وحدت نیوز(جیکب آباد)مجلس وحدت مسلمین پاکستان کے مرکزی رہنماء علامہ مقصود علی ڈومکی نے کہا ہے کہ عاشورا یوم اللہ ہے اور قرآن کریم نے ایام اللہ یعنی اللہ کے دن منانے کا حکم دیا ہے، کیونکہ خدا کے دن دین خدا کی بقاء اور استحکام کا باعث ہیں۔ انہوں نے کہا نواسہ رسول حضرت امام حسین علیہ السلام سے عشق و مودت اہل ایمان کی نشانی ہے۔ بھٹ شاہ میں حضرت شاہ عبد اللطیف بھٹائی کے مزار کو ایام عزاء میں سیاہ پوش کرنا احسن اقدام ہے۔ ان خیالات کا اظہار انہوں نے ڈی سی چوک جیکب آباد پر منعقدہ مجلس عزاء سے خطاب کرتے ہوئے کیا۔

 انہوں نے کہا کہ سندھ دھرتی کے عظیم شاعر حضرت شاہ عبد اللطیف بھٹائی امام حسین علیہ السلام کے عاشق اور عزادار تھے۔ جنہوں نے کربلا کے شہداء کو سرکیڈارو میں زبردست خراج عقیدت پیش کیا ہے۔ شاہ سائیں کے مزار کو سیاہ پوش کرنے پر اعتراض بلا جواز ہے اور یہ ناصبی ذہنیت کی پیداوار ہے۔ انہوں نے کہا کہ عزاداری امام حسین علیہ السلام عظیم عبادت اور تحریک کربلا کا تسلسل ہے۔ عزاداری ہمیں مقصد کربلا کو سمجھنے اور اپنی زندگی کربلا کی روشنی میں گزارنے کا درس دیتی ہے۔ شدید گرمی کے باوجود ملک بھر میں عاشقان اہل بیت نے عزاداری امام عالی مقام میں بھرپور شرکت کی ہے۔ انہوں نے کہا کہ عزاداری امام حسین علیہ السلام ہمارا آئینی حق ہے۔ عزاداری میں رکاؤٹ کسی سطح پر بھی قبول نہیں۔