وحدت نیوز(اسلام آباد) مجلس وحدت مسلمین پاکستان کے سربراہ علامہ راجہ ناصرعباس جعفری نے کورونا وائرس کےباعث ملک میں پیدا شدہ بحرانی کیفیت میں حکومت سے عوام کیلئے خصوصی ریلیف پیکج کا مطالبہ کردیا ہے ، مرکزی میڈیا سیل سے جاری بیان میں انہوںنے کہاکہ کرونا وائرس کی وباء سے ملک بحرانی صورتحال سے گزر رہا ہے۔کورونا وائرس کی وباء سے بچاو کیلئے ملک کے مختلف شہروں میں کاروبار زندگی بند ہوا ہے۔حکومت عوامی ریلیف پیکج کا اعلان کرے۔

انہوں نے کہاکہ حکومت ملکی عوام کو گیس ،بجلی بل نہ ادا کرنے کا ریلیف فراہم کرے۔حکومت ذخیرہ اندوز و منافع خور مافیا کے خلاف بھر پور کاروائی کرے۔ملک میں اشیا خورد و نوش کی مصنوعی قلت پیدا کرنے کی کوشش کی جا رہی ہے۔ عوام کو چاہیے کہ وہ ذخیرہ اندوز عناصر پر بھی کڑی نظر رکھیں۔

علامہ راجہ ناصرعباس جعفری نے کہاکہ ملک میں آٹا، صابن سمیت گھریلو استعمال کی مختلف اشیاء کی دستیابی کو یقینی بنانا حکومتی ذمہ داری ہے،حکومت منافع خور اورموقعہ پرست مافیا کے خلاف حکمت عملی تر تیب دے ۔ کرونا وائرس حکومت کے ساتھ ساتھ عوام سے بھی ذمہ دارنہ طرز عمل کا تقاضہ کرتا ہے۔وفاقی حکومت عوام کو مفت غذائی اجناس فراہم کرکے سہولیات فراہم کرے۔

وحدت نیوز(اسلام آباد) کرونا وائرس کے پھیلاؤ کو روکنے اور اس سے متعلق عوام میں شعور پیدا کرنے کے لیے مجلس وحدت مسلمین پاکستان نے میدان عمل میں آنے کا اعلان کر دیا ہے۔

ایم ڈبلیو ایم کے مرکزی ترجمان علامہ مقصود ڈومکی نے کہا ہے کہ مرکزی سیکرٹری جنرل علامہ راجہ ناصر عباس جعفری کی ہدایت پر ایم ڈبلیو ایم کی کابینہ نے مرکزی ڈپٹی سیکرٹری جنرل سید ناصر شیرازی کی سربراہی میں ایک کمیٹی تشکیل دی ہے جس کا مقصدکرونا وائرس سے بچاؤ اور علاج کے لیے علاقائی سطح پر آگاہی مہم چلانا ہے۔

صوبائی و ضلعی سیکرٹری جنرلز اس کمیٹی کے اراکین میں شامل ہوں گے۔کمیٹی کے زیر اہتمام لوگوں کے گھروں اور دیگر مقامات پر آگہی لٹریچر تقسیم کیا جائے گا تاکہ کرونا وائرس کے پھیلاؤ کا سدباب کیا جا سکے۔

ایم ڈبلیو ایم کے ترجمان نے کہا ہے کہ کرونا وائرس ایک عالمی وبا کی شکل اختیار کر گئی ہے جس سے نمٹنے کے لیے حکومت اقدامات کے ساتھ ساتھ عوامی کردار کی بھی اشد ضرورت ہے۔انہوں نے کہا کہ کرونا وائرس کے نام پر سیاسی و مسلکی تعصب کو ہوا دینے والوں کی عقل پرحیرت ہوتی ہے۔یہ وقت تقسیم ہونے کی بجائے متحد ہو کر قوم کو ایک مشکل سے نکالنے کا ہے۔

 انہوں نے کہا کہ مجلس وحدت مسلمین نے ہر مشکل گھڑی میں بلاتخصیص مذہب و مسلک ملک و قوم کی  بے لوث جذبے کے ساتھ خدمت کی ہے۔جب تک اس وبا کا ملک سے مکمل خاتمہ نہیں ہوتا تب تک ہم سکون سے نہیں بیٹھیں گے۔

