وحدت نیوز(لاہور) مجلس وحدت مسلمین صوبہ پنجاب نے لاہور کابینہ کےتعاون سے 9 مارچ بمطابق 20جمادی الثانی کوامام بارگاہ حسینہ ریلوے واشنگ لائن میں جشن ولادت باسعادت حضرت فاطمہ ؑ منانے کا اعلان کیا ہے ، جس میں مجلس وحدت مسلمین کے کارکنان سمیت شہر بھر کے مختلف علاقوں سے لوگ شرکت کریں گے۔ مجلس وحدت مسلمین نے اس تقریب کو جشن کوثر کا نام دیا جس میں دختر رسول ﷺ جناب سیدہ فاطمہ ؑ کی سیرت طیبہ پر روشنی ڈالی جائے گی ۔ تقریب میں مجلس وحدت مسلمین کے مرکزی سیکرٹری جنرل علامہ راجہ ناصر عباس جعفری خصوصی شرکت اور تقریب کے شرکا سے خطاب کریں گے۔ ایم ڈبلیو ایم انتظامیہ کا کہنا ہے کہ تقریب کے اختتام پر شرکا کے لیے قرعہ اندازی کا بھی خصوصی اہتمام کیا جائے گا جس میں ایک خوش نصیب کو بذریعہ قرعہ اندازی مشہد مقدس کا ٹکٹ بھی دیا جائے گا۔

وحدت نیوز (گلگت) مجلس وحدت مسلمین گلگت بلتستان کے رکن اسمبلی حاجی رضوان علی نے کہا ہے کہ ضلع نگر کے ساتھ امتیازی سلوک ہو رہا ہے اور نگر کے عوام کو ہر سطح پر دیوار سے لگایا جا رہا ہے۔ جب تک نگر کے ساتھ ہونے والی ناانصافیوں کا ازالہ نہیں ہوتا تب تک اس ایوان میں بیٹھنے کا مجھے کوئی حق نہیں۔ انہوں نے جی بی اسمبلی کے اجلاس میں وزیراعلٰی جی بی کے خطاب کے بعد پوائنٹ آف آرڈر پر ایوان سے خطاب کرتے ہوئے کہا کہ گلگت بلتستان تعلیمی لحاظ سے بہتری کی جانب جا رہا ہے، یونیورسٹیز کا قیام قابل تعریف ہے مگر وزیراعلٰی نے اپنے خطاب میں قراقرم یونیورسٹی کے ہنزہ کیمپس کی بات کی، غذر کیمپس کی بات کی، دیامر کیمپس کی بات کی اور استور کیمپس کی بھی بات کی، مگر نگر کیمپس کی کوئی بات نہیں کی، کیا ضلع نگر جی بی کی حدود میں نہیں ہے۔ انہوں نے کہا کہ نگر کے ساتھ ہونے والی امتیازی سلوک کا شواہد کے ساتھ بات کر رہا ہوں۔ حالیہ دنوں میں محکمہ تعلیم میں جو اسامیاں آئی ہیں ان میں ضلع نگر کو صرف سات اسامیاں دی گئی ہیں۔ کیا نگر کے لوگ تعلیم کا حق نہیں رکھتے ہیں۔

اسمبلی اجلاس میں حاجی رضوان نے کہا کہ انہوں نے کہا کہ دسمبر 2015ء میں ایف سی این اے میں ہونے والے ایک اعلٰی سطحی اجلاس کے دوران میں نے وزیراعلٰی کی موجودگی میں نگر تیس بیڈ ہسپتال کی اسامیوں کی بات کی۔ جس پر وزیراعلٰی نے کہا کہ نگر ہسپتال کی اسامیاں منظور ہو چکی ہیں، لیکن اگلے دن جب محکمہ صحت سے معلومات لیں تو نگر ہسپتال کیلئے ایک اسامی بھی موجود نہیں تھی۔ جس کے بعد میں نے دوبارہ کوششیں کیں، اسلام آباد تک گیا اور مسلسل وزیراعلٰی کو آگاہ کرتا رہا۔ وزیراعلٰی نے کئی مرتبہ یقین دہانی بھی کرا دی، مگر افسوس سے کہنا پڑتا ہے کہ نگر میں تیس بیڈ ہسپتال کے نام پر ایک ڈھانچہ ضرور موجود ہے، لیکن وہاں پر نہ تو کوئی ڈاکٹر ہے نہ کوئی پی سی فور منظور ہوا ہے۔ اس دوران انہوں نے یہ کہتے ہوئے ایوان سے واک آئوٹ کیا کہ ان حالات میں نگر کے نمائندے کے طور پر اس ایوان میں رہنا مناسب نہیں ہے۔ اس موقع پر سپیکر فدا محمد ناشاد کی ہدایت پر وزیراطلاعات اور پارلیمانی سیکرٹری میجر محمد امین باہر جاکر حاجی رضوان علی کو منا کر واپس ایوان میں لے آئے۔ سپیکر فدا محمد ناشاد نے اپنے ریمارکس میں کہا کہ آپ نے شکایت کی اس کا ازالہ کرنا حکومت کی ذمہ داریوں میں سے ہے۔

