The Latest
وحدت نیوز (مظفرآباد /اسلام آباد) ملت تشیع کے منظم نسل کشی کے خلاف مجلس وحدت مسلمین کا احتجاج گیارہ روز سے جاری ، مطالبات پورے ہونے تک احتجاج جاری رہے گا، مجلس وحدت مسلمین آزاد کشمیر میڈیا سیل سے جاری تفصیلات کے مطابق مجلس وحدت مسلمین کے اعلیٰ سطحی وفدنے قائد وحدت سربراہ مجلس وحدت مسلمین پاکستان علامہ راجہ ناصر عباس جعفری سے ملاقات کی ، بھوک ہڑتال کیمپ جو کہ اسلام آباد میں 11روز سے جاری ہے میں علامہ تصور جوادی نے کابینہ اراکین کے ہمراہ شرکت کی ۔ اور قائد وحدت علامہ راجہ ناصر عباس جعفری سے ملاقات کی ، اس موقع پر گفتگو کرتے ہوئے ریاستی سیکرٹری جنرل مجلس وحدت مسلمین پاکستان آزاد جموں و کشمیر علامہ سید تصور حسین نقوی الجوادی نے کہا کہ ہم سلام پیش کرتے ہیں قائد وحدت کی جدوجہد کو ، ان کی استقامت و حوصلے کو کہ جو نہ صرف ملت تشیع بلکہ سنی ، دیوبندی، اہلحدیث ، ہندو ، سکھ ، عیسائی جس پر بھی ظلم ہوا ہے اس کی آواز بن کر بیٹھے ہیں ، ہر ظالم کے خلاف ہیں اور ہر مظلوم کے حامی ہیں اس نعرے کو عملی جامہ پہنایا ہے، ہمارا احتجاج ہمارے مطالبات پورے ہونے تک جاری رہے اور وقت گزرنے کے ساتھ اس میں مزید شدت آتی جائے گی ، کسی طور پر اب پیچھے نہیں ہٹیں گے میدان میں موجود رہ کر ظالم کا مقابلہ کریں گے ، ظالم چاہے جو بھی ہو اس کا عبرتناک انجام چاہتے ہیں۔ ڈیرہ اسماعیل خان ، پارہ چنار اور کراچی میں ہونے والے ہمارے پروفیشنلز کے قاتلوں کو جلد تختہ دار پر دیکھنا چاہتے ہیں ، ہم اپنے حق کے لیے لڑیں گے جدوجہد کریں گے ۔ آخری دم تک مظلوموں و محروموں کے ساتھ کھڑے رہنا ہماری کمنٹمنٹ ہے ۔ انہوں نے مزید کہا کہ ظالم جو بھی کر لے ہمارے اپنے مقصد و مشن سے پیچھے نہیں ہٹا سکتا ، انشاء اللہ ظالم کا انجام قریب ہے۔
وحدت نیوز(اسلام آباد) پاکستان پیپلز پارٹی کے سینیئر رہنما ندیم افضل چن اور سابق ڈپٹی سپیکر قومی اسمبلی فیصل کریم کنڈی نے مجلس وحدت مسلمین پاکستان کے سربراہ علامہ راجہ ناصر عباس جعفری سے ایم ڈبلیو ایم کے احتجاجی کیمپ میں ملاقات کی اور اپنی مکمل حمایت کا اعلان کیا۔ بعدازاں میڈیا سے خطاب کرتے ہوئے ندیم افضل چن نے کہا کہ ایم ڈبلیو ایم کا ہڑتالی کیمپ ملک کے ہر اس باشعور فرد کی ترجمانی کرتا ہے جو ملک میں جبر و ظلم کے خلاف ڈٹ جانے کا حوصلہ رکھتا ہے۔ مذہبی تنگ نظری اور دہشت گردی کے خلاف پاکستان پیپلز پارٹی کا موقف بالکل واضح ہے۔ دہشتگردوں کے سہولت کار ملک و قوم کے غدار ہیں۔ اس ظلم و بربریت کے خلاف ہم اپنی سوچ، نظریہ اور افرادی قوت کے ساتھ علامہ راجہ ناصر عباس کے ساتھ کھڑے ہیں۔ نیشنل ایکشن پلان پر عمل نہ ہونے کی وجہ سے شیعہ کمیونٹی کے پڑھے لکھے طبقے اور مختلف شعبوں کے ماہرین کو ٹارگٹ کلنگ کا نشانہ بنایا جا رہا ہے۔
