وحدت نیوز ( پشاور) مجلس وحدت مسلمین خیبر پختونخوا کے ڈپٹی سیکرٹری جنرل علامہ سید وحید کاظمی نے اکبر کمیلی کی شہادت کی شدید مذمت کرتے ہوئے کہا کہ کراچی پاکستانی قوم خصوصا ملت تشیع کے لئے ایک قتل گاہ بن گئی ہے، حکومت نام کی کوئی چیز ہی نہیں رہی ہے، کراچی میں ہمیشہ بے گناہوں کا خون بہایا جاتا ہے، جبکہ نواز شریف، چوہدری نثار اور قائم علی شاہ صرف بیان بازی تک محد ود رہتے ہیں، کبھی عملی قدم نہیں اٹھاتے۔ ان کا کہنا تھا کہ اگر قتل عام اسی طرح جاری رہا تو انتہائی قدم اٹھانے پر ہم بھی مجبور ہونگے۔ ان کا مزید کہنا تھا کہ اس وقت ملک انارکی کی صورت حال سے گزر رہا ہے۔ مسلم لیگ ن اور پی پی نظام حکومت چلانے میں مکمل طور پر ناکام ہوچکے ہیں، یوں اقتدار میں رہنے کا انکو اب کوئی حق حاصل نہیں رہا۔ چنانچہ ملک کے بہترین مفاد میں یہی ہے کہ یہ لوگ حکومت چھوڑ کر اب اپنے گھر چلے جائیں کیونکہ عوام پر اب یہ حکمرانی کا حق کھو چکے ہیں۔ انہوں نے مطالبہ کیا کہ ایسے حالات میں کراچی میں جلد از جلد فوجی آپریشن شروع کیا جائے اور اس دوران دہشتگردوں سے کسی طرح کی رعایت نہ کی جائے۔ انہوں نے علامہ اکبر کمیلی کے قاتلوں کو جلد سے جلد گرفتار کرنے کا بھی مطالبہ کیا۔