وحدت نیوز(اسلام آباد) مجلس وحدت مسلمین پاکستان کے سربراہ علامہ راجہ ناصر عباس جعفری (حفظ اللہ) نے برادر نثار علی فیضی کی مرکزی کابینہ میں بحیثیت سیکریٹری فلاح و بہبود (انچارج خیر العمل فائونڈیشن پاکستان ) شمولیت کی توثیق کر دی ہے ۔

تفصیلات کے مطابق گذشتہ روز اسلام آباد میں علامہ راجہ ناصر عباس جعفری (حفظ اللہ) کی زیر صدارت ہونے والے مرکزی کابینہ کے اجلاس میں برادر نثار علی فیضی کی کابینہ میں شمولیت کا اعلان کیا گیا۔ واضح رہے کہ نثار علی فیضی گذشتہ تین سال بھی اسی عہدے پر با حسن و خوبی اپنی ذمہ داریاں انجام دے چکے ہیں ، پاکستان کی تاریخ کا بد ترین سیلاب ہو یا اس کے بعد متاثرین کی بحالی کا کام نثار علی فیضی ہر لمحہ میدان عمل میں موجود رہے ہیں ۔

 وحدت نیوز ( کوئٹہ) مجلس وحدت مسلمین پاکستان کے رہنماء علامہ ہاشم موسوی نے قوم سے اپیل کی ہے کہ وہ خانوادہ شہدا اور سیلاب متاثرین کو عید کے موقع پر فراموش نہ کریں اور ان سے اظہار یکجہتی کیلئے عید سادگی سے منائیں۔انہوں نے کہا ہے کہ پورے ملک بالخصوص بلوچستان مختلف آفات اور مشکلات کی ذد میں ہے لہذاً عوام کو دانشمندی ،صبر ،جرات اور سادگی کا مظاہر ہ کرنے کی ضرورت ہے ۔

انہوں نے کہا کہ ملت تشیع بالخصوص مشکلات کے ذد میں ہے کیونکہ ایک طرف سے وہ بزدل اور پیسہ پرست تکفیری دہشتگردوں سے نبردآزمائیں جو چھپ کر وار کرتے ہیں اور دوسری طرف سے وہ اپنے اندر چھپے ہوئے نسل پرست اور فاشسٹ دشمنوں سے نمٹ رہے ہیں جو منافقت کے لبادے میں دوست بنکر در اصل دشمنوں کے ایجنٹ ہیں۔انہوں نے عید کے دن حکومت سے سیکورٹی سخت کرنے کا مطالبہ کرتے ہوئے عوام سے بیدار رہنے کی اپیل کی ہے ۔

وحدت نیوز (اسلام آباد ) بلوچستان کے ضلع بولان میں عیدمنانے جانے والے مزدوروں کا بہیمانہ قتل شرمناک فعل ہے ، اس کی جتنی مزمت کی جائے کم ہے ، ہماری سول اور ملٹری لیڈر شپ شتر مرغ کی مانند منہ زمین میں دے کہ یہ نہ سمجھیں کہ پاکستان کا استحکام ، پاکستان کی اسا س ، پاکستان کا وجود ، یایہ لوگ خود ان سفاک دہشت گردوں سے محفوظ ہیں ۔اتنے خون خرابے کے بعد پاکستان کے تمام بااختیار اداروں کے ذمہ داروں کو ہوش میں آجانا چاہیئے ۔ پروکسی وار پروکسی وار کا راگ الاپنے والے بتائیں بلوچستان کے سہرا میں شہید ہو نے والے یہ بیگناہ مزدورکن ممالک کی پروکسی وار کے نتیجے میں مارے گئے ؟ ان خیالات کا اظہار مجلس وحدت مسلمین پاکستان کے سربراہ علامہ راجہ ناصر عباس جعفری نے وحدت ہاؤس جاری اپنے مذمتی بیان میں کیا ۔

ان کا کہنا تھا کہ بلوچستان سمیت پو رے پاکستان میں کہیں بھی فرقہ واریت نہیں ہے ، بلکہ یہ ایک منظم دہشت گردی ہے ، جس کا مقصد پاکستان کو بین الاقوامی سطح پر ایک سکیورٹی اسٹیٹ قرار دلوانا ہے ، کبھی یہ درندہ صفت دہشت گرد مذہب کے نام پر بیگناہوں کا قتل عام کر تے ہیں تو کبھی زبان کو بنیاد بنا کر سر تن سے جدا کیئے جاتے ہیں ، پاکستان میں درندگی کی وہ مثالیں قائم کی گئیں ہیں جن کی نظیر تاریخ بشریت میں کم ہی ملتی ہیں ، جس قدر بربر یت کا مظاہرہ یہ دہشت گرد کر رہے ہیں ہمارے ، فوجی اور سول ادارے انہیں اس قدر ہی چھوٹ فراہم کر ہے ہیں ۔ غریب عوام کے ٹیکس پر پلنے والی فوجی اور سول لیڈر شپ کا کام صرف ملک کی تباہی اوربربادی کا تماشہ دیکھنا ہے ۔

