The Latest
وحدت نیوز(ٹنڈوالہیار) مجلس وحدت مسلمین ضلع ٹنڈوالہیارکی جانب سے یونٹ سازی کا سلسلہ جاری ہے، اس حوالے سے گوٹھ حاجی احمد خان شالاری میں ایم ڈبلیوایم کے نئے یونٹ کے قیام کیلئے جنرل باڈی اجلاس منعقد کیا گیا جس کی صدارت ضلعی سیکریٹری جنرل غلام رسول نے کی، اس موقع پراراکین نے کثرت رائے سے مولانا ضامن علی کو ایم ڈبلیوایم گوٹھ حاجی احمد خان شالاری کاسیکریٹری جنرل منتخب کرلیا ، ضلعی سیکریٹری جنرل غلام رسول نے نومنتخب یونٹ سیکریٹری جنرل سے انکے عہدے کا حلف لیا۔
وحدت نیوز(کوئٹہ) مجلس وحدت مسلمین کوئٹہ ڈویژن کے میڈیا سیل سے جاری شدہ بیان میں کونسلر رجب علی نے کوئٹہ شہر میں جاری صفائی مہم کے بارے میں کہا ہے کہ صفائی کسی شہر کی خوبصورتی اور خوشنمائی میں اضافے کا سبب بنتی ہے، ہمارا شہر آپ ہی قدرت کے رحمتوں کی بدولت خوبصورت ہے مگر بعض جگہوں پر صفائی کا نظام ٹھیک نہ ہونے کے باعث شہر کی خوبصورتی کہی کھو کر رہ گئی ہے۔ ہماری ذمہ داری ہے کہ ہم شہر کی خوبصورتی کو دوبارہ نکھارنے میں اپنا کردار ادا کرے۔ شہر میں صفائی کا نظام اچھا ہوگا تو ہمیں بہت سے فوائد حاصل ہونگے، جہاں آلودگی اور دیگر مضر صحت عناصر سے چھٹکارا ملے گا وہی شہر کی خوبصورتی دوبالا ہو جائے گی۔ اسلام ایک مکمل ضابطہ حیات ہے اور یہ ہمیں صفائی اپنانے کی تلقین کرتا ہے۔ ہمارے پیارے نبی ؐاور بزرگانِ دین نے صفائی پر بہت زور دیا ہے اور ہمیں مختلف واقعات کے توسط سے صاف رہنے اور صفائی اپنانے کی تلقین کی ہے۔
انہوں نے مزید کہا کہ ہمارا شہر صفائی کے اعتبار سے بے حد خستہ حال ہے ، مختلف علاقوں میں نالیاں گندگی پھیلانے کا باعث بن رہی ہے، جس سے شہریوں کو بیماریاں لاحق ہوتی ہیں اور اس طرح کی مختلف دیگر مسائل کا بھی سامنا ہوتا ہے۔ ان مسائل سے نجات کا راستہ واضح ہے اور وہ ہے صفائی، اسکے ساتھ ساتھ ایک اہم مسئلہ جو ہمیں گلی کوچوں میں نظر آتا ہے وہ کچروں کے ڈھیر کا جمع ہونا ہے۔ بعض غیر ذمہ دار افراد ان کچروں کی جمع ہونے کے سلسلے کی ابتداء کرتے ہیں، وہ لا شعوری میں کچرہ اپنی رہائشگاہ سے تو دور کر دیتے ہیں مگر اس بات کے بارے میں نہیں سوچھتے کہ باقی جگہوں کا کیا ہوگا۔ میٹرو پولیٹن کے نمائندیں اپنے اپنے علاقوں میں ان باتوں کا خیال رکھیں اور ہر شخص اپنے حصے کا کام ایمانداری سے پورا کرے تو ہمیں ان دو مسائل سے بھی نجات مل سکتی ہے۔
ان کا مزیدکہناتھاکہ حکومت کی جانب سے میٹروپولیٹن کو صفائی مہم کیلئے فنڈ جاری کر دیا گیا ہے اور یہ ہدایت کی گئی ہے کہ میٹروپولیٹن شہر میں صفائی کے ذریعے ماضی کی خوبصورتی کو دوبارہ اجاگر کرے۔ حکومت شہر اور عوام کی خوشحالی پر اپنی دلچسپی کا اظہار کررہی ہے جو کہ ایک اچھی بات ہے اور امید کی جا رہی ہے کہ حکومت اس بات کا دھیان بھی رکھے گی کہ یہ اقدامات کرپشن کے مواقع فراہم نہیں کریں گے۔ میٹروپولیٹن کارپوریشن کو اپنی کارکردگی دکھانے اور فرائض کی انجام دہی کا ایک اچھا موقع ملا ہے لہٰذا کونسلرز اس موقع سے قوم کو فائدہ دلا کر اپنے علاقوں میں بہترین کام کروائے اور ایسے نتائج پیش کرے کہ کسی کو بھی میٹروپولیٹن کی کارکردگی پر نکتہ چینی کا موقع نہ ملے۔ حکومتی ادارے جو کام کر رہے ہیں وہ عوام کی بلائی کیلئے ہیں اور ان اقدامات میں عوام کی فلاح کو مد نظر رکھا گیا ہے میٹرو پولیٹن کا کام شہر سے گندگی کا خاتمہ اور شہر کو صاف کرنا ہے ، صفائی کے بعد شہر کو صاف رکھنا عوام کی ذمہ داری ہے ہر شخص کے اپنے علاقے کو صاف رکھنے سے پورا شہر صاف رہے گا۔
وحدت نیوز(گلگت) حکومت سیلاب زدگان کو امداد فراہم کرنے میں ناکام ہوچکی ہے کئی علاقوں میں ابھی تک نقصانات کے تخمینے کیلئے اہلکار ہی نہیں پہنچے ہیں۔نلتر کوٹ محلہ اور ولدن کے مکینوں کے تحفظات دور کرکے واٹر چینل کی مرمت کا کام شروع کیا جائے تاکہ علاقے کو اندھیروں سے نجات مل سکے۔
ترجمان مجلس وحدت مسلمین محمد الیاس صدیقی نے کہا ہے کہ پچھلے 14 دنوں سے پورا علاقہ اندھیروں میں ڈوبا ہوا ہے جبکہ ڈیزل جنریٹرز کے ذریعے حکمرانوں اور بیوروکریٹس کیلئے بجلی فراہم کی جارہی ہے اور غریب عوام بجلی سے محروم ہیں جو کہ حکمرانوں کی عوامی مسائل سے عدم دلچسپی کا ثبوت ہے۔ کوٹ محلہ نلتر اور ولدن کے مکین واٹر چینل اور ٹینک کی زد میں ہیں اور کسی بھی وقت ان علاقوں کے مکین تباہی سے دوچار ہوسکتے ہیں سابق حکومت نے علاقے کے عوام کے خدشات کو محض وعدوں وعید پر ٹرخائے رکھا ۔یہاں کے عوام واٹر بم کے زیر سایہ ہر وقت خوف میں زندگی گزارنے پر مجبور ہیں حالانکہ یہاں کے عوام کے تحفظات پر سابق حکومت نے انہیں محفوظ مقامات پر منتقل کرنے کا وعدہ کیا تھا جو کہ وفا نہ ہوا۔حالیہ بارشوں کے نتیجے میں چینل ٹوٹ چکا ہے اور تاحال یہاں کے مکین خطرات کے پیش نظر گھروں سے بے گھر ہیں اور عوام کے احتجاج پر 18 میگا واٹ کے چینل کا مرمتی کام رکا ہوا ہے۔انہوں نے کہا کہ محض اخباری بیانات سے عوام کو ریلیف نہیں مل سکتاحکومت فوری طور پر عوامی تحفظات کو دور کرے اور علاقے کی بجلی بحال کرنے میں اپنی توانائیاں صرف کرے۔مشکل کی اس گھڑی میں عوام کو ریلیف پہنچانے سے زیادہ حکومت کونسل کے الیکشن میں من پسند نتائج کے حصول کیلئے سازشوں میں مصروف عمل ہے۔
وحدت نیوز (کوئٹہ) مجلس وحدت مسلمین کوئٹہ کے سیکریٹری جنرل عباس علی نے کہاہے کہ پاکستان بالخصوص کوئٹہ شہر کو تعلیم کے شعبے میں ترقی دینا ہمارا شعار ہے۔ان خیالات کااظہار انہوں نے ایک وفد سے بات چیت کرتے ہوئے کیا ،انہوں نے کہا کہ ہر عام و خاص بالخصوص نوجوان نسل کی ترقی کیلئے ہم شروع ہی سے کوشاں ہیں۔ ہم صوبے بھر میں تعلیم کو عوام الناس کیلئے عام کرنا چاہتے ہیں، ہم چاہتے ہیں کہ اچھی اور معیاری تعلیم ہر ایک کے دسترس میں ہو۔ ہمارے نوجوانوں میں تعلیم کے حصول کا ایک غیر معمولی جذبہ دیکھنے کو ملتا ہے موجودہ نوجوان نسل تعلیم کی طرف زیادہ توجہ دے رہے ہیں جو ہمارے مستقبل اور قوم کی ترقی کیلئے ایک نیک شگن ہے۔