مجلس وحدت مسلمین کے سربراہ علامہ راجہ ناصر عباس جعفری نے دونوں سیاسی رہنماوں کی آمد پر شکریہ ان کا ادا کیا۔ انہوں نے کہا کہ قوم کو کمزور کرنے کے لئے اسے گروہ در گروہ تقسیم کیا جا رہا ہے، حتی کہ مقتولوں کی شناخت بھی مذہب و مسلک کے ساتھ نتھی کی جا رہی ہے۔ ہندو، عیسائی، سکھ اور مسلمانوں سمیت کوئی بھی قتل ہو، یہ انسانیت کا قتل ہے، ہم اس ظلم کے خلاف ہیں۔ ان کا مزید کہنا تھا کہ حکمرانوں کی ناکام پالیسیاں اس ملک کی تباہی کا باعث بنی ہوئی ہیں۔ ظلم، ناانصافی، ریاستی جبر اور حکومتی اداروں کا اختیارات سے تجاوز قومی بدحالی کا بنیادی سبب ہے۔ ہم نے انصاف کے حصول اور قومی سلامتی کے لئے جو مطالبات پیش کر رکھے ہیں، ان پر جب تک عمل درآمد نہیں ہوتا، تب تک ہمارا احتجاج جاری رہے گا۔
وحدت نیوز (پشاور) مجلس وحدت مسلمین پاکستان کے ایک اعلٰی سطح کے وفد نے مرکزی ڈپٹی سیکرٹری جنرل مولانا احمد اقبال رضوی کی قیادت میں وزیراعلٰی خیبر پختونخوا پرویز خٹک سے وزیر اعلٰی ہاوس پشاور میں اہم ملاقات کی۔ ملاقات میں صوبائی وزراء مشتاق غنی اور علی امین گنڈا پور بھی موجود تھے جبکہ مجلس وحدت کے مرکزی رہنما ناصر عباس شیرازی، اسد نقوی، آغا اقبال بہشتی، رکن بلوچستان اسمبلی آغا محمد رضا اور آغا سبطین حسین الحُسینی بھی موجود تھے۔ اس موقع پر آئی جی ناصر خان درانی، ہوم سیکرٹری، ہنگو، ڈیرہ اسماعیل خان، پشاور اور ہزارہ جات سے تعلق رکھنے والے اراکین صوبائی اسمبلی اور دیگر اعلٰی حکام بھی موجود تھے۔ ملاقات میں شہداء کے قاتلوں کی فوری گرفتاری، کیسز کی پیروی، اہم کیسز کو ملٹری کورٹس میں بھیجنے، شہداء کے خانوادوں کی مالی کفالت اور لواحقین کو ملازمتوں کی فراہمی سمیت اہم موضوعات پہ اتفاق کیا گیا، وزیر اعلیٰ نے صوبے بھر میں ملت جعفریہ کو درپیش مسائل کے حل کیلئے پانچ رکنی کوآرڈینشن کمیٹی کے قیام کی بھی منظوری دی جس میں صوبائی وزیر مشتاق غنی، علی امین گنڈہ پور، ایک رکن اسمبلی اور ایم ڈبلیوایم کی جانب سے ناصرشیراز ی اور اسد نقوی شامل ہوں گے، پرویز خٹک نے ایم ڈبلیوایم وفد کو یقین دہانی کرائی کے آئندہ اپیکس کمیٹی کے اجلاس میں شیعہ ٹارگٹ کلنگ سے متاثرہ علاقوں میں آپریشن اور شیعہ ٹارگٹ کلنگ کے کیسز کو ملٹری کورٹ بھیجنے کی سفارش بھی کی جائے گی۔
یاد رہے کہ تین روز قبل پاکستان تحریک انصاف کے سربراہ عمران خان نے بھوک ہڑتال پر بیٹھے ہوئے علامہ راجہ ناصر عباس جعفری سے ملاقات میں ان کو یقین دلایا تھا کہ خیبر پختونخوا کی حکومت انکی شکایات فوری طور پر دور اور قاتلوں کی گرفتاریوں کو یقینی بنائے گی اور آج وزیراعلٰی پرویز خٹک کے ساتھ ہونیوالی اعلٰی سطح ملاقات اسی سلسلہ کی کڑی تھی۔ واضح رہے کہ مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری پاکستان میں دہشت گردی، شیعہ قتل عام اور تکفیری دہشت گردوں کے خلاف حکومتوں کی عدم کارروائی کے خلاف تیرہ مئی سے بھوک ہڑتال پر ہیں۔
