وحدت نیوز (کراچی) مجلس وحدت مسلمین پاکستان صوبہ سندھ کے صوبائی سیکرٹری جنرل علامہ مختار امامی نے کہا ہے کہ قانون نافذ کرنے والے ادارے بے گناہ افراد کو گرفتار کرکے ان پر جھوٹے مقدمات قائم کرنے کے بجائے کالعدم جماعتوں کے خلاف کریک ڈاؤن کریں، ایم ڈبلیو ایم ملک میں مذہبی اتحاد و وحدت کا عملی نمونہ ہے ، سندھ حکومت کے بعض وزراء کی سرپرستی میں کالعدم دہشتگردوں کی فعالیت کراچی آپریشن پر سوالیہ نشان ہے ۔شہر قائد بے گناہ شیعہ نوجوانوں کی گرفتاری کی مذمت کرتے ہیں گرفتارکئے جانے والے شیعہ نوجوانوں کو جرائم پیشہ اور ظاہر کر کے ایم ڈبلیو ایم سے جوڑنے کی مذمت کرتے ہیں،ایم ڈبلیو ایم کے نام کو دہشتگردوں کے ساتھ شامل کرنا قانون نافذ کرنے والے ادارے پولیس میں شامل کالی بھڑوں کی مضموم سازش ہے،مذہبی منافرت پھیلانے والے امت اخبار کا ایم ڈبلیوایم کو دہشت گردوں کی صفت میں کھڑاکرنا من گھڑت الزام ہے۔

 وحدت ہاؤس کراچی سے جاری اپنے بیان میں علامہ مختار امامی کا کہنا تھا کہ الحمد اللہ ملت جعفریہ اس ملک میں بانیان پاکستان کی اولادیں ہیں ،ملک میں بسنے والے شیعہ سنی عوام جانتے ہیں کہ پاک افواج ،رینجرز ،پولیس ،سانحہ نشتر پارک، ملک بھر میں سانحہ عاشوہ ،سانحہ اربعین،رحمان شاہ بابا،سانحہ داتا دربار ،درگاہ حاجن شاہ ،عبد اللہ شاہ غازی سمیت ملک بھر میں موجود اولیاء اللہ کے مزارات اورسانحہ پشاورآرمی پبلک اسکول کے معصوم بچوں کو دہشتگردی کا نشانہ بناے والے دہشتگرد کالعدم جماعتوں اور ان کے پروڈکشن ہاؤس تکفیری مدارس کے تربیت یافتہ ہیں جن کے سینکڑوں جرائم اس ملک میں بسنے والے عوام اور ریاستی اداروں سے ڈھکے چھپے نہیں، اب یہ عالمی دہشتگرد تنظیم داعش کی ملک میں جڑوں کو مضبوط کرنے میں مدد کر رہے ہیں ۔ انہوں نے شہر قائد سے شائع ہونے والے زرائع ابلاغ کے چند اخبارات میں جرائم میں ملوث افراد کا نام ایم ڈبلیو ایم سے جوڑنے کی ترید کرتے ہوئے کہنا تھا کہ مجلس وحدت مسلمین کے رہنماؤں و کارکنان کے خلاف آج تک کوئی دہشتگردی کا مقدمہ قائم نہیں ایم ڈبلیو ایم کا میڈیا ٹرائل آسمان پر تھوکنے کے مترادف ہے ،مجلس وحدت مسلمین پر امن و محب وطن سیاسی جماعت ہے، فرقہ واریت اور مذہبی جنونیت کے خلاف اتحاد و وحدت کے مثالی کام کئے ہیں، ہم حکومت سے مطالبہ کرتے ہیں کہ وہ نام بدل کر کام کرنے والی کالعدم مذہبی جماعت کے خلاف فوری کاروائی کرے، شہر قائد دہشتگردی کے واقعات بم دھماکوں اور ٹارگٹ کلنگ میں ملوث کالعدم جماعتوں کے ملزمان کے مقدمات فوجی عدالتوں میں چلائے جائیں اور جلد از جلد ان دہشتگردوں کو تختہ دار پر لٹکا یا جائے ۔

وحدت نیوز(ملتان) مجلس وحدت مسلمین کے سربراہ علامہ راجہ ناصرعباس جعفری کل بروز ہفتے کو گیارہ بجے دن دو روزہ دورے پر ملتان پہنچیں گے۔ ایم ڈبلیو ایم جنوبی پنجاب کے میڈیا کوارڈینیٹر ثقلین نقوی کے مطابق دو روزہ دورے کے دوران ملتان میں مختلف معززین شہر، وکلاء ، تنظیمی شخصیات سے ملاقات کریں گے۔ علامہ ناصر عباس جعفری ملتان میں وفات پا جانے والی اہم شخصیات کے خانوادگان سے اظہار تعزیت کریں گے۔ ثقلین نقوی کے مطابق مختلف شخصیات کی جانب سے اُن کے اعزاز میں مختلف تقاریب میں شرکت اور خطاب کریں گے جبکہ اتوار کو میڈیا کے اعزاز میں دی گئی نشست میں خصوصی شرکت اور خطاب کریں گے۔

