وحدت نیوز(مظفرآباد) بزرگ کشمیری رہنما آل پارٹی خوریت کانفرنس کے سرکردہ رہنماء چیئرمین حریت و آزادی کےاستعارہ سمجھے جانے والی شخصیت سید علی گیلانی کی وفات سے تحریکِ آزادیِ کشمیر کو نا قابلِ تلافی نقصان پہنچا ہے۔مرحوم عزم و ہمت کی عظیم مثال تھے۔مرحوم کی ساری زندگی جدوجہدِ آزادی میں بسر ہوئی۔مرحوم نے تحریکِ آزادی کو ایک پُرامن تحریک کی صورت میں ایک نئی جہد دی تھی۔ان خیالات کا اظہار سیکرٹری جنرل مجلسِ وحدت مسلمین آزاد جموں وکشمیر علامہ سید تصور حسین نقوی الجوادی نے سید علی گیلانی کے انتقالِ پُر ملال پر اپنے تعزیتی پیغام میں کیا۔
انہوں نے کہا کہ سید علی گیلانی کی شخصیت ایک آئیڈیل شخصت تھی۔سید علی گیلانی نے تحریکِ آزادیِ کشمیر میں ایک پُرامن جدوجہد کے ذریعے تاریخ رقم کی۔آپ کی جدوجہد نے ثابت کیا کے تحریکِ آزادیِ کشمیر مسلح جدوجہد کےبغیر بھی کامیابی سے چلائی جا سکتی ہے اور یہی وجہ ہے کے سید علی گیلانی کی تحریک آل پارٹی حر یت کی صورت میں دنیا کے متعدد ممالک میں کشمیری مظلوم عوام کا پیغام پہنچانے میں کامیاب ہوئی۔سید علی گیلانی اپنی زندگی میں کئی بار قید و بند کی مشکلوں سے بھی گزرےاور انہوں نے اپنی پوری زندگی قائد حریت پسندانِ جہان امام حسین ابن علی ؑکے راستے کو چُنتے ہوئے گزاری غاصب ہندوستان کو للکار کے کہا میں حسینی ہوں اور حسینی کبھی یزیدیوں کی بیعت نہیں کر سکتا اور کبھی بھی ہندوستان کو تسلیم نہیں کیا بلکہ ہمیشہ کہتے تھے آزادی کشمیریوں کا حق ہے اور انھیں آزادی حاصل کرنے سے کوئی نہیں روک سکتا اور ہم خون کے آخری قطرے تک پُرامن جدوجہدِ آزادی جاری رکھیں گے۔
علامہ تصور حسین جوادی نے مزید کہا کے سید علی گیلانی کی وفات سے پوری ملتِ اسلامیہ کو خاص طور پر ملتِ کشمیر کو نا قابلِ تلافی نقصان ہوا ہے دعا ہے پروردگار مرحوم کو جنت میں اعلیٰ مقام عطاء کرے دیدار و عرفان اور شفاعت محمد مصطفی صلی الله عليه وآلہ وسلم نصیب ہو۔
