وحدت نیوز(حیدرآباد)کراچی کے بعد دہشت گردی کے بے قابو جن نے حیدر آباد کا رخ کر لیا ہے ، سفاک دہشت گردوں نے ۴پولیس اہلکاروں سمیت مجلس وحدت مسلمین کے ہمدرد اختر حسین زیدی کو بھی شہید کر دیا ، سکیورٹی ایجنسیز قانون کی عمل داری کو یقینی بنائیں ، جب عوام کے رکھوالے محفوظ نہ ہو ں تو عوام کس سے امان کی امید رکھیں ، ان خیالات کا مجلس وحدت مسلمین صوبہ سندھ کے ڈپٹی سیکریٹری جنرل الفت عالم کربلائی نے اپنے مذمتی بیان میں کیا ۔ ان کا کہنا تھا کہ حیدر آباد جیسے پر امن شہر میں دہشت گردی کی وارداتیں نیک شگون نہیں ہیں ، عوام اپنے ارد گرد ماحول پر نظر رکھیں ، پولیس اہلکاروں پر حملے اس بات کا اشارہ کر رہے ہیں کہ یہ ملک دشمن عناصر حیدرآباد میں مذید دہشت گر د کاروائیاں کر سکتے ہیں ، خفیہ ایجنسیاں اور سکیورٹی ادارے ایم ڈبلیو ایم کے ہمدرد اختر حسین زیدی سمیت ۴ پولیس اہلکاروں کے قاتلوں کو فوری گرفتار کریں اور انہیں کیفر کردار تک پہنچائیں ۔