید کی کرن جاگی ہے۔ اس لحاظ سے آپ کامیابیوں کے گراف کا جائزہ لے سکتے ہیں۔

سوال : ان چھ برسوں میں فلاحی اعتبار سے مجلس کہاں کھڑی ہے؟

اقرار حسین ملک: جی مجلس وحدت مسلمین نے اپنی تاسیس کے بعد خیرالعمل فاونڈیشن کا ادارہ بنایا ہے، جس نے ابتک اسپتالوں کے قیام، ڈسپنسریاں، سیلاب زدگان کیلئے گھروں کی تعمیر اور مساجد نیٹ ورک پر کام کیا ہے۔ الحمد اللہ یہ ادارہ اپنے اہداف کی طرف بڑھ رہا ہے، اس وقت یہ ادارہ ایک اچھی خاصی رقم اپنے فلاحی منصوبوں پر صرف کرچکا ہے، ان منصوبوں پر ابتک کتنی رقم صرف ہوئی ہے، اس کے صحیح اعداد و شمار خیرالعمل فاونڈیشن سے مل سکتے ہیں۔

سوال : آپکی جماعت دعویٰ کرتی ہے کہ ہم شہید قائد کا علَم لیکر آگے بڑھ رہے ہیں، شہید کی فکر پر کتنا کام کیا ہے؟

اقرار حسین ملک: جی میں یہاں یہ کہنا چاہوں گا کہ اس وقت تک ایم ڈبلیو ایم کی جتنی بھی فعالیت ہوئی ہے، اس کا رخ اور جہت شہید قائد کی فکر پر مشتمل ہے۔ شہید قائد نے مینار پاکستان پر قرآن و سنت کانفرنس کے موقع پر جو جہت دی تھی، ہم اسے لیکر آگے بڑھ رہے ہیں اور اپنے سفر کی جانب گامزن ہیں، اہداف کا گراف کبھی اوپر تو کبھی نیچے ہوسکتا ہے، اس کی وجہ حکومتوں کی تبدیلی، سکیورٹی صورتحال اور عالمی سطح پر ہونے والی تبدیلیاں ہیں۔ یقیناً یہ چیزیں آپ کی تنظیمی سرگرمیوں پر بھی اثرانداز ہوتی ہیں، اس کے علاوہ شہید قائد نے اتحاد و وحدت کیلئے جو علَم بلند کیا تھا، اسی وجہ سے انہیں شہید وحدت بھی کہا جاتا ہے، ہم اس کو لیکر آگے بڑھ رہے ہیں، ہم جہاں اتحاد بین المومنین کیلئے کوشاں ہیں، وہیں ہم نے اتحاد بین المسلمین کیلئے بھی کام کیا ہے، ہم نے تمام مذہبی جماعتوں سے رابطے بڑھائے ہیں، پاکستان میں پہلی بار عید میلاد النبی ﷺ کے موقع پر شیعہ سنی مشترکہ اجتماعات کا انعقاد کیا گیا، ہماری طرف سے سنی بھائیوں کے استقبال کیلئے استقبالیہ کمیپ لگائے گئے اور یہ پیغام دیا گیا کہ پاکستان میں کوئی شیعہ سنی مسئلہ نہیں ہے بلکہ ایک مختصر تکفیری ٹولہ ہے، جو دونوں کو نشانہ بنا رہا ہے۔ سیاسی حوالے سے شہید نے قرآن و سنت کانفرنس میں ایک دستور دیا، ہم اس پر بھی گامزن ہیں۔

سوال : اس بار کنونشن کو کیا نام دیا گیا ہے اور اسکے کیا اہداف مقرر کئے گئے ہیں؟

اقرار حسین ملک: جی اس بار ہم نے کنونشن کو ’’پیام وحدت‘‘ کا عنوان دیا ہے، ہم نے یہ نام مقامی اور عالمی حالات کے تناظر میں دیا ہے اور یہی رہبر معظم سید علی خامنہ ای کی فکر ہے اور ان کی تقاریر میں ملتا ہے، پیام وحدت سے مراد کہ اس ملک کے باسی ملکر رہنا چاہتے ہیں، ہم کسی تفرقے کے قائل ہیں اور نہ ہی کسی کو اجازت دینا چاہتے ہیں کہ اس ملک کے امن کو تہہ و بالا کر دے۔ ہماری جماعت کا نام بھی وحدت مسلمین ہے تو ہم وحدت کے داعی ہونے کے ناطے اس پر عمل پیرا ہیں۔ کنونشن میں فوکس داخلی وحدت کو کیا گیا ہے، اس حوالے سے تمام شیعہ جماعتوں کو مدعو کرنیکا سلسلہ جاری ہے۔ ہم نے تمام مدارس کو بھی اس حوالے سے مدعو کیا ہے۔ امید ہے کہ یہ کنونشن اتحاد و وحدت کیلئے اہم سنگ میل ثابت ہوگا۔