انہوں نے وفد سے گفتگوکرتے ہوئے کہا کہ غیر معیاری تعلیم کے فروغ کی وجہ سے جو افراد قابلیت رکھتے ہیں انہیں انکے حق سے محروم رکھا جا رہا ہے۔ یہ صوبے کی ترقی کو روکھنے والا عمل ہے جس سے صوبے میں ترقی کی شرح میں کمی واقع ہوتی ہے اور اسی طرح سرکاری دفاتر میں نا اہل افراد جگہ پاتے ہیں اور سارا نظام خراب ہو جاتا ہے۔ سرکاری نظام کے خرابی سے صوبے میں کرپشن، بدعنوانی، رشوت ستانی اور دیگر برے افعال میں اضافہ ہوگا، آئیندہ اگر ہم ان چیزوں پر قابو پا لے تو شاید بلوچستان ، پاکستان کا اہم ترین صوبہ بن جائے گا اور وطن عزیز پاکستان کے لئے ترقی کی ایسی راہ ہموار ہوگا جسکی پورے تاریخ میں شاید ہی کوئی مثال ملے۔
آخرمیں ان کا کہناتھاکہ یہ صوبہ بلوچستان میں میرٹ کی پامالی کا منہ بولتا ثبوت ہے اور حقدار کی حق تلفی سے ادارے میں مزید خرابیوں کا آغاز ہوگا اور یہی بات کل کو صوبے کی پسماندگی کا باعث بنی گی۔ ایسے اسکولز کے رپورٹ بھی سامنے آئے جن میں تین ،چار اور درجن کے قریب اساتذہ ریٹائرمنٹ لے چکے ہیں اور ابھی تک ان کی جگہ نئے اساتذہ بھرتی نہیں کیے گئے ہیں۔علاوہ ازیں اسکولز میں معلم قرآن کا نہ ہونا یا تعینات نہ کیاجانا قابل تشویش ہے۔
وحدت نیوز(جیکب آباد) وارثان شہداء کمیٹی اور زخمیوں کی جانب سے اپنے مطالبات کے حق میں کوئٹہ روڈ پر احتجاج کر کے علامتی دھرنا دیا گیا۔دھرنے سے خطاب کرتے ہوئے مجلس وحدت مسلمین کے رہنمااور چیئرمین شہداء کمیٹی علامہ مقصود علی ڈومکی نے کہا کہ 6ماہ گذر گئے مگر آج تک متاثرین سے کئے گئے حکومتی وعدے پورے نہیں ہوئے۔ زخمیوں کو مکمل چیک دیئے گئے نہ ہی ان کا مکمل علاج کرایہ گیا ۔جیکب آباد اور شکارپور سمیت سندہ بھر میں دہشت گردوں کے اڈوں کے خلاف پولیس اور رینجرز کا مشترکہ آپریشن کیا جائے ۔وزیراعلیٰ سندہ ،وارثان شہداء سے کئے گئے معاہدے پر جلد عمل در آمد کو یقینی بنائیں ۔انہوں نے کہا کہ زخمیوں کاعلاج نہیں ہو رہا وہ کراچی میں دھکے کھا رہے ہیں جبکہ زخمیوں کو چیکس بھی نہیں د ئیے جا رہے۔
اس موقعہ پر دھرنے سے شہداء کمیٹی کے رہنماء سید غلام شبیر نقوی،نثار احمد ابڑو،سید فضل عباس شاہ و دیگر نے خطاب کیا ۔اس موقعہ پر سانحے کے زخمیوں نے حکومت سے مطالبہ کیا کہ ان کا مکمل علاج کرایہ جائے اور وارثان شہداء کو انصاف دیتے ہوئے بقیہ دہشت گرد گرفتار کیے جائیں ۔انہوں نے مطالبہ کیا کہ شھید محمد شریف جتوئی کا کیس سابقہ SPسمیت ذمہ داراہلکارروں کے خلاف درج کیا جائے اور وزیر اعلیٰ نے جس انکوائری کمیٹی کا وعدہ کیا تھا وہ اپنی رپورٹ جلد پیش کرے۔
