وحدت نیوز (مظفرآباد) یوم پاکستان اس عہد کی تجدید کا دن ، کہ اپنے ملک کی خاطر کسی بھی قربانی سے دریغ نہیں کریں گے،کبھی بھی کہیں بھی ملک کو ہماری ضرورت پڑے اپنی خدمات کو پیش کریں گے، ان خیالات کا اظہار ریاستی سیکرٹری جنرل مجلس وحدت مسلمین پاکستان آزاد جموں و کشمیر علامہ سید تصور حسین نقوی الجوادی نے یوم پاکستان کے موقع پر وحدت سیکرٹریٹ مظفرآباد سے جاری ایک بیان میں کیا ، انہوں نے کہا کہ آج ملک کو بہت سے مسائل کا سامنا ہے، ملک میں دید و نادیدہ ہاتھ آگ و خون کی ہولی کھیلنے میں مصروف ہیں ، حکمران قومی مسائل سے غافل ہیں، حکمرانوں تک عام آدمی کی رسائی ممکن نہ ہے، پروٹوکول و سیکورٹی کے نام پر شاہانہ اخراجات ان کا شیوہ، جبکہ دوسری جانب مہنگائی،غربت اور دہشتگردی جیسے مسائل کا شکار اس ملک کا باسی کسی مسیحا کا منتطر ہے، اس طرح کے اقدامات اٹھائے جاتے ہیں کہ جن سے دور دور تک عام آدمی کو ریلیف تک میسر نہیں ہوتا۔

انہوں نے کہا کہ اقبالؒ کے خواب اور قائدؒ کے عمل نے اس ملک کو حقیقت کا روپ دیا، مسلمانوں نے اپنے خون سے اس کی آبیاری کی، ہمارے بزرگان نے طرح طرح کی مصیبتیں برداشت کیں ، کہیں کسی نے جان قربان کی تو کہیں کسی نے مال، کہیں کسی نے اپنا گھر بار قربان کیا ، کہیں کوئی اپنوں سے دور ہوا، یہ سب کس لیئے تھا ، صرف و صرف اس لیئے تھا کہ ایک ایسا ملک ہو جس میں ہم اپنی روایات و اسلامی نظام کے تحت آزادانہ زندگی بسر کر سکیں ، قائدو اقبال کا پاکستان ایسا ہی پاکستان تھا، اقبال کے اشعار کو دیکھیں یا قائد کے فرمودات ، ہمیں اس ملک کو بنانے کا مقصد اسلام نظر آتا ہے، مسلمان نظر آتا ہے،انہوں نے کہا کہ آج یوم پاکستان ، 1940کو ایک قرارداد منظور ہوئی ، جس نے ملک کے بننے میں کلیدی قردار ادا کیا ، آج بھی ہم 2015کے یوم پاکستان کے موقع پر ایک قرارداد پاس کریں ،اپنے دل سے، ایمان سے ، ایک قوم ہونے کی ، اتحاد و وحدت ، کہ آج سے ہم ایک ہو کر اپنے ملک کے لیئے اپنی قوم کے لیئے کام کریں گے، اور اپنے ملک کے لیئے کسی بھی سازش کو کامیاب نہیں ہونے دیں ، یہ ملک جیسے سب نے ملکر بنایا تھا ، ایسے ہی سب ملکر بچائیں گے