وحدت نیوز (ملتان) مجلس وحدت مسلمین پاکستان کے زیراہتمام ملک کے دیگر شہروں کی طرح ملتان میں پریس کلب کے سامنے بھوک ہڑتالی کیمپ چھ روز سے جاری، کیمپ میں مجلس وحدت مسلمین جنوبی پنجاب کے سیکرٹری جنرل علامہ اقتدار حسین نقوی، ضلعی سیکرٹری جنرل علامہ قاضی نادر حسین علوی،مولانا ہادی حسین ہادی، مولانا عمران ظفر،قاسم شمسی،ثقلین نقوی اور دیگر موجود تھے۔ مجلس وحدت مسلمین کے رہنماؤں نے نماز مغرب پریس کلب کے سامنے ادا کی اور نماز مغرب کے بعد شہداء کی یاد میں شمعیں روشن کی گئیں۔ اس موقع پر علامہ اقتدرا حسین نقوی نے کہا کہ ایک طے شدہ سازش کے تحت فوج کے امیج کو خراب کیا جا رہا۔انہوں نے آرمی چیف جنرل راحیل سے مطالبہ کیا ہے کہ گلگت بلتستان سے لے کر پارہ چنار تک ملک کے باوقار عسکری ادارے سے ایسی کالی بھیڑوں کا خاتمہ کیا جائے جو افواج پاک کی بدنامی کا باعث بن رہی ہیں۔انہیں نے کہا کہ پارہ چنار میں تین بے گناہ افراد کو سر میں گولیاں مارنے والے کمانڈنٹ ،ایف سی و لیویز اہلکاروں کو فوری گرفتار کر کے تحقیقاتی کمیشن قائم کیا جائے ۔مختلف اداروں میں موجود داعش مائنڈ سیٹ وطن عزیز کے عدم استحکام کی بنیادی وجہ ہے۔دشمن غیر محسوس طریقے سے اپنی جنگ سرحدوں کے اندر لے آیاہے۔وطن عزیزکے اندر موجود ملک دشمن طاقتوں کا مقابلہ کرنے کے لیے حکومت کو ذاتی تعلقات اور بیرونی دباو سے بالاتر ہو کر ذمہ دارانہ کردار ادا کرنے کی ضرورت ہے۔ملتان کے علاوہ مجلس وحدت مسلمین کے زیرہ اہتمام جنوبی پنجاب کے دیگر علاقوں جلالپور،پیروالا،علی پور،ڈیرہ غازیخان،بھکر،اور راجن پور میں بھی شیعہ ٹارگٹ کلنگ کے خلاف اور علامہ ناصر عباس جعفری سے اظہار یکجہتی کے لیے علامی بھوک ہڑتالی کیمپ لگائے گئے۔ واضح رہے کہ مجلس وحدت مسلمین کے زیراہتمام ملتان پریس کلب کے سامنے گزشتہ چھ روز سے علامتی بھوک ہڑتالی کیمپ لگایا جارہا ہے جن کا موقف ہے کہ جب تک ہمارے مطالبات تسلیم نہیں ہوتے احتجاج جاری رہے گا۔
وحدت نیوز(شہدادکوٹ) شہداد کوٹ میں منعقدہ عوامی اجتماع اور ایم ڈبلیوایم کی بھوک ہڑتالی کیمپ سے خطاب کرتے ہوئے مجلس وحدت مسلمین سندہ کے سیکریٹری جنرل علامہ مقصود علی ڈومکی نے کہا ہے کہ پاکستان کی حدود میں امریکی ڈرون حملہ سنگین جرم اور نا قابل معافی عمل ہے۔ پاکستان ایک آزاد اور خود مختیار ریاست ہے ،اسے شیطان بزرگ امریکہ کی کالونی نہ سمجھا جائے۔ امریکہ اپنے انسان دشمن رویے کے باعث اقوام عالم کی نظر میں منفور ہوچکا ہے۔ہم امریکہ اور اسرائیل کو تمام دہشت گرد تنظیموں کا بانی اور سر پرست سمجھتے ہیں،اور امریکہ، اسرائیل اور ان کے پالتو دہشت گرد تنظیموں سے نفرت کرتے ہیں۔
