وحدت نیوز (کراچی) سیہون شریف میں سخی لال شھباز قلندر کی درگاہ پر خودکش حملے اور مجلس وحدت مسلمین آزاد کشمیر کے سیکریٹری جنرل علامہ سید تصور حسین نقوی الجوادی اور انکی اہلیہ پر قاتلانہ حملے کے خلاف ایم ڈبلیو ایم کراچی ڈویژن ضلع وسطی کی جانب سے خیرالعمل روڈ انچولی تا شاہراہ پاکستان احتجاجی ماتمی ریلی نکالی گئی۔ احتجاجی ریلی سے مجلس وحدت مسلمین پاکستان کراچی ڈویژن کے رہنماؤں علامہ سید علی انور جعفری اور علامہ مبشر حسن نے خطاب کیا۔ اس موقع پر علامہ نثار قلندری، میر تقی ظفر سمیت مظاہرین کی کثیر تعداد شریک تھی۔ اپنے خطاب میں رہنماؤں کا کہنا تھا کہ درگاہ لعل شہباز قلندر پر خودکش حملہ کھلی دہشت گردی ہے، دہشت گردوں سے انہی کی زبان میں نمٹنا ہوگا، مزارات اولیاء کو کوئی سیکیورٹی فراہم نہیں کی گئی، دہشت گرد خودکش بمبار کا مزار کے احاطے میں داخل ہوجانا پولیس سیکیورٹی پر سوالیہ نشان ہے، دہشت گردی کے خلاف آخری سانس تک لڑیں گے، دہشت گردوں اور ان کے سہولت کاروں کو عبرت کا نشانہ بنانا ہوگا، دہشت گردوں سے خوفزدہ ہونے والے نہیں دہشت گردوں کو عبرت کا نشان بنانے کیلئے پر عزم ہیں۔ انہوں نے مزید کہا کہ صوفیوں اور اولیاء اللہ کی سرزمین کو خاک و خون میں نہلانے والے صفاک دہشتگرد کسی رعایت کے مستحق نہیں، حکمران دہشتگردوں کے سیاسی و مذہبی سرپرستوں کے دباؤ کو مسترد کرتے ہوئے اس ناسور کیخلاف بے رحمانہ آپریشن کا اعلان کریں، نیشنل ایکشن پلان پر حقیقی معنوں میں عملدرآمد کو یقینی بنایا جائے۔

وحدت نیوز (ملتان) مجلس وحدت مسلمین جنوبی پنجاب کے سیکرٹری جنرل علامہ اقتدار حسین نقوی نے کہا ہے کہ پاکستان میں حالیہ دہشتگردی کی لہر نے حکومت اور سیکیورٹی اداروں کی کارکردگی پر سوالیہ نشان لگا دیے ہیں، حکومت میں چھپے دہشتگردوں کو جب تک بے نقاب نہیں کیا جائے گا دہشتگردی، فرقہ واریت اور مذہبی انتہاپسندی کا خاتمہ ممکن نہیں، پاکستان میں دہشتگردوں کو پروان چڑھانے والے مدارس اور مولویوں کے خلاف کاروائی کی جائے، نیشنل ایکشن پلان کو اگر ذاتی اور سیاسی انتقال کی نذر نہ کیا جاتا تو صورتحال مختلف ہوتی۔ ان خیالات کا اظہار اُنہوں نے ملتان میں مجلس وحدت مسلمین کے زیراہتمام نکالی گئی احتجاجی ریلی سے خطاب کرتے ہوئے کیا۔ اُنہوں نے کہا کہ لاہور میں سینیئر پولیس افسران کی شہادت، مظفرآباد آزاد کشمیر میں علامہ تصور جوادی پر قاتلانہ حملہ، پشاور، کوئٹہ، کراچی اور صوفی حضرت شہباز قلندر کی درگاہ پر حملہ سندھ اور وفاقی حکومت کے لیے لمحہ فکریہ ہے۔ جب تک دہشتگردوں کے خلاف بلاتفریق کاروائی نہیں کی جاتی اور ان کے ماسٹر مائنڈ چاہے وہ کہیں بھی ہیں اُنہیں سزا نہیں دی جاتی یہ واقعات ہوتے رہیں گے۔ علامہ اقتدار نقوی کا مزید کہنا تھا کہ اگر سانحہ شکار، سانحہ سخی سرور، سانحہ عبداللہ شاہ غازی، سانحہ داتا دربار کے قاتلوں اور اُن کے سرپرستوں کو کیفر کردار تک پہنچایا جاتا تو اتنا بڑا سانحہ رونما نہ ہوتا۔

