وحدت نیوز(کوئٹہ) مجلس وحدت مسلمین کوئٹہ ڈویژن کے سیکریٹری جنرل سید عباس علی موسوی نے وحدت ہاؤس کوئٹہ سے جاری ایک بیان میں کہا ہے کہ اسلام آباد کے امام بارگاہ میں بے گناہ انسانوں کی شہادت بدترین دہشت گردی اور بربریت ہے۔دہشت گرد اپنے مذموم مقاصد کے حصول کے لیے معصوم اور بے گناہ لوگوں کو نشانہ بنا رہے ہیں۔ وفاقی اور پنجاب حکومت دہشتگردوں کی سرپرستی کررہے ہیں۔ جس کی وجہ سے کالعدم جماعتیں آزادانہ طور پر فعالیت جاری رکھے ہوئے ہیں۔ وفاقی اور پنجاب حکومت عوام کے جان و مال کی حفاظت میں بری طرح ناکام ہوچکے ہیں۔ نون لیگ کی حکومت اہل تشیع کو پاکستان میں تیسرے درجے کی شہری بھی تسلیم نہیں کرتی۔ہم حکومت کو متنبہ کرتے ہیں کہ اب ہمارے صبر کا پیمانہ لبریز ہوچکا ہے۔ اگر ملت تشیع کے افراد کی لاشیں گرانے کا یہ سلسلہ بند نہ ہوا توپھر پاکستان کے پانچ کروڑ شیعہ اپنے سنی بھائیوں کے ساتھ سڑکوں پر نکلنے پر مجبور ہو جائینگے۔ حکومت کی پشت پناہی میں پلنے والے یہ ملک دشمن عناصر ملک کی سلامتی و بقاء کے ازلی دشمن ہیں۔ ان کو سر عام چوراہوں پر پھانسی دی جائے۔ مساجد ، امام بارگاہوں اور مقدسات کو نشانہ بنانے والے کسی رعایت کے مستحق نہیں۔اللہ کے حضور سجدہ ریز بے گناہ انسانوں کا خون بہانا درندگی کی بدترین مثال اور وطن عزیز پاکستان کے لیے بڑا سانحہ ہے۔عصر کے خوارج کی درندگی اپنی جگہ لیکن نااہل حکومت اور ناواقف سیکورٹی ایجنسیوں کی غفلت اور حکمرانوں بزدلی ان کی درندگی سے زیادہ شرمناک ہے۔ مجلس وحدت مسلمین مطالبہ کرتی ہے کہ حکومت پورے ملک میں نیشنل ایکشن پلان پر عمل درآمد کو یقینی بنائیں اور دہشتگردوں کے خلاف بھر پور آپریشن کرے۔