سوال: دعوتی عمل کہاں تک پہنچا ہے اور کونسی بڑی شخصیات کی شرکت متوقع ہے؟

اقرار حسین ملک: آئی ایس او، آئی او اور شیعہ علماء کونسل سمیت دیگر کئی جماعتوں کو دعوت دے رہے ہیں، اسی طرح شخصیات کی بات کریں تو شیخ محسن نجفی اور علامہ سید جواد نقوی صاحب ہیں۔ اسی طرح مدارس دینیہ سے تعلق رکھنے والے احباب ہیں، سب کو مدعو کر رہے ہیں، تقریباً 80 فیصد دعوتی عمل مکمل ہوچکا ہے۔ باقی اسی ہفتہ تک مکمل کرلیں گے۔ ہماری کوشش ہے کہ تمام شیعہ اسٹیک ہولڈرز کو کنونشن میں لائیں اور انہیں مدعو کریں، اس سے اتحاد بین المومنین کے حوالے سے اچھا پیغام جائیگا اور یہی قوم کے ہر فرد کا مطالبہ ہے۔ یہ کنونشن 8، 9 اور 10 اپریل کو اسلام آباد میں منعقد ہوگا۔ اس کا پروگرام مکمل کر لیا گیا ہے اور انتطامات اپنی حتمی شکل کی طرف جا رہے ہیں۔

سوال : شیعہ علماء کونسل کو بھی دعوت دے دی ہے یا ابھی دینا باقی ہے؟

اقرار حسین ملک: جی ہماری شیعہ علماء کونسل کے سیکرٹری جنرل علامہ عارف حسین واحدی صاحب سے دو مرتبہ ٹیلی فون پر بات ہوئی ہے، آجکل میں انہیں باضابطہ طور پر کنونشن کی دعوت دیں گے، کیونکہ وہ لاہور میں جامعۃ المنتظر میں ہونے پروگرام میں شریک تھے، جیسے ہی راولپنڈی پہنچیں گے تو ہم وفد کی صورت میں انہیں اور ان کی جماعت کو دعوتی کارڈ دیں گے۔

سوال: کنونشن کا بڑا ایونٹ کیا ہے؟

اقرار حسین ملک: دیکھیں، بنیادی طور پر یہ ایک تنظیمی کنونشن ہے، جس میں ملک بھر کے تمام اضلاع سے مرکزی شوریٰ کے ارکان شرکت کریں گے، اس بار کنونشن کی خاص بات یہ ہے کہ نئے سیکرٹری جنرل کا انتخاب عل میں لایا جائیگا۔ تین روزہ کنونشن کے اختتام پر ہماری عمومی نشست ہوگی، جس میں ہم نے ’’پیام وحدت‘‘ کانفرنس رکھی ہے، جس میں تمام تنظیموں اور شخصیات کو مدعو کیا گیا ہے اور اسی نشست میں ہی نئے سیکرٹری جنرل کا باضابطہ طور پر اعلان کیا جائیگا۔

سوال: کیا اس بار مجلس وحدت مسلمین نئی قیادت یا نیا چہرہ سامنے لائے گی؟
اقرار حسین ملک: دیکھیں یہ ایک جمہوری عمل ہے، مجلس کے ادارے موجود ہیں، دستور موجود ہے، جس میں نئے سیکرٹری جنرل کے چناو کا مکمل طریقہ کار موجود ہے، تمام صوبوں سے اور مرکزی کابینہ سے نئے سیکرٹری جنرل کے لئے نام شوریٰ عالی کو بھجوا دیئے گئے ہیں، اب یہ شوریٰ عالی کا اختیار ہے کہ وہ ان ناموں میں سے دو اور اپنی طرف سے ایک نام شامل کرکے تین نام مرکزی شوریٰ کو پیش کرے، اس کے بعد یہ اختیار شوریٰ مرکزی کے پاس چلا جاتا ہے کہ وہ اپنے ووٹ کی طاقت سے سیکرٹری جنرل کو چنیں۔ تو اس تمام صورتحال میں اس بارے میں کچھ بھی کہنا غلط اور قبل ازوقت ہوگا۔ ہم کہتے ہیں انتظار کیجئے اور دیکھیے کہ مجلس کے ادارے کیا فیصلہ کرتے ہیں۔ وہ جو بھی فیصلہ کریں گے، اچھا فیصلہ کریں گے۔