وحدت نیوز(ٹنڈومحمد خان) مجلس وحدت مسلمین ضلع ٹنڈو محمد خان کی جانب سے درگاہ لعل شہباز قلندر کے مزار پر بم دھماکہ کے خلاف آج ٹنڈو محمد خان شہر میں مکمل شٹر بند ہڑتال کی گئی جس کے باعث تمام کاروباری مراکز بند رہے جبکہ بعد نماز جمعہ کےجامع مسجد علی ؑسے ایک احتجاجی ریلی نکالی گئی جو کہ مختلف راستوں سے ہوتی ہوئی پریس کلب پر اختتام پذیر ہوئی اس موقع مولانا کاظم مظہری، محمود الحسن اور دیگر نے خطاب کرتے ہوئے کہا کہ ملک میں بڑھتی ہوئی دہشت گردی کے واقعات نیشنل ایکشن پلان پر سوالیہ نشان ہے سیہون شریف میں ہونے والے دھماکے نے پورے ملک کو لرزا دیا ہے حکومت دہشت گردی کے واقعات کو روکنے میں مکمل طور پر ناکام ہو چکی ہے انہوں نے مطالبہ کیا کہ دہشت گردوں اور ان کے سہولت کاروں کے خلاف بے رحمانہ آپریشن کیا جائے۔

وحدت نیوز(راولپنڈی) مجلس وحدت مسلمین ضلع راولپنڈی کے تحت پریس کلب پر سانحہ سیہون شریف ، لاہور، پشاور ، کوئٹہ اور آزادجموں کشمیر میں علامہ تصور جوادی اور ان کی اہلیہ پر قاتلانہ حملے کے خلاف احتجاجی مظاہرے سے خطاب کرتے ہوئے مجلس وحدت مسلمین پاکستان کے مرکزی سیکریٹری امور تعلیم نثار علی فیضی نے کہا ہے کہ لاہور کشمیر اور پھر سہون شریف سندھ میں دہشتگردی کے واقعات پاکستان میں داعش کی بڑھتی ہوئی سرگرمیوں کا شاخسانہ ہے،علامہ تصور جوادی پر حملہ کشمیر کے امن و امان کو تہہ وبالا کرنے کی سازش ہے،سیکورٹی اداروں کو نیشنل ایکشن پلان پر عملدرآمد کے لیے عرب ممالک بالخصوص سعودی عرب کے اثر و نفوز کو کم کرنا پڑے گا، وزیر داخلہ کی کالعدم جماعتوں کے سربراہوں سے ملاقاتوں نے تکفیری قوتوں کو پنپنے کا مزید موقع فراہم کیا ہے، ہمارا معاشرہ کرپشن اور انتہا پسندی کے خطرناک دھانے پر پہنچ چکا ہے جس کے بھیانک نتائج پوری قوم بھگت رہی ہے، اولیاء اللہ کی دھرتی سندھ جو امن و امان کا گہوارہ تھی آ ج تکفیریت و مذہبی انتہا پسندوں کے نشانے پہ ہے،انتہا پسندی کو مٹانے کے لیےجہالت ختم کرنی ہو گی لوگوں کو بہتر معاش اور تعلیم کی سہولیات دینی ہونگی وڈیروں اور جاگیرداروں نے عوام کو بنیادی حقوق سے محروم کر رکھا ہے۔