وحدت نیوز (اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے کہا ہے کہ راجن پور میں سات ضلعوں کی پولیس فورس کی ڈیرھ سو کے لگ بھگ قانون شکنوں کے ہاتھوں شکست پنجاب حکومت کے لیے نہ صرف ذلت کا باعث ہے بلکہ شہباز شریف کی نام نہاد گڈ گورننس کو سمجھنے کے لیے بھی کافی ہے۔انہوں نے کہا کہ ماڈل ٹائون میں نہتی خواتین پر گولیاں برسانے والی پنجاب پولیس چھوٹوگینگ کے آگے ڈھیر ہوگئی، پنجاب کی کچھ سیاسی شخصیات نے دوسروں کو ڈسوانے لیے جو سانپ پال رکھے تھے ان سانپوں نے اب اپنے مالکوں کی طرف پھن سیدھے کر لیے ہیں۔ پنجاب پولیس کے ذریعے ان کو کچلنے کی کوشش کی جا رہی تھی تاکہ ان سہولت کاروں کے ناموں کوراز ہی رہنے دیا جائے جو بدامنی اور قتل و غارت کے لیے اس گینگ کو گزشتہ دو دہائیوں سے استعمال کر رہے تھے۔
انہوں نے کہا کہ اگر بروقت ملٹری آپریشن کافیصلہ نہ ہوتا تو ان جرائم پیشہ عناصر کو یا تو محفوظ راستہ دے کر فرار کر ا دیا جاتا یا پھر یہ جعلی پولیس مقابلے کی نذر ہو جاتے۔سربراہ ایم ڈبلیو ایم نے راجن پور میں قیام امن کے لیے فوج کی کوششوں کو سراہتے ہوئے مطالبہ کیا ہے کہ پنجاب بھر میں دہشت گردوں کی بہت ساری پناہ گاہیں موجود ہیں۔ان ملک دشمن عناصر کی بیخ کنی کے لیے پورے پنجاب میں بھرپور فوجی آپریشن کی اشد ضرورت ہے۔پنجاب بھر میں سرچ آپریشن کیا جانا چاہییے اور ملک دشمن عناصر کو ان کی کمین گاہوں سے نکال کر کیفر کردار تک پہنچایا جانا چاہیے۔
انہوں نے کہا کہ ملک میں امن کا قیام کا واحد حل بھرپور فوجی آپریشن ہے۔ مسلم لیگ نون کی موجودہ حکومت دہشت گردوں کے خلاف کاروائی میں مصلحت اور دباو کا شکار ہوتی آئی ہے۔ان سیاسی حکمرانوں میں ملک دشمن عناصر کی آنکھوں میں آنکھیں ڈال کر بات کرنے کی اخلاقی جرائت سرے سے موجود نہیں۔ایسی صورتحال میں بیس کروڑعوام دہشت گردوں کی سرکوبی کے لیے فوج کی طرف دیکھ رہی ہے۔انہوں نے کہا کہ گرفتار دہشت گردوں سے ملنے والی معلومات کی بنیاد پر ان تمام سہولت کاروں کو بھی حراست میں لیا جائے جنہوں نے پاکستان دشمن قوتوں کے حوصلے بلند کیے ہوئے تھے۔
وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری،پاکستا ن عوامی تحریک کے سیکرٹری جنرل خرم نواز گنڈاپوراور سنی اتحاد کونسل کے چیئرمین صاحبزادہ حامد رضا نے ایم ڈبلیو ایم کے مرکزی سیکرٹریٹ میں ہونے والی مشترکہ میڈیا بریفنگ میں وزیر اعظم نواز شریف سے مستعفی ہونے کا مطالبہ کیا ہے۔علامہ راجہ ناصر نے کہا کہ پانامہ لیکس پر نواز شریف خاندان کے بیانات کا تضاد حقائق تک پہنچنے کے لیے کافی ہے۔حکمران خاندان سے سرزد ہونے والے جرائم سے پردے اٹھ چکے ہیں ۔نواز حکومت کا کوئی بھی ذمہ دار اس حقیقت سے انکار نہیں کر رہا بلکہ غیر منطقی وضاحتوں کے ہیر پھیر میں اس چھپانے کی سر توڑ کوشش کی جا رہی ہے۔کرپٹ حکومت کبھی بھی نجات دہندہ نہیں ہو سکتی ہے۔قوم کا پیسہ لوٹنے والوں کو کیفر کردار تک پہنچایا جانا چاہییے۔