وحدت نیوز(پشاور) امام بارگاہ لعل شاہ کے متولی سید رضی الحسن شاہ ایڈووکیٹ کو دن دیہاڑے مین بازار میں شہید کر دیا گیا۔ واقعہ کی شدید الفاظ میں مذمت کرتے ہوئے مجلس وحدت مسلمین صوبہ خیبر پختونخوا کے سیکرٹری جنرل علامہ سبطین حسینی نے کہا ہے کہ پاک فوج واقعہ کا فوری نوٹس لیتے ہوئے دہشت گردوں کو خصوصی عدالتوں سے قرار واقعی سزائیں دلائے۔ انہوں نے کہا کہ گذشتہ کافی عرصہ سے ڈی آئی خان شہر ایک مرتبہ پھر دہشت گردوں کے رحم و کرم پر ہے، گذشتہ تین ایام کے دوران دو شیعہ مسلمانوں کو ٹارگٹ کرکے شہید کیا جا چکا ہے، جوان سال ستائیس سالہ امام بارگاہ کے متولی اور ایڈووکیٹ کی ٹارگٹ کلنگ، اداروں کے منہ پر زور دار طمانچہ ہے۔ یوم القدس کے جلوس پر پابندی لگانے والی انتظامیہ جس نے اس جلوس کی پاداش میں ہمارے کارکنان پر پرچے کاٹے، دہشت گردوں کو گرفتار کرنے میں کیوں ناکام ہے۔ قاتل دندناتے پھرتے ہیں، فوج نے شہر کے امن کو بحال کیا تھا، اب دوبارہ فوج ایکشن لے، سول اور صوبائی حکومت سے کوئی امید نہیں ہے، یہ انصاف کے نام پر انصاف کا قتل کر رہے ہے۔

وحدت نیوز (کراچی) مجلس وحدت مسلمین کراچی کی انتھک کوششوں کہ نتیجے میں گذشتہ روز سندھ حکومت کی جانب سے مرکز سادات امروھہ میں منعقدہ ایک تقریب کہ دوران 85 خانوادہ شہداء ملت جعفریہ میں 17ملین روپے کے چیکس تقسیم کیے گئے ۔

تفصیلات کے مطابق کراچی کے خانوادہ شہداء میں امدادی رقوم کی تقسیم کی تقریب میں صوبائی وزیرخوراک سید ناصر حسین شاہ مہمان خصوصی تھے، جبکہ دیگرمہمانان گرامی میں مشیر وزیراعلی سندھ وقار مہدی و راشد ربانی، مجلس وحدت مسلمین کہ مرکزی رہنما علامہ سید  باقر عباس زیدی، علامہ سیداحمد اقبال رضوی شامل تھے،مذکورہ مہمانان گرامی سمیت سید علی حسین نقوی  ، مولانا احسان دانش، مولانا صادق جعفری، مبشرحسن،سجاد اکبر، احسن عباس رضوی، زین رضا نے خانوادہ شہداءمیں امدادی رقوم کے چیک تقسیم کرنے کی سعادت حاصل کی۔

واضح رہے کہ  یہ چیکس اُن شہداءکے خانوادگان کے درمیاں تقسیم کیئے گئے ہیں جو کراچی میں کالعدم تکفیری و سیاسی جماعت کے دہشتگردوں کے ہاتھوں ٹارگٹ کلنگ کے نتیجہ میں شہید ہوئے، ایم ڈبلیوا یم کے ترجمان نے بتایا کہ 85 شہدائے ملت جعفریہ کے خانوادوں میں 17ملین روپےکےامدادی چیکس صوبائی حکومت کی جانب سے تقسیم کئے گئے ہیں جسکا وعدہ انہوں نے مجلس وحدت مسلمین کی قیادت کی جانب سے ڈیڑھ برس قبل سی ایم ہائوس کے باہر خانوادہ شہداءکے احتجاجی دھرنے کے اختتام پر کیا تھا۔

