وحدت نیوز (اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری کے اعلان پر مرکزی نماز جمعہ نیشنل پریس کلب اسلام آباد کے سامنے بھوک ہڑتالی کیمپ والی جگہ پر علامہ راجہ ناصر عباس جعفری کی اقتدا میں ادا کی جائے گی۔ ملت تشیع کی نسل کشی اور ریاستی جبر کےخلاف اس احتجاج کی حمایت میں امام بارگاہ اثنا عشری جی سکس ٹو اور جامع الصادق کراچی کمپنی کے منتظمین نے بھی پریس کلب کے سامنے نماز جمعہ ادا کرنے کا اعلان کیا ہے۔ جس میں راولپنڈی اسلام آباد سے ملت تشیع کی بڑی تعداد شریک ہو گی۔ نماز میں شرکت کرنے کے لیے راولپنڈی کی بیشتر شیعہ تنظیمیں ریلی کی شکل میں احتجاجی کیمپ میں پہنچے گی۔ اس کے علاوہ ملک کے دیگر شہروں میں حکمرانوں کی بےحسی کے خلاف ’’یوم احتجاج‘‘ منایا جائے گا جس میں مختلف مقامات پر احتجاجی مظاہرے ہوں گے۔ مجلس وحدت مسلمین پاکستان کے مرکزی رہنما علامہ حسن ظفر نقوی نے کہا ہے کہ شیعہ قوم نے ہمیشہ پرامن احتجاج کی راہ اختیار کر کے یہ ثابت کیا ہے کہ ہم ایک باشعور اور محب وطن قوم ہیں۔
مرکزی سیکریٹریٹ میں میڈیا سے خصوصی گفتگو میں علامہ حسن ظفرنقوی کا کہنا تھا کہ حکومت کی روایتی بےحسی اس امر کی بین دلیل ہے کہ حکمرانوں کو عوام کے مسائل سے کوئی غرض نہیں۔ ملت تشیع کی نمائندہ سیاسی و مذہبی جماعت کے مرکزی قائد سات روز سے بھوک ہرتال پر ہیں لیکن حکومت کے کسی ذمہ دار میں یہ اخلاقی جرات نہیں کہ وہ آ کر علامہ ناصر عباس جعفری سے ملاقات کرے۔ انہوں نے کہا کہ جمعہ کی نماز کا اجتماع شیعہ قوت کا عملی مظاہرہ ثابت ہو گا۔ وہ دشمن طاقتیں جو قوم کو منتشر دیکھنا چاہتی ہیں آج ان کے خواب چکنا چور ہو جائیں گے۔ علامہ حسن ظفر نقوی نے شیعہ قوم سے اپیل کی ہے کہ وہ تمام تنظیمی وابستگیوں سے بالاتر ہو کر جمعہ کی نماز میں شرکت کے لیے احتجاجی کیمپ پہنچے۔ یہ موجودہ حالات کا تقاضہ بھی ہے اور شرعی فریضہ بھی۔ وحدت و اخوت کے ہتھیار سے حکومتی سازشوں کو ناکام بنانے کا وقت آ پہنچا ہے۔ گزشتہ تین دہائیوں سے جاری شیعہ نسل کشی کے خلاف آج ملک کے ہر فرد کو آواز بلند کرنا ہو گی۔ انہوں نے کہا جس شخص کے دل میں قوم کا درد موجود ہے آج وہ گھر نہیں بیٹھے گا۔
