وحدت نیوز (اسلام آباد) مجلس وحدت مسلمین پاکستان کے سیکریٹری جنرل  علامہ راجہ ناصرعباس جعفری اور ڈپٹی سیکریٹری جنرل علامہ امین شہیدی نے کہاکہ سیلاب کے باعث ہزاروں ایکڑ اراضی پر کھڑی فصلیں تباہ ہوچکی ہیں لاکھوں افراد بے گھر ہو چکے ہیں اور قیمتی جانوں کے ضیاء کا اندیشہ بھی موجود ہے، مسلم لیگ ن فتح کا جشن منانے کی بجائے بے گھر افراد کی طرف توجہ دے۔علامہ راجہ ناصرعباس جعفری نے کہا ہے کہ حکومت چترال، پنجاب اور سندھ میں زیر آب آنے والے علاقوں میں امدادی کاروئیوں کی رفتار کو تیز کرے۔اس ناگہانی آفت کے نتیجے میں متاثر ہونے والے لاکھوں افراد کو ضروریات زندگی کی بلاتعطل فراہمی ریاست کی اولین ذمہ داری ہے ۔ریاست کے تمام اداروں سمیت انسانی حقوق کی عالمی تنظیموں اور درد دل رکھنے والی مخیر شخصیات کو بھی مشکل کی اس گھڑی میں بے گھر افراد کی مدد اور بحالی میں کوئی کسر نہیں چھوڑنی چاہیے۔انہوں نے کہا کہ ترقی یافتہ ممالک میں ناگہانی آفات سے نمٹنے کے لیے قبل از وقت حفاظتی اقدامات کیے جاتے ہیں تا کہ نقصانات کی شرح کم سے کم درجہ پر رہے ۔لیکن ہمارے ہاں صورتحال اس کے برعکس ہے۔ہر سال ہزاروں ایکڑ رقبہ سیلاب کی نذر ہو جاتا ہے۔ لاکھوں افراد سیلاب کی تباہ کاریوں سے غربت کے گراف سے بھی نچلی سطح پر زندگی گزارنے پر مجبور ہو جاتے ہیں۔متاثر ہ علاقوں میں وبائی امراض اورغذائی قلت جیسی آفات نے ہر دوسرے گھر میں ڈیرہ ڈال رکھا ہوتا ہے۔ سینکڑوں قیمتی جانیں حکومتی عدم توجہی کے سبب موت کے منہ میں چلی جاتی ہیں۔ حکومت کی یہ ذمہ داری ہے کہ وہ ان آفات سے نمٹنے کے لیے جامع لائحہ عمل طے کرے۔ جن علاقوں میں سیلاب کا اندیشہ ہو وہاں قبل از وقت حفاظتی تدابیر اور پانی کے بہاو کی رفتار کو معمول پر لانے کے لیے ضرورتی تعمیرات کی جائیں۔ انہوں نے کہا کہ سیلاب زدگان کے ساتھ جا کر محض فوٹو سیشن سے ان کے دکھوں کا مداوہ نہیں کیا جا سکتا بلکہ ان ناگہانی آفات کی روک تھام کے لیے مستقل منصوبہ بندی ازحد ضروری ہے۔

وحدت نیوز (اسلام آباد) مجلس وحدت مسلمین کے مرکزی ڈپٹی جنرل سیکریٹری علامہ امین شہیدی نے یوم انہدام جنت البقیع کے موقع پر مرکزی میڈیا سیل سے جاری اپنے ایک بیان میں کہا ہے کہ جنت البقیع کے مقدسات کی مسماری امت مسلمہ کے ایمان کا اامتحان ہے۔ نوے سال قبل سعودی بادشاہ عبد العزیز السعود نے جنت البقیع میں خاتون جنت حضرت فاطمۃ الزہرا سلام اللہ علیہ سمیت امہات المومنینؓ اور صحابہ کرامؓ کی سینکڑوں قبروں کو بلڈوز کر کے توہین رسالت، توہین اہلبیت ؑ ،توہین ازواج رسول ﷺ اور توہین صحابہؓ کا کھلم کھلا ارتکاب کیا ہے۔ انہوں نے کہا شعائر اللہ کی حفاظت ہر مسلمان کا شرعی فریضہ ہے۔ آل سعود نے خاندان بنو امیہ سے اپنی نسبت ثابت کرنے کے لیے ہمیشہ اہلبیت علیہم السلام کے مقدسات کو نشانہ بنایا ۔ خاندان نبوت کی شان میں گستاخی کے لیے کبھی قلم کو اور کبھی جبر کے ہتھیار کو استعمال کیا گیا۔عالمی دہشت گرد تنظیم داعش بھی سعودیہ کی تقلید میں انبیا و صحابہ کرامؓ اور اہلبیت ؑ اطہار کی قبروں کو کھود کر ان کے اجساد مبارکہ کی توہین کو عین شریعت سمجھتے ہیں۔جس سے سعودی عرب اور داعش کے مشترکہ عزائم کی قلعی کھل کر سامنے آ جاتی ہے۔علامہ امین شہیدی نے اقوام متحدہ ،او آئی سی اور دیگر عالمی تنظیموں سمیت مسلمان حکمرانوں سے مطالبہ کیا کہ وہ سعودی حکومت پر زور دیں کہ جنت البقیع میں حضرت فاطمہ الزہراؑ کے روضہ مبارک سمیت اہلبیت ؑ ، ازواج رسول اللہ ﷺ  اور صحابہ کرام کی قبروں کو دوبارہ عالیشان انداز میں تعمیر کیا جائے تاکہ عالم اسلام کو درپیش اضطراب کا خاتمہ ہو ۔

وحدت نیوز (اسلام آباد) مجلس وحدت مسلمین کے مرکزی ڈپٹی جنرل سیکریٹری علامہ امین شہیدی نے کہا ہے عالمی دہشت گرد تنظیم داعش کی پاکستان میں سرگرمیاں روکنے کے لیے ریاستی اداروں کی طرف سے سنجیدہ ،موثر اور فوری اقدامات کی اشد ضرورت ہے۔طالبان کے مربیوں کی ہمدردیاں اب داعش کی جانب رخ موڑ رہی ہیں۔داعش کا اسلام سے کوئی تعلق نہیں بلکہ یہ شیطانی گروہ یہود و نصاری کے اسلام دشمن ایجنڈے کے اہداف کی تکمیل کے لیے سرگرم ہے جن کا مقصد دین اسلام کو اقوام عالم کے سامنے ایک بھیانک اور ایک غیر انسانی مذہب کے طور پر متعارف کرانا ہے۔صیہونی و نصرانی طاقتیں اسلام کی تیزی سے بڑھتی ہوئی مقبولیت سے خائف اور امت مسلمہ کو تباہ حال کرنے پر تُلا ہوئے ہیں۔اپنے جارحانہ عزائم کی تکمیل کے لیے انہوں نے ایسے عالمی غنڈوں کی خدمات حاصل کر رکھی ہیں جنہوں نے مذہب کا لبادہ اوڑھ رکھا ہے۔ پاکستان کے استحکام اور سالمیت کو ان دہشت گردوں کے ہاتھوںیرغمال نہ بننے دیا جائے۔کراچی میں جاری آپریشن نے دہشت پسند عناصر کے حوصلوں پر کاری ضرب لگائی ہے۔ آخری دہشت گرد کے خاتمے تک یہ آپریشن اسی طرح جاری رہنا چاہیے اور کالعدم تنظیموں کو دوبارہ منظم نہ ہونے دیا جائے۔بصورت دیگر آپریشن کے مطلوبہ نتائج حاصل نہیں کیے جا سکیں گے۔انہوں نے کہا کہ بلوچستان اور خیبر پختونخواہ میں دہشت گردوں کے سہولت کار اب داعش کی طرف اپنے تعاون کا ہاتھ بڑھا رہے ہیں جو انتہائی تشویشناک ہے ۔دہشت گردی کے خاتمے کے لیے ان سہولت کاروں کے گرد شکنجہ سخت کرنے کی ضرورت ہے۔داعش سے فکری ہم آہنگی رکھنے والی ان متحرک شخصیات پر نظر رکھنی ہو گی جو داعش کے نظریات کو حقیقی اسلام کا نام دے کر لوگوں کو گمراہ کر رہے ہیں۔ مک دشمن سرگرمیوں میں ملوث مدرسوں کے منتظمین اور ان کی مالی معاونت کرنے والوں کو بھی دہشت گرد اور ملکی مفاد کے منافی سرگرمیوں میں ملوث قرار دے کر سخت ترین سزائیں دی جائیں ۔تاکہ ملک امن کو گہوارہ بن سکے