پاکستان کو ایشا کا ٹائیگر بنانیکے دعویداروں کے پاس اپنے ملک میں علاج کے لیے کوئی ایک ہسپتال بھی موجود نہیں۔ ہم مل کر ان لٹیروں کا محاسبہ کرنا ہو گا۔اگر پارلیمنٹ ،عدلیہ اور دیگر مقتدر قوتیں مل کر بھی ان کرپٹ عناصر کا محاسبہ نہیں کر سکتیں تو پھر انہیں آئین کو بدل کر حق حکمرانی کے لیے چور لٹیروں کو قانونی تحفظ دے دینا چاہیے۔آصف علی زراداری اور نواز شریف کی متوقع ملاقات کے ایک سوال کے جواب میں انہوں نے کہا کہ اب کرپٹ اور بااصول سیاستدان دو گروہوں میں تقسیم ہو جائیں گے،کرپشن کے حامی اور مخالفین کی صف بندی ہو رہی ہے،اب عوام کے لیے بھی سمجھنے میں آسانی ہو جائے گی کہ کون محب وطن ہے اور کون ملک کا بیوپاری، جمہوریت کو کسی اور سے نہیں کرپشن سے خطرہ لاحق ہے ۔خرم نواز گنڈاپور نے کہا ہے کہ تین ممالک کے وزار سمیت دیگر مقتدر شخصیات کا مستعفی ہونا پانامہ لیکس کے درست ہونے کا بین ثبوت ہے۔پوری قوم وزیر اعظم نواز شریف کے فوری استعفی کا مطالبہ کر رہی ہے۔انہوں نے کہا کہ پارلیمنٹ ،ملک کے تحقیقاتی اداروں اور سپریم کورٹ کو اپنا کردار ادا کرنا ہو گا۔پاکستان کے لوٹے ہوئے200 بلین ڈالر کی سوئزر لینڈ میں موجودگی کا انکشاف وفاقی وزیر خزانہ کر چکے ہیں۔اگر حکومت یہ رقم واپس لے آئے تو ہم حکومت کے شانہ بشانہ کھڑے ہوں گے۔
عوامی تحریک کے مرکزی رہنما نے کہا کہ راجن پور میں چھوٹو گینگ پر ردعمل کا اظہار کرتے ہوئے کہا کہ سانحہ ماڈل ٹاون میں جس پنجاب پولیس نے 14 نہتے مرد و خواتین کو شہید اور 85سے زائد کو زخمی کر دیا تھا آج وہی پنجاب پولیس اپنے ساتھ اضلاع کی بھرپور طاقت کے ساتھ چھوٹو گینگ کے 150 کے سامنے بے بس دکھائی دے رہی ہے۔صوبہ پنجاب میں کراچی طرز کا ملٹری آپریشن ہمارادیرینہ مطالبہ رہا ہے۔لیکن حکومت انہیں فوج کے ہاتھوں گرفتار کروانے کی بجائے پولیس کی مدد سے ختم کرنا چاہتی تھی تاکہ جنوبی پنجاب میں دہشت گردوں کے سہولت کاروں کے ثبوت کو مٹایا جا سکے۔
سنی اتحاد کونسل کے چیئرمین صاحبزادہ حامد رضانے کہا پنجاب حکومت میں وزرا، ایم پی ایز اور اعلی حکومتی عہدیداران چھوٹو گینگ کے سہولت کار ہیں۔راجن پور میں بھرپور فوجی آپریشن نے وزیر اعلی پنجاب شہباز شریف اور وزیر قانون رانا ثنا اللہ کے اس دعوے کی قلعی کھول دی ہے کہ پنجاب میں کوئی نوگو ایریاموجود نہیں۔ہمارا مطالبہ ہے کہ رینجرز کو پنجاب میں سندھ اور کراچی طرز کے اختیارات دیے جائیں ۔جن شخصیات کے کالعدم جماعتوں سے رابطے ہیں ان کے خلاف بھی بھرپور فوجی آپریشن کیا جاناچاہیے۔پانامہ لیکس پر اپنا ردعمل ظاہر کرتے ہوئے انہوں نے کہا کہ تحقیقات کے نام پر نواز شریف کو محٖفوظ راستہ فراہم کرنے کی کوشش کی جا رہی ہے۔پاکستان قوم کا روپیہ غیر قانونی طریقے سے ملک سے باہر لے جانے کا جرم قابل معافی نہیں۔وزیر اعظم فوری طور پر مستعفی ہونے کا اعلان کریں۔ بصور ت دیگر مشترکہ احتجاجی تحریک کا اعلان کیا جائے گا۔رائے ونڈ، جاتی عمرہ ہر جگہ احتجاج کا ہمیں حق حاصل ہے۔ہمیں اس سلسلے میں کوئی رکاوٹ قابل قبول نہیں ۔