وحدت نیوز (سکردو) مجلس وحدت مسلمین گلگت بلستتان کے سربراہ آغا علی رضوی کی قیادت میں عوامی ایکشن کمیٹی بلتستان نے چھومک ہوتونگ تھنگ پر انتظامیہ کے ممکنہ آپریشن کے پیش نظر پانچویں روز بھی پہرہ دیا۔ پہرہ داری کے پانچویں روز عوامی ایکشن کمیٹی کے چیئرمین آغا علی رضوی و دیگر رہنماؤں غلام شہزاد آغا، شبیر مایار ، محمد علی دلشاد، بشارت شاہ جی، آصف ایڈووکیٹ کے ہمراہ سینکڑوں لوگ بھی موجود تھے۔ عوامی ایکشن کمیٹی اور چھومک کے عوام کو گرفتار کرنے کے لیے پولیس کی بھاری نفری بھی طلب کرلی گئی تھی۔ ایک موقع پر ایکشن کمیٹی اور پولیس آمنے سامنے آگئی تاہم کوئی ناخوشگوار واقعہ پیش نہیں آیا۔ اس موقع پر آغا علی رضوی اور دیگر رہنماوں نے کہا ہے کہ انتظامیہ جان بوجھ کر سرحدی علاقے میں امن و امان کا مسئلہ پیدا کرکے دشمن ملک کو خوش کرنا چاہتی ہے۔ حفیظ حکومت منظم سازش کے تحت بلتستان کے عوام کی زمینوں پر انہیں آپس میں لڑا کر قبضہ کرنا چاہتی ہے۔ عوام حفیظ حکومت کے عزائم کامیاب ہونے نہیں دیں گے۔ انہوں نے کہا کہ ہم کشتیاں جلاکر زمینوں کے تحفظ کیلئے نکلے ہیں، اب کسی کو زمینوں پر قبضہ کرنے نہیں دیں گے۔ چھومک ہوتونگ تھنگ کے معاملے پر شگر اور اسکردو کے عوام میں غلط فہمیاں پیدا کی جا رہی ہیں۔ یہ عوام کا مسئلہ ہے عوام اپنے مسئلے کو خود حل کریں گے۔ رات کی تاریکی میں آپریشن کرکے انتظامیہ نے بدترین مثال قائم کی گئی۔ اب مزید زیادتیاں برداشت نہیں کریں گے۔ ہم نے وطن عزیز کیلئے بے پناہ قربانیاں دی ہیں، مگر ہماری قربانیوں کے صلے میں ہماری زمینوں کو چھینا جا رہا ہے۔

وحدت نیوز(گلگت) وزیر اعظم اپنے دورہ گلگت کے موقع پر خالصہ سرکار کے نام پر ہونے والی زیادتیوں کے خاتمےکا اعلان کریں۔پیکیج کے نام پر گلگت بلتستان کی حیثیت کو مسخ کرنے کی کسی بھی کوشش کو عوام مسترد کردینگے۔وزیر اعظم پاکستان کا مجوزہ دورہ گلگت ماضی کے وزراء اعظم کی طرح سیر سپاٹے کی نذر نہ ہو بلکہ اس دورے کے ثمرات عوام کو ملنے چاہئیں۔

مجلس وحدت مسلمین گلگت بلتستان کے ترجمان محمد الیاس صدیقی نے اپنے بیان میں کہا ہے کہ خالصہ سرکار کالا قانون ہے جس سے گلگت بلتستان کا ہر فرد متاثر ہے اور عوام کا دیرینہ مطالبہ ہے کہ اس کالے قانون کو ختم کیا جائے اور آزاد کشمیر کی طرح گلگت بلتستان میں بھی سٹیٹ سبجیکٹ رولز نافذ العمل ہونا چاہئے۔انہوں نے کہا کہ خالصہ سرکار کے نام پر زمینوں جبری قبضے سے گلگت بلتستان کے عوام میں سخت تشویش پائی جاتی ہے اور یہ حساس مسئلہ نقص امن کا باعث بنتا جارہا ہے،وزیر اعظم پاکستان اپنے دورے کے موقع پر سبجیکٹ رولز کو بحال کرکے خطے کے عوام کا دیرینہ مطالبہ حل کرے اور یہاں کی زمینوں کو عوامی ملکیت قرار دیکر علاقے کے عوام میں پائی جانیوالی بے چینی کو دور کرے۔

انہوں نے کہا کہ گلگت بلتستان کے عوام کومسلسل ستر سالوں سے دھوکہ دیا جارہا ہے اور ہر آنے والی حکومت پیکیج کے نام پر عوام کو آئینی حقوق سے محروم رکھ کر ٹرخارہی ہے جو کہ یہاں کے بیس لاکھ عوام سے مذاق اڑانے کے مترادف ہے۔اب کی بار ایسی ناٹک نہیں چلنے دینگے اور آئینی حقوق کے کم کسی بھی پیکیج کو عوام قبول نہیں کرینگے۔