وحدت نیوز(کوئٹہ)مجلس وحدت مسلمین بلوچستان کے رہنماء سہیل اکبر شیرازی نے کہا ہے کہ زائرین کے زمینی راستے سے زیارات پر پابندی ناانصافی ہے۔ وزارت داخلہ کا فیصلہ عوام دشمن، مذہبی آزادی پر قدغن اور ہزاروں زائرین کے لئے مشکلات کا باعث ہے۔ ہم اس پالیسی کو یکسر مسترد کرتے ہیں۔ وزیر داخلہ فوری مستعفی ہوں۔ کوئٹہ میں شہداء چوک کے مقام پر احتجاجی دھرنے سے خطاب کرتے ہوئے انہوں نے کہا کہ زیارات مقدسہ کے لئے زمینی راستہ اختیار کرنا پاکستانی زائرین کا آئینی، مذہبی اور انسانی حق ہے۔ حکومت کی جانب سے ایران زیارات پر زمینی راستے کی بندش ناقابل قبول ہے۔

انہوں نے کہا کہ وزارت داخلہ کا فیصلہ عوام دشمن، مذہبی آزادی پر قدغن اور ہزاروں زائرین کے لئے مشکلات کا باعث ہے۔ ہم اس پالیسی کو یکسر مسترد کرتے ہیں۔ سہیل اکبر شیرازی نے کہا کہ حکومت شہریوں کو تحفظ دینے میں مکمل ناکام ہو چکی ہے اور موجودہ وزیر داخلہ کی کارکردگی نے یہ واضح کر دیا ہے کہ وہ اس اہم منصب کے اہل نہیں ہیں۔ وزیر داخلہ فی الفور مستعفی ہوں، اور ان کی جگہ کوئی باصلاحیت، دیانت دار اور مذہبی طبقات کا احترام کرنے والا فرد تعینات کیا جائے۔ انہوں نے کہا کہ قائد وحدت سینیٹر علامہ راجہ ناصر عباس جعفری نے اعلان کیا ہے کہ اگر زائرین کے حقوق پر قدغن نہ ہٹائی گئی تو مجلس وحدت مسلمین پاکستان عوام اور زائرین کے ساتھ مل کر احتجاج کا دائرہ وسیع کرے گی۔