انہوں نے کہا کہ مجلس وحدت مسلمین نے امن کے قیام اور دہشت گردی کے خاتمہ کے لیے جو جدوجہد کی ہے وہ لائق صد تحسین ہے۔قائد وحدت علامہ راجہ ناصر عباس جعفری نے انتہائی جرائت اور بہادری سے دہشت گردی کے خلاف جدوجہد کی ہے، ان کی بھوک ہڑتال کو گیارہ دن گذر چکے ہیں۔ قائد وحدت نے حکم دیا تو سندہ سے ہزاروں عاشقان اہل بیت ؑ ان سے اظہار یکجہتی کے لئے اسلام آباد مارچ کریں گے۔ نواز حکومت دھشت گردوں کی ہمدرد بننے کی بجائے امن پسند قوتوں کا ساتھ دے۔انہوں نے کہا کہ ملک بھر سے وارثان شہداء پوچھتے ہیں کہ آخر ہمارے قاتلوں اور دھشت گردوں کو کب سزا ہوگی، اور آخر اس ملک سے دھشت گردی کا خاتمہ کیوں نہیں ہورہا۔ نیشنل ایکشن پلان کے باوجود کالعدم دھشت گرد جماعتوں کی سرگرمیاں کیوں جاری ہیں؟۔
وحدت نیوز (اسلام آباد) عوامی مسلم لیگ پاکستان کے سربراہ شیخ رشید احمد نے مجلس وحدت مسلمین پاکستان کے مرکزی سیکرٹری جنرل علامہ راجہ ناصرعباس جعفری سے ایم ڈبلیو ایم کے احتجاجی کیمپ میں ملاقات کی ۔انہوں نے کہا کہ اس وقت ملک نازک ترین صورتحال سے گزر رہا ہے۔امت مسلمہ باہمی خلفشار اورعدم استحکام کا شکار ہے ۔عالمی طاقتیں پاکستان میں ایسے ہی حالات پیدا کرنا چاہتی ہیں۔مذہبی ہم آہنگی اور وحدت و اخوت سے ان سازشوں کو شکست دینا ہو گی۔ملک اس وقت معاشی واقتصادی مسائل میں جھکڑاہوا ہے۔بلوچستان میں امریکی ڈرون حملہ اکنامک کوریڈور کے حوالے سے اہم پیٖغام ہے۔ اگلے چار ماہ انتہائی اہم ہوں گے۔ عید کے بعد ایک نیا سیاسی میدان سجے گا۔علامہ ناصر عباس قوم کی ایک مدبر قیادت اور اعلی فہم و فراست کی مالک شخصیت ہیں ۔میری ان سے درخواست ہے کہ ظلم و کرپشن کے خلاف اور وطن عزیز کے مفادات کے تحفظ کے لیے ہمارے ساتھ کھڑے ہوں۔علامہ ناصر عباس جعفری نے شیخ رشید کی آمد پر ان کا شکریہ ادا کر تے ہوئے کہا ہے کہ نیشنل ایکشن پلان کا رخ دہشت گرد قوتوں سے ہٹا کر پرامن شہریوں کی طرف موڑ نا ضرب عضب کی پیٹھ میں خنجر گھونپنے کی کوشش ہے۔ملک کے ہر مظلوم طبقے کو یہ امید تھی کہ نیشنل ایکشن پلان عام شہریوں کے جان و مال کے تحفظ میں بھرپور کردار ادا کرے گا لیکن اسے انتقامی کاروائیوں کے لیے استعمال کیا جا رہا ہے۔میری جدوجہد مظلوم کی حمایت میں ہے چاہے وہ مظلوم سکھ ہو ،کافر ہو ،عیسائی ہو یا کسی بھی مکتبہ فکر سے اس کا تعلق ہو۔انہوں نے کہا کہ خرم ذکی ایک جرات مند محب وطن تھا ۔اس سے تکفیری قوتوں نے جینے کا حق چھین لیا ہے۔ہم اس کی قانونی جنگ لڑیں گے اور اس کے خاندان کو تنہا نہیں چھوڑا جائے گا۔علامہ ناصر عباس نے شیخ رشید سے کہا کہ ملت تشیع کی ٹارگٹ کلنگ کے معاملے کو پارلیمنٹ میں اٹھایا جائے۔
وحدت نیوز (کوئٹہ) گزشتہ رات مجلس وحدت مسلمین کوئٹہ ڈویژن کی جانب سے ’’امید مظلومین کانفرنس ‘‘ کے عنوان سے علمدار روڈ پرجلسہ عام کا انعقاد کیا گیا۔ جلسے میں عوام کی بڑی تعداد نے شرکت کرکے اپنی بھرپور حمایت کا م ثبوت دیا۔جلسے میں مجلس وحدت مسلمین پاکستان کے مرکزی رہنماعلامہ اعجاز حسین بہشتی ، مرکزی سیکریٹری آئمہ جمعہ فورم علامہ سید ھاشم موسوی ، صوبائی اسمبلی کے رکن آغا رضااور کوئٹہ ڈویژن کے سیکریٹری جنرل عباس علی سمیت تمام عہدیداران اور ممبران موجود تھے۔ جلسے کا آغاز تلاوت قرآن پاک سے ہوا اور نعت خوانی کی گئی ۔
