وحدت نیوز(حیدرآباد) ہرسال کی طرح اس سال بھی ہفتہ وحدت کی مناسبت سے ایم ڈبلیو ایم شعبہ خواتین کے فلاحی پراجیکٹ مدرسہ و تعلیم بالغاں ام ابیھاؑ سکول میں جشن صادقینؑ کا اہتمام کیا گیا جس میں طالبات نے تلاوت ھدیہ نعت و منقبت کے ذریعے اظہار عقیدت کیا ۔محفل میلاد میں محترمہ سیمی نقوی مرکزی سیکرٹری روابط ایم ڈبلیو ایم شعبہ خواتین و معلمہ ام ابیھا سکول و مدرسہ نے خطاب کرتے ہوۓ فضائل و سیرتِ حبیب خدا (ص) و امام جعفر صادق (ع) بیان کی ان کا کہنا تھا کہ حضور صل اللہ علیہ و آلہ وسلم کی سیرت طیبہ اور پاکیزہ کردار حق اور فلاح کے متلاشیوں کے لیے سرچشمہ ھدایت ہے۔
انھوں نے کہا کہ پیمبر اکرم (ص) کے بعد ان کے اھل بیت ع نے اپنی سیرت اور عملی زندگی سے لوگوں کی راھنمائ فرمائ اور دین مبین کی خدمات انجام دیں جن میں سے ایک ہمارے چھٹے امام ، امام جعفر صادق ع کی ذات ہے جو سیرت و کردار ، گفتار و رفتار ، علم و حلم تمام اوصاف حسنہ میں رسول خدا(ص) سے مماثلت رکھتے ہیں اختتام محفل پر سکول اور مدرسہ میں ریگولر آنے والی طالبات میں ان کی حوصلہ افزائ کے لیے تحائف تقسیم کیے گئے۔