وحدت نیوز (گلگت) گذشتہ برس یمن پر سعودی جارحیت اور بے گناہ مسلمان شہریوں کے قتل عام کے خلاف احتجاج کرنے کے جرم میں مجلس وحدت مسلمین گلگت بلتستان کے صوبائی سیکریٹری جنرل علامہ نیئرعباس مصطفویٰ کو انسداد دہشت گردی عدالت سے گرفتار کرلیا گیا، تفصیلات کے مطابق علامہ نیئر عباس انسداد دہشت گردی عدالت میں پیشی کےموقع پر حاضر ہوئے توجج نے انہیں گرفتارکرکے جیل بھیجے کا حکم جاری کردیا، واضح رہے کہ اس کیس میں پہلے ہی مجلس وحدت مسلمین کے صوبائی سیکریٹری امور سیاسیات غلام  عباس، عارف قنبری، شیخ شہادت حسین، مطہر عباس اور آئی ایس او گلگت ڈویژن کے صدر جمال اخترگرفتار ہو چکے ہیں جیل کاٹ کر ضمانت پر رہا ہوئے ہیں ، جبکہ علامہ شیخ نیئر عباس اور علامہ بلال ثمائری اس کیس میں مفرور قرار دیئے گئے تھے۔

وحدت نیوز (اسلام آباد) مجلس وحدت مسلمین پاکستان شعبہ خواتین کی دوروزہ تربیتی ورکشاپ میں صوبہ پنجاب اور صوبہ خیبر پختونخواہ سمیت ملک کے دیگر حصوں سے خواتین نے شرکت کی، مرکزی سیکریٹریٹ میں منعقدہ ورکشاپ میں خواتین کارکنان سے خطاب کرتے ہوئے ایم ڈبلیو ایم کے مرکزی سیکرٹری جنرل علامہ راجہ ناصر عباس جعفری نے کہا کہ اعلی تعلیم اور تربیت یافتہ خواتین نسلوں کو معاشرے میں ممتاز و بلند مقام عطا کرتیں ہیں۔دین حق کی سربلندی میں خواتین کامثالی کردار تاریخ اسلام کا روشن باب ہے۔واقعہ کربلا میں خواتین کا عزم و حوصلہ ہمارے لیے بہترین درس ہے۔عورتوں کو اسلام نے وہ عزت عطا کی جو اس سے پہلے معاشرے میں نہیں تھی۔خاندان کی تربیت میں خواتین کے کردار کو کلیدی حیثیت حاصل ہے۔مرکزی کو آرڈینیٹر زہرا نقوی نے خطاب کرتے ہوئے کہا کہ انقلاب ایران میں امام خمینی کے حکم پر مستورات پیش پیش رہیں ۔کسی بھی تحریک میں مستورات کی عدم موجودگی سے خاطر نتائج کی طرف بڑھنا قدرے مشکل ہوتا ہے۔ ہمیں دین کے لیے اپنی ذمہ داریوں سے آگاہ رہنے کی ضرورت ہے۔خانم زہرا نقوی نے تنظیمی فعالیت پر زور دیتے ہوئے خواتین کو میدان عمل میں موجود رہنے کی ضرورت پر زور دیا۔ خانم طاہرہ نجفی  اور خانم طیبہ اعجاز نے بھی اظہار خیال کیا اور ضلعی سطح پر خواتین کی تربیتی ورکشاپس کی منظوری دی گئی۔

وحدت نیوز (کوئٹہ)  مجلس وحدت مسلمین بلوچستان کا اہم جلاس صوبائی سیکریٹری جنرل علامہ مقصود علی ڈومکی کی زیر صدارت منعقد ہوا۔ اجلاس میں ملک اور صوبے کی سیاسی صورتحال ، تنظیمی معاملات اور سانحہ چھلگری سے متعلق مسائل پر غور کیا گیا۔ اس موقع پر اجلاس سے خطاب کرتے ہوئے علامہ مقصود علی ڈومکی نے کہاہے کہ پی آئی اے کی جان بحق ملازمین کے قتل کی جوڈیشل انکوئری کرائی جائے جبکہ حکومت پی آئی اے ملازمین کے مسائل طاقت کی بجائے مذاکرات سے حل کرے،سانحہ ماڈل ٹاؤن کے بعد ایک مرتبہ پھر مخالفین پر گولیاں چلا کر آمرانہ طرز عمل کا مظاہرہ کیا گیا ہے۔ حکومت قومی اداروں میں اصلاحات اور شفافیت لانے میں بری طرح ناکام ہوئی ہے۔