ایم ڈبلیو ایم کوئٹہ کے سیکریٹری جنرل عباس علی نے اپنے خطاب میں مساوات کا تذکرہ کرتے ہوئے کہا کہ اللہ نے ہماری پہچان کیلئے ہمیں قوموں میں تقسیم کیا ہے،قومیت کے بنیاد پر خود کو دوسروں سے بہتر اور برتر سمجھنا آج کے ترقی یافتہ دور میں پرانی کی بات ہے۔ ہم نے ہمیشہ ان باتوں کو بالائے طاق رکھ کر بغیر کسی تفریق کے ، ہر نگ و نسل کے افراد کی خدمت کی ہے۔ انہوں نے دین و سیاست کا راشتہ عوام کیلئے واضح کرتے ہوئے کہا کہ اللہ نے اس دنیا کیلئے ایک نظام تشکیل دی ہے، نظام الٰہی کو پیش کرنے کیلئے سیاست میں آنا ضروری ہے۔
امام جمعہ کوئٹہ علامہ ھاشم موسوی نے اپنے خطاب میں کہا کہ اللہ تمام انسانوں کو کامیاب کرنا چاہتا ہے، ہم سب اس دنیا میں مسافر ہیں اور کامیابی سے مراد آخریت کی کامیابی ہے اور اللہ و رسول کے احکامات یعنی قرآن و اہلبیت کا دامن تھام کر ہی کامیاب ہو سکتے ہیں۔ انہوں نے معاشرے میں اجتماعی اعمال کو انفرادیت پر ترجیح دیتے ہوئے کہا کہ اللہ ہمارے اجتماعی اعمال کو زیادہ پسند کرتا ہے انہوں نے ملک بھر میں اہل تشیع پر ہونے والے مظالم کا تذکرہ کیا اور کہا کہ علامہ راجہ ناصر عباس صاحب اسی ظلم و بربریت کے خلاف سراپا احتجاج ہے۔
ایم پی اے آغا رضا نے جلسے عام سے خطاب کرتے ہوئے کہا کہ ہمارا مقصد عوام کی فلاح و بہبود اور ترقی کو عملی جامہ پہنانا ہے ۔ہم عوام کا حق ان کی دہلیز تک پہنچانے کا عزم رکھتے ہیں ۔انھوں نے مزید کہا کہ ہماری قوم ملک سے وفا رکھنے والی اور پر امن قوم ہے اور ملک میں بہترین پوزیشن رکھنے کے باوجود ہم نے کبھی کوئی غلط اقدام نہیں اٹھایا۔ہم نفرت کی سیاست پر یقین نہیں رکھتے۔ انہوں نے اپنے پروجیکٹس پر لگنے والے الزامات کا جواب دیتے ہوئے کہا کہ مخالفین لوگوں کے زہنوں میں سوالات پیدا کرکے ہمارے ارادے پست کرنا چاہتا ہے مگر ہم قوم کو ہمیشہ اعتماد میں لے کر کام کرتے ہیں۔ انہوں نے مزید کہا کہ ہم نے سابقہ حکومت کے باقی ماندہ کام بھی اگر شروع کیے تو پروجیکٹ شروع کرنے والوں کو اعتماد میں لیکر اس پر کام کیا اور انھی کے ہاتھوں اسکا افتتاح کروایاکیونکہ چوری چوری ہوتی ہے چاہے وہ پیسوں کی ہو یا نام کی۔