وحدت نیوز (سکردو) مجلس وحدت مسلمین پاکستان گلگت بلتستان کے سیکرٹری جنرل آغا علی رضوی نے ڈی جی ہیلتھ اور ڈائیریکٹر ہیلتھ بلتستان سے انکے دفتر میں ملاقات کی۔ ملاقات کے دوران کرونا کیخلاف محکمہ صحت اور ضلعی انتظامیہ کی جانب سے اٹھائے جانے والے ہنگامی اقدامات بلخصوص ڈاکٹر حضرات اور پیرامیڈیکس کی جانب سے اپنی جانوں کی پرواہ کیے بغیر دن رات ایک کرکے کی جانے والی خدمات پر خراج تحسین پیش کیا اور شکریہ ادا کیا۔ انہوں نے کہا اسی جانفشانی کے ساتھ سرگرمی جاری جاری تو اس وبا کے ساتھ دیگر امراض بھی ختم ہوجائیں گے۔ انہوں نے کہا قرنطینہ میں موجود زائرین کی صحت، خوراک، انتظام اور انکی عزت و تکریم کا خصوصی خیال رکھا جائے اور تفتان میں ہونے والی بدسلوکی کے ازالے کی کوشش کی جائے۔

 انہوں نے محکمہ صحت سے ہر طرح کے تعاون کی یقین دہانی کرتے ہوئے کہا کہ مجلس وحدت مسلمین کے رضاکار بھی ہمہ خدمات کے لیے تیار ہیں۔ اسوقت بلتستان میں ماسک کی کمی کی شکایت پر رضا کاروں نے دیسی( ہوم میڈ) ماسک بنانا شروع کیا ہے۔ محکمہ صحت کو سینکڑوں کی تعداد میں ابتدائی طور پر ماسک فراہم کیا جائے گا۔ سنیٹائزر بنانے کے لیے بھی ماہرین موجود تھے لیکن شہر میں مطلوبہ کیمیکلز کی کمی کے باعث فوری طور ممکن نہیں ہوسکا۔ عوام الناس کو تمام فلاحی اداروں اور تنظیموں سے بھی گزارش کر رہے ہیں کہ جو معاونت جن جن سے ہوسکتی ہے وہ جاری رکھیں اور آگے بڑھیں۔ اس مہلک وبا سے سب نے ملکر لڑنا ہے اور عوام کو احتیاطی تدابیر پر خصوصی توجہ دینے کی ضرورت ہے۔ آغا علی رضوی کی جانب سے بھرپور تعاون کی یقین دہانی پر محکمہ کے سربراہان نے شکریہ ادا کیا۔

وحدت نیوز(سکردو)مجلس وحدت مسلمین پاکستان گلگت بلتستان کے سیکرٹری جنرل آغا علی رضوی کی خصوصی ہدایت پر بلتستان ریجن میں کرونا کیخلاف مختلف اقدامات کے لیے  ایک کمیٹی قائم کر دی ہے۔ اس کمیٹی کے فوکل پرسن ایم ڈبلیو ایم کے رہنما کاظم میثم ہونگے جبکہ ڈاکٹر عرفان کو ان کا معاون خاص نامزد کیا گیا ہے۔ مذکورہ کمیٹی کرونا کیخلاف اٹھانے جانے والے اقدامات بلخصوص زائرین کی خدمت، محکمہ صحت اور انتظامیہ کے ساتھ معاونت اور آگاہی مہم سمیت دیگر ضروری اقدامات اٹھائے گئے۔

اس کمیٹی میں الہدی فاونڈیشن کے چیئرمین علی احمد نوری اور ایم ڈبلیو ایم کے رہنماء مولانا رسول میر رضاکاروں کی سربراہی کریں گے۔

آغا علی رضوی اور شیخ احمد علی نوری کی سربراہی میں روزانہ بنیادوں پہ اس وبا کو شکست دینے اور عوام کی جانوں کی حفاظت کو یقینی بنانے کے لیے اجلاس ہوں گے اور اقدامات اٹھائے جائیں گے۔

 آغا علی رضوی نے اپنے پیغام میں کہا ہے کہ مجلس وحدت مسلمین کے تمام کارکنان رضاکارانہ خدمات کے لیے تیار رہیں اور محکمہ صحت کی ہدایت پر عمل کرتے ہوئے عوام میں آگاہی پھیلائیں۔ انفرادی سطح پر عوام دعا بھی کریں، اجتماعات اور گیدرنگ سے سے بچیں، ساتھ ہی صحت کے ماہرین کی ہدایات پر عمل پیرا ہوں۔