وحدت نیوز (لاہور) مجلس وحدت مسلمین کے زیراہتمام ملک میں حالیہ دہشتگردی کے لہر کیخلاف ملک گیر مظاہرے ہوئے، چاروں صوبوں سمیت آزاد کشمیر اور گلگت بلتستان کے مختلف اضلاع میں نماز جمعہ کے بعد احجاجی مظاہرے اور ریلیاں نکالی گئیں۔ لاہور میں حضرت لعل شہباز قلندر کئ مزار پر خودکش دھماکے، لاہور، پشاور، کوئٹہ سانحات اور آزاد کشمیر میں مجلس وحدت مسلمین کے سیکرٹری جنرل علامہ تصور حسین جوادی اور انکی اہلیہ پر قاتلانہ حملے کیخلاف جامع مسجد صاحب الزمان حیدر روڈ اسلامپورہ سے احتجاجی ریلی نکالی گئی جو نیلی بار چوک پہنچ کر جلسے شکل اختیار کر گئی۔ ریلی میں ایم ڈبلیو ایم لاہور کے رہنماؤں نجم الحسن، فرقان علی، خرم زیدی، رانا ماجد علی، نقی مہدی، افسر حسین خاں سمیت شہریوں کی بری تعداد نے شرکت کی۔ مظاہرین سے خطاب کرتے ہوئے مجلس وحدت مسلمین لاہور کے سیکرٹری جنرل علامہ حسن ہمدانی نے کہا کہ دہشتگردوں نے پاکستانی عوام پر جنگ مسلط کرنے کا اعلان کر دیا ہے، صوفیوں اور اولیاءاللہ کی سرزمین کو خاک و خون میں نہلانے والے صفاک دہشتگرد کسی رعایت کے مستحق نہیں، حکمران دہشتگردوں کے سیاسی و مذہبی سرپرستوں کے دباؤ کو مسترد کرتے ہوئے اس ناسور کیخلاف بے رحمانہ آپریشن کا اعلان کریں، نیشنل ایکشن پلان پر حقیقی معنوں میں عملدرآمد کو یقینی بنایا جائے۔

انہوں نے کہا کہ حکمرانوں کو جاگنے کیلئے مزید کتنے معصوم پاکستانیوں کے خون درکار ہے، حکمران، افواج پاکستان اور عوام مل کر ان درندہ صفت تکفیری دہشتگردوں کا مقابلہ کریں، ان دہشتگردوں کی سرپرستی سی پیک کے دشمن ممالک کر رہے ہیں، ہمیں اپنی ماضی کی غلط پالیسیوں پر نظرثانی کرتے ہوئے، پاکستان کے مستقبل کا سوچنا ہوگا۔ علامہ کامرانی نے کہا کہ دہشتگردوں کی کاروائیاں ملکی سلامتی و استحکام کیلئے خطرناک صورت اختیار کر چکی ہیں، ان تکفیری دہشتگرد گروہوں کا خاتمہ ملکی سلامتی و امن کیلئے انتہائی ضروری ہے، دہشتگردی کا خاتمہ حکومت کے محض بلند و بانگ دعووں سے نہیں ہوگا اس کیلئے سیاسی مصلحتوں سے بالاتر ہو کر فیصلہ کن اقدامات کرنا ہوں گے۔ انہوں نے کہا کہ کالعدم مذہبی جماعتوں اور سہولت کاروں کیلئے حکمران جماعت کا نرم گوشہ ملک میں دہشتگردی کا ایک واضح سبب ہے، دہشتگردی کی حالیہ کارروائی کو اگر عالمی تناظر میں دیکھا جائے تو یہ پاک چائنا اقتصادی راہدری منصوبے کیخلاف بھی سازش ہے، امریکہ، بھارت اور کچھ خلیجی ریاستیں پاکستان کو مستحکم نہیں دیکھنا چاہتیں اور سی پیک کیخلاف سازشوں میں مصروف ہیں، پاکستان کے امن کو خراب کر کے پاکستان کو ایک غیر محفوظ ریاست ثابت کرنے کی مذموم کوشش کی جا رہی ہے، اس کوشش کو ناکام بنانے کا واحد حل دہشتگرد عناصر اور سہولت کاروں کیخلاف بھرپور کارروائی ہے۔

