وحدت نیوز(کوئٹہ) مجلس وحدت مسلمین کوئٹہ ڈویژن کے ترجمان نے جاری کردہ بیان میں کہا ہے کہ کوئٹہ مشھد PIAپروازوں کا آغاز کر کے وزیر داخلہ چوہدری نثار ،وزیر اعلیٰ بلوچستان ڈاکٹرعبدالمالک بلوچ اور صوبائی وزیر داخلہ سرفراز بگٹی نے ہم سے کئے ہوئے وعدوں میں سے ایک وعدے پر عمل کیا جس پر ہم انکا اور PIAحکام کا شکریہ ادا کرتے ہیں ۔تاہم کرایوں پر سبسڈی کا وعدہ پورا نہیں کیا گیا ۔سانحہ مستونگ کے خلاف احتجاجی دھرنے میں وزیر داخلہ چوہدری نثار نے ہمارے عمائدین ،بزرگوں اور قوم سے یہ کہا تھا کہ ہم آپ کے دشمنوں کے لئے سر زمین تنگ کرینگے اور زائرین کیلئے خصوصی سبسڈی کیساتھ PIAپروازوں کا آغاز کرینگے ،لیکن مذہبی انتہا پسندوں کے خلاف سنجیدہ آپریشن نہ کرنا اور PIAکرایوں پر سبسڈی نہ دینا قابل افسوس ہے امید ہے کہ حکومت فوری طور پر اپنے دیگر وعدوں پر عمل درآمد کر کے جمہوری حکومت ہونے کا ثبوت دیگی۔بیان مین گورنر بلوچستان کی ھمشیرہ اور معروف صحافی سید فصیح اقبال کے انتقال پر انکے لواحقین سے دلی اظہار تعزیت کر تے ہوئے دونو ں کی خدمات کو سراہا گیا ۔مرحوم اور مرحومہ کے انتقال سے ہونے والے نقصان کی تلافی بہت مشکل ہے ۔ دونوں مرحومین کے ایصال ثواب کے لئے مجلس وحدت مسلمین صوبائی سیکرٹریٹ میں اجتماعی فاتحہ خوانی بھی کی گئی ۔