وحدت نیوز(سکردو) مجلس وحدت مسلمین گلگت بلتستان کے سربراہ آغا علی رضوی کی قیادت میں ایک وفد نے کمشنر بلتستان ریجن سے ملاقات کی۔ملاقات میں کورونا وائرس کے بچاو کے لیے ملک بھر میں اٹھانے جانے والے اقدامات کے نتیجے میں آنے والی مشکلات بلخصوص پنڈی اسلام آباد  سے سکردو آنے والے مسافرین کے لیے ناکافی ٹرانسپورٹ اور بلتستان میں قرنطینہ میں رکھنے والے محترم ذائرین کے تحفظات اور شکایات سے بھی آگاہ کیا۔

 آغا علی رضوی نے کہا کہ رستے میں موجود زائرین کو باعزت طریقے سے بھرپور سہولیات کے ساتھ بلتستان پہنچایا جائے۔  انہوں نے کہا کہ قرنطینہ میں موجود تمام زائرین کو بھرپور سہولتیں دی جائیں بلخصوص انکو دئے جانے والی طبی سہولت، بجلی کی فراہمی اور اشیائے خوردو نوش  میں کسی قسم کی شکایت برداشت نہیں کی جائے گی، نیز انکی عزت و احترام انکے ساتھ مشفقانہ اور تکریمانہ برتاو کو ہر صورت میں یقینی بنائی جائے۔ قرنطینہ میں موجود زائرین، ہوٹل انتظامیہ، ڈیوٹی پر مامور پیرامیڈیکل سٹاف اور پولیس اہلکار کے لیے بھی ماسک،دستانے اور دیگر حفاظتی ضروریات کو یقینی بنایا جائے۔

آغا علی رضوی نے کہا کہ اس مہلک مرض کے خلاف زائرین کی قربانیاں قابل تعریف ہیں علما،سماجی کارکنان،عمائدین،جوان اور عوام حفاظتی اقدامات کے لیے ہمہ وقت تیار ہیں اور اس چیلنج سے پوری قوم کو مل کر نمٹنا ہوگا۔

وحدت نیوز(ملتان) مجلس وحدت مسلمین پاکستان کے سیکرٹری جنرل علامہ راجہ ناصر عباس جعفری کی خصوصی ہدایت پر ایم ڈبلیو ایم جنوبی پنجاب کے سیکرٹری جنرل علامہ اقتدار حسین نقوی رات گئے وفد کے ہمراہ ملتان میں زائرین کے لیے قائم کیے گئے قرنطینہ سنٹر پہنچ گئے، زائرین کی رہائش گاہ کا جائزہ لیا، اس موقع پر ایڈیشنل ڈپٹی کمشنر طیب خان نے اُنہیں قرنطینہ سنٹر کے حوالے سے مکمل بریفنگ دی۔

 اس موقع پر مجلس وحدت مسلمین جنوبی پنجاب کے ڈپٹی سیکرٹری جنرل سلیم عباس صدیقی، علامہ قاضی نادر حسین علوی، سیکرٹری سیاسیات مہر سخاوت علی، ثقلین نقوی، ضلعی سیکرٹری جنرل مرزا وجاہت علی، قیصر عباس، فخر نسیم، ڈویژنل صدر آئی ایس او ملتان شہریارحیدر اور دیگر بھی موجود تھے۔

 علامہ اقتدار نقوی نے قرنطینہ سنٹر میں زائرین کی رہائش گاہ کا جائزہ لیا اور اطمینان بخش قراردیا، ایڈیشنل ڈپٹی کمشنر طیب خان نے اپنی بریفنگ میں بتایا کہ زائرین ہمارے بھائی ہیں اور ملتان میں ان کے لیے بہتر اقدامات کیے گئے ہیں، تمام زائرین کو الگ الگ کمروں میں رکھا گیا ہے اور اُن کی ضروریات کو مدنظر رکھتے ہوئے مکمل انتظامات کیے گئے ہیں۔

اُنہوں نے مزید کہا کہ بارہ سو سے زائد زائرین کی رہائش اور طعام کا اہتمام کیا گیا ہے، اس کے علاوہ بچوں اور خواتین کا خصوصی اہتمام کیا گیا ہے، طیب خان کے مطابق زائرین کے لواحقین کے لیے بھی خصوصی جگہ بنائی گئی ہے، علامہ اقتدار حسین نقوی نے کہا کہ سکھر اور ڈیرہ غازیخان کی نسبت ملتان میں زائرین کے لیے بہتر اقدامات کیے گئے ہیں، ہم اُمید کرتے ہیں کہ جس طرح سکھراور ڈیرہ غازیخان میں زائرین کے ساتھ سلوک کیا گیا ہے اس طرح کا ملتان میں نہیں ہوگا۔