وحدت نیوز (کراچی) مجلس وحدت مسلمین کے مرکزی سیکرٹری جنرل علامہ راجہ ناصر عباس جعفری کے اعلان پر درگاہ لال شہباز قلندرؒ، پارا چنار، لاہور اور پشاور میں ہونے والے خودکش حملوں اور ایم ڈبلیو ایم آزاد کشمیر کے سیکرٹری جنرل علامہ تصور جوادی پر قاتلانہ حملے کے خلاف ایم ڈبلیو ایم کے زیر اہتمام ملک بھر کی طرح کراچی میں بھی یوم احتجاج منایا گیا۔ کراچی میں مرکزی احتجاجی مظاہرہ بعد نماز جمعہ جامع مسجد نور ایمان ناظم آباد کے باہر کیا گیا۔ احتجاجی مظاہرے سے علامہ مرزا یوسف حسین، علامہ مبشر حسن، علامہ علی انور جعفری، علامہ اظہر نقوی نے خطاب کیا۔ احتجاجی مظاہرے میں ایم ڈبلیو ایم کے رہنماؤں، کارکنان اور نمازیوں کی بڑی تعداد شریک تھی۔

علمائے کرام نے خطاب کرتے ہوئے کہا کہ پانچ دنوں میں دہشتگردی کے 9 واقعات قومی سلامتی کے ذمہ دار اداروں کی فعالیت پر سوالیہ نشان ہیں، دہشتگردی کے خاتمے کے حکومتی دعوے شرمناک ہیں، حکمرانوں کی سیاسی ضرورتیں کالعدم مذہبی جماعتوں کے خلاف کاروائی کی راہ میں سب سے بڑی رکاوٹ ہیں، موجودہ حکمران اچھے اور برے طالبان کے نام پر دہشتگردوں کو تحفظ فراہم کرتے آئے ہیں، جن کا خمیازہ اب پوری قوم بھگت رہی ہے۔ انہوں نے کہا کہ شام سے فرار ہونے والے داعشی دہشتگردوں کو افغانستان میں پناہ دی گئی ہے، تاکہ پاکستان میں کاروائیاں کرنے میں انہیں زیادہ مشکلات کا سامنا نہ کرنا پڑے، اسلام دشمن عالمی قوتیں داعش کو پاکستان میں دھکیل کر اپنا اگلا ہدف واحد اسلامی طاقت پاکستان کو بنانا چاہتے ہیں۔

انہوں نے کہا کہ داعش سے فکری مطابقت رکھنے والے نام نہاد علماء اور اداروں کے خلاف بھرپور کارروائی حالات کا اولین تقاضہ ہے، اس میں غفلت کا مظاہرہ پاکستان دشمن طاقتوں کے ایجنڈے کی تکمیل میں معاونت کے مترادف سمجھا جائے گا، دہشتگردوں سے لچک کا مظاہرہ ان عناصر کے حوصلوں کی تقویت کا باعث بنا ہوا ہے، کالعدم مذہبی جماعتوں کے خلاف فوری کارروائی کی جائے، ان کالعدم جماعتوں کو بھی انصاف کے کٹہرے میں لایا جائے، جو نام بدل کر اپنی مذموم سرگرمیوں میں مصروف ہیں۔ علمائے کرام نے مزید کہا کہ حکومتی و سیاسی شخصیات کو کالعدم جماعتوں سے کسی بھی قسم کا رابطہ نہ رکھنے کا پابند کیا جائے، پنجاب میں لشکر جھنگوی اور دیگر دہشت گروہوں کی کمین گاہوں کا تدارک کیا جائے، نیشنل ایکشن پلان کے تمام نکات پر عمل کیا جائے، درگاہ شہباز قلندر، لاہور، پاراچنار، پشاور اور مظفرآباد میں ہونے والے دہشت گردی کے واقعات کے ذمہ داروں اور علامہ تصور جوادی اور انکی اہلیہ پر قاتلانہ حملہ کرنے والوں کی گرفتاری کیلئے خصوصی ٹیمیں تشکیل دی جائیں۔