وحدت نیوز (اسلام آباد) مجلس وحدت مسلمین پاکستان کے زیراہتمام القدس ریلی مرکزی امام بارگاہ جی سکس ٹو اسلام آبادٍ سے نکالی گئی جس میں فلسطین کے مظلومین سے حمایت کے لیے سینکڑوں افراد شریک ہوئے۔ ریلی کی قیادت مجلس وحدت مسلمین کے مرکزی ڈپٹی جنرل سیکریٹری علامہ امین شہیدی نے کی۔ ڈی چوک پہنچ کر مجلس وحدت مسلمین اور امامیہ سٹوڈنٹس آرگنائزیشن کے رہنماوں نے شرکا سے خطاب کیا۔ اس موقعہ پر علامہ امین شہیدی نے کہا کہ قبلہ اول پر صیہونی تسلط اور اسرائیلی بربریت پر عالم اسلام کی خاموشی لمحہ فکریہ ہے۔یہ توقع رکھنا کہ عرب ممالک یا کوئی عالمی طاقت فلسطین کے مسلمانوں کی حمایت کے لیے میدان میں نکلے گی تو یہ خام خیالی ہے۔اپنے حقوق کے حصول کی جدوجہد کے لیے ہمیں خود آواز بلند کرنا ہو گی۔اب امت مسلمہ کی بیداری کا وقت آگیا ہے۔ آل سعود، یہود و نصاری اور ان کے گماشتوں نے اسلام کا بدن لہو لہو کر رکھا ہے۔یہ عالمی طاقتیں ہمیشہ اسلامی مفادات کے برعکس مصروف عمل رہی ہیں۔داعش ، طالبان، النصرہ اور اسی طرح کی بیشترعالمی دہشت گرد تنظیمیں اسلام دشمن استعماری طاقتوں کے مفادات کے لیے کام کر رہی ہیں تاکہ اقوام عالم کے سامنے اسلام کی تصویر ایک بھیانک اور غیر انسانی مذہب کے طور پر پیش کی جا سکے امام امت خمینی بت شکن نے یوم القدس کے زریعے عالمی استعماری قوتوں کے خلاف قیام کا درس دیا۔ داعش کے ذریعے غیر انسانی سزاوں پر اقوام عالم کی توجہ مرکوز کر کے ایک طرف اسلام کو بدنام کیا جا رہا ہے دوسری طرف غزہ، شام، عراق اور دنیا کے دیگر حصوں میں امت مسلمہ پر جاری ظلم و بربریت سے توجہ ہٹائی جا رہی ہے۔اب اسلام کے لبادے میں چھپے دشمنوں کی شناخت کا وقت آ گیا ہے۔جب تک ہمیں ان عالمی قوتوں کے پس پردہ مقاصد کا ادراک نہیں ہو گا تب تک ہم کسی اصولی موقف پر اٹل نہیں ہو سکیں گے جو ہم سب کے لیے سخت نقصان دہ ہے۔انہوں نے کہا بلوچستان میں داعش مکمل طور پر منظم ہو چکی ہے۔وہاں موجود جہادی کالعدم تنظیمیں داعش کی مکمل طور پر شریک کار ہیں اور ساری شیطانی قوتیں ایک جھنڈے تلے جمع ہو چکے ہیں۔کراچی میں ہونے والے صفورا چورنگی کا المناک سانحہ داعش کی کارستانی ہے۔انہوں نے کہا کہ ان مذموم عناصر کی پاکستان میں موجودگی طالبانی قوتوں سے زیادہ خطرناک ہے۔حکومت اور ملکی سلامتی کے اداروں کو چاہیے کہ وہ ان عناصر کے تدارک کے لیے فوری بھرپور اور فیصلہ کن آپریش کریں تاکہ یہ وطن عزیز دہشت گردی کی غلاظت سے پاک ہو سکے۔ریلی میں ایم ڈبلیو ایم کے مرکزی رہنما علامہ اصغر عسکری نے فلسطین سمیت دنیا بھر کے مظلومین کے حق میں قراردادبھی پیش کی جس کی شرکا نے اللہ اکبر کی صدا سے تائید کی۔