 شہداء کہ خانوادوں میں کئی سال سے معطل شدہ امدای رقوم کی تقسیم مجلس وحدت کراچی کی انتھک محنت کا نتیجہ ہے اس سے ان شہداءکے خانوادوں کا مکمل قرض تو نہیں ادا ہوسکے گا تاہم معاشی مشکلات کے شکار وارثان شہداءکے دکھوں کاکچھ مداواممکن ہو سکے گا،تو ہمیں خوشی ہوگی،خانوادہ شہداءکی امدادی رقوم کی بحالی میں ایم ڈبلیوایم کراچی ڈویژن کے رہنماسید رضا نقوی، علی حسین نقوی اورمیثم عابدی نے شب وروز کوششیں انجام دیں ، ایسا کہنا تھا ترجمان ایم ڈبلیو ایم آصف صفوی کا، انہوں نے مزید کہا کہ شہدائے ملت جعفریہ کے خانوادے ہماری عزت اور سروں کا تاج ہیں۔

وحدت نیوز (کوئٹہ) مجلس وحدت مسلمین کوئٹہ ڈویژن کے ڈپٹی سیکریٹر ی جنرل علامہ ولایت حسین جعفری نے کہا ہے کہ اگر ہمیں ملک کو ترقی کی راہ میں چلتا دیکھنا ہے اور اگر ہم خوشحالی کے خواہاں ہیں تو ہمیں اجتماعی مفاد کو انفرادی مفاد پر ترجیح دینا ہوگی، جب کسی معاشرے کا ہر فرد خود غرضی اور مفاد پرستی میں مبتلا ہو جاتا ہے تو اس معاشرے کا انجام بربادی اور ترقی سے محرومیت کی صورت میں ہمارے سامنے آجاتی ہے۔ آج ہمارے زوال کی بڑی وجہ ہماری خود غرضی اور مفاد پرستی ہے۔ ہمارے ملک میں بہت سی برائیاں موجود ہے جن میں خودغرضی ، بدعنوانی ، حرص و ہوس، مفاد پرستی، عیاری و چالاکی، بے علمی غرض اور دیگرتمام اخلاقی برائیاں شامل ہے ، اسکے علاوہ بدعنوانی اور رشوت ستانی ایک خطرناک بیماری ہے اور یہ تمام عناصر وطن عزیز میں جرائم کو جنم دے رہی ہیں۔ملک کا حال ایسا ہے کہ لوگ نہ سرکاری ہسپتالوں میں دلچسپی رکھتے ہیں اور نہ سرکاری اداروں میں ، اگر انہیں کسی چیز میں دلچسپی ہے تو وہ سرکاری نوکری ہے اور کبھی کبھار اس کے حصول کیلئے بھاری رقم رشوت کی صورت میں دیا جاتا ہے۔

انہوں نے مزید کہاکہ فرد کی اخلاقی حالت کو سدھارے بغیر محض قانون سازی اور جمہوری اداروں کی بحالی اور بالا دستی سے ہم اپنی قومی اور اجتماعی حالت کو تبدیل نہیں کرسکتے۔ ظلم و اتحصال اور طرح طرح کے زمینی و آسمانی مصائب اور آفات ایسے ہی معاشرے کا مقدر بنتے ہیں جہاں فرد کا کردار بگڑ جائے اور اعلیٰ اخلاقی اقدار و صفات سے محروم ہوجائے۔ ہم دوسروں کا احتساب تو چاہتے ہیں لیکن خود اپنا احتساب کرنے کے لیے تیار نہیں۔ اگر سوچنے اور فکر کرنے کو روک دیا جائے تو معاشرے کی عمومی صورتحال یہ ہو جاتی ہے کہ سب ایک دوسرے کو موردالزام ٹھہراتے ہیں اور ایک دوسرے پر انگلیاں اٹھاتے ہیں ۔ لہذا ہمیں چاہیے کہ ذاتی مفاد کو قومی مفاد پر قربان کردیں۔ اس ایثار و قربانی کے نتیجے میں رفتہ رفتہ معاشرے و ملک کی حالت دسدھرتی جائے گی۔