وحدت نیوز (اسلام آباد) پاکستان عوامی تحریک کے مرکزی جنرل سیکریٹری محترم خرم نواز گنڈا پور اور سنی اتحاد کونسل کے چیئرمین محترم صاحبزادہ حامد رضانے مجلس وحدت مسلمین پاکستان کے مرکزی سیکریٹریٹ میں علامہ راجہ ناصرعباس جعفری سے خصوصی ملاقات کی، اس موقع پر دونوں رہنمائوں نے علامہ راجہ ناصرعباس کو تیسری مدت کے لئے بھاری اکثریت سے ایم ڈبلیوایم کا سیکریٹری جنرل منتخب ہونے پر مبارک باد پیش کی اور ان کی خدمت میں پھولوں کا گلدستہ پیش کیا، علامہ راجہ ناصرعباس نے دونوں رہنمائوں کی آمد اور نیک خواہشات پر ان کا شکریہ ادا کیا۔
وحدت نیوز (سعیدآباد) مجلس وحدت مسلمین نے سندھ کی بڑی اپوزیشن جماعت پاکستان مسلم لیگ فنکشنل کی اہم وکٹ گرادی، فنکشنل لیگ کے سینئررہنما سید پریل شاہ انکے فرزند سید فدا شاہ ١ور انور علی شاہ آف امین لاکھو سعید آباداپنے سیکنٹروں ساتھوں سمیت مجلس وحدت مسلمین میں شامل ہوگئے ہیں، ایم ڈبلیوایم ضلع مٹیاری کے سیکریٹری اطلاعات حمیرعلی میمن کے مطابق ایم ڈبلیوایم کے رہنما سید فرمان شاہ کاظمی اور ضلعی سیکریٹری جنرل علامہ اختر علی شریعتی سےطویل گفت وشنید کے بعدمسلم لیگ فنکشنل سے بچاس سالہ طویل وابستگی رکھنے والے سید غوث شاہ کے قریبی ساتھی، 1965 کی پاک بھارت جنگ میں حر فورس کی جانب سے حصہ لینے والے سید پریل شاہ اپنے فرزندوں سید فدا شاہ ١ور انور علی شاہ سمیت سیکنٹروں کارکنان اور ہمدردوں سمیت مجلس وحدت مسلمین میں شامل ہو چکے ہیں ، حمیر میمن کے مطابق ایم ڈبلیوایم میں شامل ہو نے والے سید پریل شاہ اوران کے ساتھی سربراہ مجلس وحدت مسلمین پاکستان علامہ راجہ ناصرعباس جعفری کے جلد متوقع دورہ ہالا کے موقع پر ایم ڈبلیوایم میں باضابطہ شمولیت کا اعلان کریں گے،واضح رہے کہ حالیہ ضمنی انتخابات میں ایم ڈبلیوایم کی دوسری بڑی سیاسی قوت بننےاور بھٹ شاہ میں کامیاب عوامی جلسہ عام کے بعد علاقے کے محروم عوا م مجلس وحدت کو اپنا نجات دہندہ سمجھ رہے ہیں، جبکہ علاقے کی بڑی سیاسی وسماجی شخصیات سے مسلسل رابطے جاری ہیں جلد ہی دیگر بااثرشخصیات بھی ایم ڈبلیوایم میں شمولیت کا اعلان کریں گی۔
وحدت نیوز (اسلام آباد) مجلس وحدت مسلمین پاکستان کے مرکزی جنرل سیکریٹری علامہ ناصر عباس جعفری , پاکستان عوامی تحریک کے مرکزی جنرل سیکریٹری محترم خرم نواز گنڈا پور اور سنی اتحاد کونسل کے چیئرمین محترم صاحبزادہ حامد رضا کل مورخہ 16 اپریل 2016بروز ھفتہ شام 6:30 بجے ایم ڈبلیو ایم کے مرکزی سیکریٹریٹ مکان نمبر 2A، گلی نمبر 25، F6/2 اسلام آباد میں ایک اہم پریس کانفرنس کریں گے۔ تمام پرنٹ اور الیکٹرونک میڈیا نمائندگان سے گزارش ہے کہ مذکورہ پروگرام کی کوریج کے لیے اپنے رپورٹر اور کیمرہ مین کو متعین کریں۔