وحدت نیوز(کراچی) مجلس وحدت مسلمین پاکستان کے مرکزی ڈپٹی سیکریٹری جنرل علامہ امین شہیدی نے کہا حکومت نیشنل ایکشن پلان کو دانستہ طور پر ناکام کرنے کی کوشش کر رہی ہے۔ملک میں اسی ہزار بے گناہ انسانی جانوں کے خون سے ہاتھ رنگنے والی کالعدم تنظیموں کے خلاف کاروائی سست روی کا شکار ہے جس سے اس پلان کی افادیت ماند ہوتی ہوئی دکھائی دے رہی ہے۔ کراچی میں معروف سماجی شخصیت عدیل عباس کی ٹارگٹ کلنگ میں ملوث دہشتگردوں کی عدم گرفتاری اس بات کا ثبوت ہے کہ حکومت نے دہشت گردی کی یہ جنگ تنہا فوج پر چھوڑ رکھی ہے اور خود زبانی دعووں سے کام چلایا جا رہا ہے۔ملک کے اٹھارہ کروڑ عوام اس تذبذب میں مبتلا ہیں کہ حکمران دہشت گردوں اور ان کے سہولت کاروں پر ہاتھ ڈالے سے آخر کیوں گریزاں ہے۔ہمار ا مطالبہ ہے کہ نیشنل ایکشن پلان کو کھوکھلا نعرہ بنانے کی بجائے دہشت گردی کے خاتمے کے لیے موثر ہتھیار کے طور پر استعمال کیا جائے۔ان خیلات کا اظہار انہوں نے شہید عدیل عباس کی مجلس برسی سے خطاب کے دوران کیا ان کا کہنا تھا کہ ملک میں جاری دہشت گردی کا سب سے زیادہ نقصان ملت تشیع اور پاکستان کی فوج کو اٹھانا پڑا۔شہید عدیل عباس اتحاد بین المسلمین کے داعی تھے آپ کی سماجی خدمات کو کبھی نہیں بلایا جاسکتا ،ان کی دہشتگردی سے قومی نقصان ہوااور اس نقصان کا ازالہ نہ ممکن ہے۔انہوں نے کہا نیشنل ایکشن پلان پر حقیقی معنوں میں عمل درآمد کے لیے ضروری ہے تا کہ دہشت گردعناصر کی سرکوبی کے ساتھ ساتھ ان پشت پناہوں پر بھی مضبوط ہاتھ ڈالیں جائیں جو دہشت گردی کی کاروائیوں کو کامیاب بنانے کے لیے ان عناصر کو معاونت فراہم کرتے ہیں۔ملک میں موجود تکفیری گروہوں نے اپنے مفادات کے حصول کے لیے ملک کی سلامتی و بقا کو داو پر لگا رکھا ہے۔اگر فوج طالبان اور دیگر شیطانی قوتوں کے خلاف آپریشن کا فیصلہ نہ کرتی تو آج کراچی کے گلی کوچے وزیرستان کی تصویر پیش کر رہے ہوتے۔دہشت گردوں کے خلاف کسی حتمی فیصلے کے اظہار میں حکومتی پس و پیش اس حقیقت کو ثابت کرتا رہا کہ اس ملک کے نااہل حکمرانوں میں اتنی ہمت نہیں کی کہ وہ قومی وقار کو پیش نظر رکھ کر کوئی جرات مندانہ فیصلہ کرسکیں۔غاصب حکمرانوں کی ناکارہ پالیسوں نے وطن عزیز کو اقتصادی معاشی طور پر تباہی کے دھانے پر پہنچا دیا ہے جس سے قوم کا ہر فرد مشکلات کا شکار ہے۔وفاقی و صوبائی حکوموتوں نے ہمیشہ عوامی مفادات کے برعکس ایسے فیصلوں کو ترجیح دی جس سے شخصی اور سیاسی فوائد حاصل ہوتے ہوں ۔اور اب کراچی آپریشن کو بھی سیاست کی نظر کرنے کے در پے لگئے ہوئے ہیں ۔

وحدت نیوز (جامشورو) سندھ کی معروف دینی درسگاہ مرکزتحقیقات وتبلیغات اسلامی جامشورومیں تاریخی خمسہ فہم اسلام سیمینار کا اہتمام گیا گیا، بزرگ عالم دین ، شہید قائد کے رفیق خاص علامہ حیدر علی جوادی کی خصوصی دعوت پر مجلس وحدت مسلمین کے مرکزی سیکریٹری جنرل علامہ راجہ ناصرعباس جعفری اور مرکزی ڈپٹی سیکریٹری جنرل علامہ امین شہیدی نے خطاب کیا ، مقامی اور روز دراز سے آئے ہوئے مومنین کی بڑی تعداد نے سیمینارز میں شرکت کی۔