وحدت نیوز(کراچی) جامعہ امامیہ کراچی کے پرنسپل اور مجلس وحدت مسلمین پاکستان سندھ کے سیکرٹری جنرل علامہ باقرعباس زیدی سے جامعہ نعیمیہ اسلام آباد کے پرنسپل اور جماعت اہل حرم کے سربراہ مفتی گلزار نعیمی نے ملاقات کی جس میںاتحاد امت، ملک کی تازہ ترین صورتحال اور باہمی دلچسپی کے امور پر تبادلہ خیال کیا گیا۔
کراچی وحدت ہاوس ملاقات میں ایم ڈبلیو ایم کے مرکزی رہنما علامہ احمد اقبال رضوی بھی موجود تھے۔دونوں مذہبی رہنماؤں نے قومی امن اور ملک کے استحکام کے لیے وحدت و اخوت کی ضرورت پر زور دیا۔ علامہ باقرعباس زیدی نے کہا کہ بین المسالک ہم آہنگی وقت کی اہم ضرورت ہے۔دوسروں کے مذہبی نظریات اور عقائد کا احترام کو مقدم رکھ کر ملک کو امن کا گہوارہ بنایا جا سکتا ہے۔ملک دشمن قوتیں مذہبی منافرت کے ذریعے ملک کو عدم استحکام کا شکار کرنا چاہتی ہیں ایسی صورتحال میں علماء کی ذمہ داریاں بڑھ گئی ہیں۔ معتدل مذہبی شخصیات کو امن و آشتی کے لیے اپنے حصے کا کردار ادا کرنا ہو گا۔
مفتی گلزار نعیمی نے اتفاق کرتے ہوئے کہا کہ ہمیں اختلافات پر الجھنے کی بجائے مشترکات پر باہم ہونے کی ضرورت ہے۔شیعہ سنی علما کے اتحاد سے ان عناصر کو شکست ہو گی جو ملک میں نفاق کا بیج بونا چاہتے ہیں۔انہوں نے کہاکہ فلسطین، کشمیرسمیت دنیا بھر کے مظلومین کے لیے آواز بلند کرنا ہم سب کی شرعی اوراخلاقی ذمہ داری ہے۔مسئلہ فلسطین پر خاموشی صیہونیت کو تقویت دینے کے مترادف ہے۔مسلمانوں کے قبلہ اول پر صیہونیوں کے قبضے کے خلاف آج پوری دنیا میں آواز بلند ہو رہی ہے۔ کشمیر و فلسطین کا تنازع محض کسی زمین کے ٹکڑے کے حصول کے لیے نہیں بلکہ ایک تاریخی حقیقت کو جھٹلانے اور نہتے مسلمانوں پر یہود و ہنود کی ظالمانہ کارروائیوں کی راہ میں رکاوٹ بننے کے لیے ہے۔عالم اسلام کو دنیا بھر کے مظلومین کی حمایت میں دو ٹوک موقف اختیار کرنا ہوگا۔
