وحدت نیوز(اسلام آباد) مجلس وحدت مسلمین پاکستان کے مرکزی ڈپٹی سیکرٹری سید ناصر شیرازی نے سندھ اسمبلی کی ڈپٹی سیکرٹری شہلا رضا کو دھمکی آمیز خط موصول ہونے پر تشویش کا اظہار کرتے ہوئے کہا ہے کہ معروف سیاست دان و شیعہ ممبر صوبائی اسمبلی کو جان سے مارنے اور اسمبلی کو دھماکے سے اڑانے کی دھمکی کالعدم مذہبی جماعتوں کی مذموم کارستانی ہے۔مک دشمن عناصر قومی سلامتی کے لیے چیلنج بنے ہوئے ہیں۔کالعدم جماعتوں کے سربراہان کے حکومتی وزرا سے مضبوط رابطوں نے ان کے حوصلوں کو تقویت دے رکھی ہے۔جب تک ان سہولت کاروں کو سخت گرفت میں نہیں لیا جاتا تب تک ملک میں کسی بھی شخص کے جان و مال کے تحفظ کی کوئی ضمانت نہیں ہے۔انہوں نے کہا کہ نیشنل ایکشن پلان پر عمل کرتے ہوئے کالعدم جماعتوں کی سیاست و ریاست میں مداخلت اور حصہ داری کو سختی سے ختم کیا جانا چاہیے۔ انہوں نے کہا کہ یہ انکشاف مزیدحیران کن ہے کہ خاتون سیاستدان کو خط راولپنڈی کے علاقے سٹلائیٹ ٹاؤن سے لکھا گیا ہے۔آرمی ہیڈ کوارٹر سے چند کلومیٹر کے فاصلے پر فعال دہشت گردوں کی موجودگی عالمی سطح پر بھی ہمارے امیج کے لیے نقصان دہ ثابت ہو گی۔انہوں نے متعلقہ حکام سے مطالبہ کیا کہ اس واقعہ کا سنجدگی سے نوٹس لیتے ہوئے شہلا رضا کی سیکورٹی میں اضافہ کیا جائے اور ملک کے تمام شہروں میں کالعدم جماعتوں کے خلاف بھرپور آپریشن کیا جائے۔