مرکزی رہنما علامہ اعجاز حسین بہشتی نے عوام سے خطاب کے دوران علامہ راجہ ناصر عباس صاحب کا تذکرہ کرتے ہوئے کہا کہ راجہ صاحب نے مجھے یہ پیغام دیا ہے کہ اگر ظلم کے خلاف ہمیں سو دن بھی احتجاج کرنا پڑے تو ہم ضرور کریں گے۔ ہم ہر قسم کے ظلم و ستم اور ہر مظلوم کیلئے آواز بلند کریں گے۔ حکومت کو اپنی پالیسیوں میں تبدیلی لانی پڑے گی اور ہمیں ہمارا حق دینا پڑے گا انہوں کہا کہ ہم ملک سے دہشتگردی اور انسانیت کی قتل و غارت گری کو ہمیشہ کیلئے ختم کرنا چاہتے ہیں ، ہماری جان و مال کی حفاظت حکومت کی ذمہ داری ہے اور حکومت اپنی ذمہ داریاں پوری نہیں کر رہی ہے اس لئے ہمیں احتجاج کی رہ اختیار کرنا پڑ رہا ہے، انہوں نے بھر پور حمایت کیلئے کوئٹہ کے مومنین کا شکریہ ادا کیا ۔ ان کے خطاب کے بعد ہزارہ پارکوئر اکیڈمی کے جوانوں نے ایم ڈبلیو ایم کی حمایت اور اپنے خدمات پیش کرنے کا اعلان کیا جلسے کے اختتام پر ملک کے استحکام اور سلامتی سمیت دنیا و آخرت میں کامیاب رہنے کی دعا کی گئی ۔
وحدت نیوز(جھل مگسی) ضلع جھل مگسی گنداواہ میں مجلس وحدت مسلمین کے مرکزی سیکرٹری جنرل علامہ راجہ ناصر عباس کیساتھ اظہار یکجہتی کیلئے ریلی نکالی گئی، احتجاجی ریلی کے شرکاء سے MWM رہنمائوں نے خطاب کیا۔ اس موقع پر احتجاجی ریلی سے خطاب کرتے ہوئے مولانا سہیل اکبر شیرازی نے کہا کہ ملک بھر میں جاری شیعہ ٹارگیٹ کلنگ کے خلاف ملک بھر کی طرح آج گنداواہ میں بھی ریلی نکال کر اہل بلوچستان نے ثابت کیا ہے کہ وہ ہر مرحلے پر قائد وحدت کے ساتھ ہیں۔
وحدت نیوز(قم) مجلس وحدت مسلمین پاکستان قم المقدسہ کے وفد نے گزشتہ روز جامعہ روحانیت خیبر پختونخوا کے مسئولین سے ملاقات کی ، ملاقات میں جامعہ روحانیت کی جانب سے مولانا ریاض حسیں الحسینی، مولانا سید شیدا حسین جعفری اور ایم ڈبلیو ایم کی جانب سے مولانا گلزار احمد جعفری اور دیگر موجود تھے، اس موقع پر پاکستان میں جاری احتجاج کے حوالے سے تبادلہ خیال گیا، جامعہ روحانیت مسئولین نے ایم ڈبلیو ایم کو ہر طرح کے تعاون کا یقین دلایا۔
وحدت نیوز(ڈی آئی خان) ڈیرہ اسماعیل خان میں انجمن متولیان کے زیراہتمام امام بارگاہ روشن چراغ سے احتجاجی ریلی برآمد کی گئی۔ جس میں سینکڑوں کی تعداد میں مختلف شعبہ ہائے زندگی سے تعلق رکھنے والے افراد نے شرکت کی۔ مجلس وحدت مسلمین اور امامیہ سٹوڈنٹس آرگنائزیشن کے تعاون سے یہ ریلی اس بھوک ہڑتال احتجاجی کیمپ سے اظہار یکجہتی کی مد میں نکالی گئی جو سرکلر روڈ حیدری چوک پر لگایا گیا ہے۔ ڈیرہ اسماعیل خان سمیت دیگر شہروں میں ہونے والی اہل تشیع کی ٹارگٹ کلنگ کے خلاف ملک بھر میں احتجاجی ریلیاں اور مظاہرے جاری ہیں۔ اسی سلسلے میں ڈی آئی خان میں بھی احتجاجی مظاہروں کا سلسلہ جاری ہے۔ احتجاجی ریلی کا آغاز امام بارگاہ روشن چراغ سے ہوا، جو کہ مختلف مقامات و راستوں سے ہوتی ہوئی حیدری کیمپ پر اختتام پذیر ہوئی۔ امام بارگاہ تھلہ بموں شاہ، حسینی چوک، حیدری چوک، جائے شہادت شہید رضی الحسن شاہ بازار توپانوالہ سیت مختلف مقامات پر آئی ایس او، ایم ڈبلیو ایم کے ضلعی رہنماوں اور انجمن متولیان کے صدر نے مظاہرین سے خطاب کرتے ہوئے اہل تشیع کو تحفظ اور شہداء کے قاتلوں کی فی الفور گرفتاری کا مطالبہ کیا۔
