وحدت نیوز(اسلام آباد) فلسطین کے مظلومین پر اسرائیلی جارحیت کے خلاف مجلس وحدت مسلمین کے اعلان پر (آج) 21مئی بروز جمعہ ملک بھر میں یوم یکجہتی مظلومین فلسطین منایا جارہا ہے۔آج بعد از نماز جمعہ اسلام آباد، لاہور، کراچی، پشاور، کوئٹہ، ملتان، گلگت بلتستان اور آزادکشمیر کے مختلف اضلاع سمیت ملک کے دیگر حصوں میں اسرائیلی بربریت کے خلاف احتجاجی مظاہرے کیے جائیں گے جن میں ایم ڈبلیو ایم کے مرکزی، صوبائی اور ضلعی قائدین و کارکنان، سیاسی و سماجی رہنما ، انسانی حقوق کی تنظیموں کے نمائندگان، سول سوسائٹی کے اراکین اور مختلف مکاتب فکر سے تعلق رکھنے والی شخصیات شریک ہوں گی۔

 وفاقی دارالحکومت اسلام آباد میں یوم یکجہتی مظلومین فلسطین کے سلسلے میں احتجاج کا آغاز بعد از نماز جمعہ امام بارگاہ اثنا عشری جی سکس ٹو سے ہو گا۔مجلس وحدت مسلمین نے باضمیر و باشعور عوام سے اپیل کی ہے کہ وہ عالمی استعماری ایجنڈے کے خلاف اور مظلومین کی حمایت میں اپنے اپنے علاقوں میں ہونے والے احتجاج میں شریک ہو کر قومی و دینی ذمہ داری اور بیداری کا ثبوت دیں۔