وحدت نیوز (اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے انسداد الیکٹرانک جرائم بل 2015 کی قومی اسمبلی سے منظوری پر اپنے ردعمل کا اظہار کرتے ہوئے کہا ہے کہ ناقص حکومتی اقدامات کے خلاف آواز بلند کرنے کو قابل تعزیر قرار دیا جانا بنیادی حقوق کی صریحاََ پامالی ہے۔رائے عامہ کی آزادی سلب کرنے کی اس آمرانہ حکومتی کوشش کے خلاف اپوزیشن جماعتوں سمیت ابلاغ عامہ کے نمائندوں کو بھی آواز بلند کرنی چاہیے۔اس متنازعہ بل کی منظوری سے حکومت اپنے غیر آئینی اقدامات کے خلاف اٹھنے والی حق کی آواز کو دبانا چاہتی ہے جسے کامیاب نہیں ہونے دیا جائے گا۔جمہوری معاشروں میں اظہار رائے کی آزادی اورجائز تنقید کو جمہوری طرز حکومت کا حسن سمجھا جاتا ہے لیکن ہمارے حکمران عرب بادشاہت سے مرعوب کر ایسی ہی حکمرانی کے متمنی دکھائی دیتے ہیں جس میں کسی کو سراٹھا کر بات کرنے کی اجازت نہ مل سکے ۔یہ رعونت دراصل بدحواسی ہے جوحکمرانوں کو اب لے ڈوبے گی۔قومی اسمبلی اراکین کو چاہیے کہ اس بل کی تمام شقوں پر نظر ثانی کرے۔سینٹ میں بل کو پیش کیے جانے پر معزز اراکین سینٹ کی طرف سے ان شقوں کے خلاف آواز اٹھنی چاہیے جن میں حکومت کے غلط اقدامات کو قانونی تحفظ دینے کی کوشش کی جا رہی ہے ۔انہوں نے کہا موجودہ حالات پارلیمنٹ سے الیکٹرانک جرائم کی روک تھام کے بل کی بجائے انسداد بدعنوانی کا ایسا بل منظور کرانے کا تقاضہ کر رہے ہیں جس کے ذریعے غیر قانونی طور پر قومی خزانہ کو لوٹنے والے حکمرانوں کو موت کی سزاد سنائی جا سکے۔ اس وقت ملک کو درپیش خطرات میں سب سے زیادہ خطرناک بدعنوان حکمران اور دہشت گرد قوتیں ہیں جنہوں نے ملک سلامتی و بقا کو تباہی کے دھانے پر لاکھڑا کیا ہے۔