انہوں نے کہا کہ کوئٹہ میں ضلع کچھری کے باہر بم دھماکہ میں انسانی جانوں کے ضیاع پر شدید دکھ پہنچاہے، دھشت گردوں کے خلاف ملک گیر آپریشن کی ضرورت ہے۔ دھشت گردوں کے ساتھ ساتھ ان کے سہولت کاروں کے خلاف بھی آپریشن کی جائے،تحریک طالبان خراسان گروپ سمیت تمام دھشت گرد گروہوں کا خاتمہ ضروری ہے، دھشت گردوں کے اندرونی اور بیرونی سہولت کاروں کا خاتمہ کئے بغیر دھشت گردی کا خاتمہ ممکن نہیں،تکفیری دھشت گرد امن عالم کے لئے خطرہ بن چکے ہیں۔

اجلاس میں فیصلہ کیا گیا کہ ایم ڈبلیو ایم کی صوبائی شوریٰ کا اہم اجلاس اتوار ۲۱ فروری کوشام پانچ بجے ڈیرہ مراد جمالی میں منعقد ہوگا، جبکہ سانحہ چھلگری کے شہداء کی یاد میں۲۰ اور ۲۱ فروری کو منعقدہونے والے احتجاج میں صوبے بھر سے کارکن اور رہنما بھر پور طریقے سے شریک ہوں گے۔ اجلاس میں مختلف اضلاع کے تنظیمی دورہ جات اور اضلاع کی مشاورت سے ضلعی شوریٰ کے ا جلاس بلانے کا فیصلہ بھی کیا گیا۔

وحدت نیوز(گلگت) سپریم اپیلیٹ کورٹ کی جانب سے محکمہ صحت سمیت دیگر عوامی مسائل پر از خود نوٹس لینا خوش آئند امر ہے۔ڈی ایچ کیو ہسپتال گلگت میں ستر سے زائدملازمین گزشتہ دس سالوں سے من پسند پوسٹوں پر ڈیوٹیاں انجام دے رہے ہیں،آئی سی یو سمیت دیگر شعبوں کو رضاکاروں نے سنبھالا ہوا ہے جو کہ انسانی جانوں سے کھیلنے کے مترادف ہے ۔

مجلس وحدت مسلمین گلگت بلتستان کے ڈپٹی سیکریٹری جنرل عارف حسین قنبری نے کہا کہ بڑھتے ہوئے عوامی مسائل پرسپریم اپیلیٹ کورٹ کا سوموٹو ایکشن بروقت کاروائی ہے ،حکومت زبانی جمع خرچ پر عوام کو بیوقوف بنارہی ہے جبکہ شہر کا واحد ہسپتال جہاں روزانہ ہزاروں مریض مسیحائی کے منتظر ہوتے ہیں کی حالت زار ناگفتہ بہ ہوچکی ہے۔خواتین ونگ ماہر لیڈی ڈاکٹرز کے موجود نہ ہونے کی وجہ سے بے اجل اموات کے سائے منڈلاتے رہتے ہیں۔ امراض قلب وارڈ منظور ہونے کے باوجود بدنیتی پر مبنی غیر ضروری تاخیر کا شکار ہے۔انہوں نے کہا کہ سپریم اپیلیٹ کورٹ کے سو موٹو ایکشن سے امید کی کرن پیدا ہوئی ہے کہ شاید ہسپتالوں کی بگڑی ہوئی صورت حال میں بہتری آجائے اور غریب مریضوں کو صحت کی بنیادی سہولیات فراہم ہوں۔

انہوں نے کہا کہ صوبائی حکومت کے اخباری دعووں کی کوئی حقیقت نہیں ،آٹا نا پید ہوچکا ہے لوڈشیڈنگ ریکارڈ سطح تک پہنچ چکی ہے ،سڑکیں کھنڈرات میں تبدیل ہوچکے ہیں،کرپشن اقربا پروری اپنے عروج پر ہے۔سرکاری ملازمتوں کی بندربانٹ جاری ہے اور من پسند افراد کو اہم پوسٹوں پر بٹھادیا گیا ہے تاکہ مطلوبہ نتائج حاصل کئے جاسکیں۔انہوں نے کہا کہ سپریم اپیلیٹ کورٹ کے از خود نوٹس ہی کی وجہ سے گلگت شہر کو کونوداس سے ملانے والا آر سی سی پل تعمیر ہوا ہے اگر سپریم اپیلیٹ کورٹ نوٹس نہ لیتا تو شاید آج تک یہ پل تعمیر ہی نہ ہوتا۔صوبائی حکومت اپنے ماسبق پیپلز پارٹی کے کھینچے ہوئے خطوط پر ہی گامزن ہے عوامی فلاح و بہبود ان کے ایجنڈے میں شامل ہی نہیں۔