وحدت نیوز(لاہور)سالانہ مرکزی مجلس عزاء بسلسلہ ایام شہادت مولا امیرالمومنین امام علی علیہ السلام کربلا گامے شاہ میں 21 رمضان المبارک کو منعقد ہوئی ۔جس سے ملک کے نامور علمائے کرام اور ذاکرین عظام نے خطاب کیا اور مولا امیر المومنین کی خدمت میں نذرانہ عقیدت پیش کیا ۔ مرحوم حیدر علی مرزا نے 21 رمضان المبارک کو یوم شہادت مولا امیرالمومنین حضرت امام علی علیہ السلام کی مناسبت سے کربلا گامے شاہ میں مجلس عزا کی بنیاد رکھی جو آج تک اسی دن منعقد کی جاتی ہے ۔اب چونکہ مرزا صاحب اس دنیا میں نہیں رہے ان کی رحلت کے بعد امیر عباس مرزا اور سید اسد عباس نقوی کے علاؤہ شجاع عباس مرزا اور کاظم عباس مرزا نے اس کار خیر کو جاری وساری رکھا ہوا ہے ۔

ہر سال مجلس عزاء میں کتیر تعداد میں عزادار اور مومنین کرام شریک ہوتے ہیں ۔ اس سال بھی عزاداروں کی کثیر تعداد مجلس عزاء میں شریک تھی ۔مجلس عزاء کا آغاز 2 بجے دن جبکہ مجلس عزاء کا اختتام نماز مغربین پر ہوا ہے ۔ اس روز شرکاء مجلس عزاء کے لئے افطاری کا وسیع انتظام و اہتمام کیا جاتا ہے ۔مجلس عزاء سے معروف خطیب صوبائی صدر مجلس وحدت مسلمین پنجاب جناب علامہ سید علی اکبر کاظمی صاحب ،مرکزی سیکرٹری سیاسیات جناب سید اسد عباس نقوی ،جناب شجاع عباس مرزا ،جناب مرزا امیر عباس کے علاؤہ علامہ سید وقار الحسنین نقوی ،ضلعی سنیئر نائب صدر مجلس وحدت مسلمین ضلع لاہور جناب آفتاب علی ہاشمی  اور کئی دیگر ذاکرین نے بھی خطاب کیا اور مولا امیر المومنین حضرت امام علی علیہ السلام کی شان میں نذرانہ عقیدت پیش کیا ۔

ہرسال 21 رمضان المبارک کو یہ مجلس عزاء بڑی عقیدت و احترام سے منعقد کی جاتی ہے ۔ مختلف ماتمی انجمنوں کے سالار ،نوحہ خوان ،اور مختلف امام بارگاہوں کے ٹرسٹیز اور لاہور کی مختلف سیاسی ،سماجی شخصیات بھی اس مجلس عزاء میں شریک ہوتی ہیں ۔ مجلس عزاء کے مرکزی اور آخری خطیب جناب حجت الاسلام و المسلمین علامہ سید علی اکبر کاظمی صاحب تھے جنہوں سیاست علوی کے موضوع پر بہت ہی خوبصورت انداز میں روایات ،احادیث اور فرامین معصومین کی روشنی خطاب فرمایا اور خطاب کے آخر میں مصائب شہادت مولا امیرالمومنین علیہ السلام پڑھے ۔ صوبائی صدر مجلس وحدت مسلمین پنجاب نے مجلس کے اختتام پر بانیان کے لئے خصوصا مرحوم حیدر علی مرزا کی بلندی درجات کے لئے دعائے مغفرت کرائی ۔