ان کا کہنا تھا کہ ٹی وی ٹاک شوز میں آکر پاکستان میں جاری دہشت گردی کو دو پڑوسی ممالک کی پروکسی وار کا ٹائٹل دینے والے اینکر پرسنزاور نام نہاد سیاسی رہنماء پاکستانی قوم کو بتائیں کہ بلوچستان کے سہرا میں شہید ہو نے والے یہ بیگناہ 15مزدورکن پڑوسی ممالک کی پروکسی وار کے نتیجے میں مارے گئے ؟دہشت گردوں کی شناخت کے باوجود ان کے خلاف کوئی کاروائی نہ کر نا انتہائی افسوسناک پہلو ہے ، ایسا محصوص ہو تا ہے کہ اس ملک کو دہشت گردوں کے ہاتھوں ٹھیکے پہ دے دیا گیا ہے ۔ان کا مزید کہنا تھا کہ ہم نے ہمیشہ دہشت گردی کی مذمت اور دہشت گردوں کو بے نقاب کیا ہے ہم یہ کام دینی وظیفہ سمجھ کر انجام دیتے رہیں گے ، کیوں کے ہم ہر مظلوم کے حامی اور ہر ظالم کے دشمن ہیں ۔

وحدت نیوز (اسلام آباد)  مجلس وحدت مسلمین کے مرکزی سیکرٹری جنرل علامہ ناصر عباس جعفری (حفظ اللہ ) نے علامہ مظہر حسین کاظمی اور علامہ احمد اقبال رضوی کو اپنی کابینہ میں شامل کرلیا ہے۔ ایم ڈبلیو ایم کی مرکزی کابینہ کا اجلاس رات گئے اسلام آباد میں جاری رہا، جس میں علامہ احمد اقبال رضوی شعبہ تربیت جبکہ علامہ مظہر حسین کاظمی شعبہ تعلیم کے مسئول بنا دیئے گئے۔

 اجلاس میں علامہ ناصر عباس جعفری، علامہ اعجاز حسین بہشتی، علامہ ابوذر مہدوی، ناصر عباس شیرازی، علی مہدی، علامہ مبارک موسوی، علامہ مظہر حسین کاظمی اور علامہ احمد اقبال رضوی ۔ ملک اقرار حسین سمیت دیگر کابینہ کے ممبران شریک تھے۔

مرکزی کابینہ کے اجلاس میں فیصلہ کیا گیا کہ برسی قائد شہید علامہ عارف حسین الحسینی کا اسلام آباد میں منعقد ہونے والا ملک گیر اجتماع 25 اگست کے بجائے آٹھ ستمبر کو منعقد کیا جائے گا۔ اس حوالے سے کمیٹیاں بھی قائم کر دی گئیں، جو برسی کے امور کو دیکھیں گی۔ اجلاس میں گذشتہ ماہ کی کارکردگی کا جائزہ لیا گیا اور آئندہ کا لائحہ عمل ترتیب دیا گیا۔

وحدت نیوز (کراچی ) مجلس وحدت مسلمین پاکستان کے مرکزی رہنماء علامہ شیخ اعجاز حسین بہشتی نے بارش سے متاثرہ امروہہ سوسائٹی ، سعدی ٹاؤن ،سچل گوٹھ ، جلبانی گوٹھ، صومار کڈھانی گوٹھ کھوکراپار کے بارش سے متاثرہ علاقوں کا دورہ کیا اور امدادی کیمپس کا معائنہ بھی کیا، ایم ڈبلیوایم کے رضاکاروں نے امدادی سرگرمیاں شروع کردیں، لوگوں کومحفوظ مقام پر منتقل کیاگیاجبکہ ان علاقوں میں بڑی تعداد میں روزہ داروں کیلئے افطار اور کھانے کا انتظام کیا گیا۔اس موقع پر ایم ڈبلیو ایم کراچی ڈویژن کے رہنماء علامہ دیدار جلبانی ، علامہ علی انور، علی حسین نقوی ، انجینئر رضا نقوی بھی ہمراہ تھے۔

مجلس وحدت مسلمین کراچی کے شعبہ فلاح و بہبود خیر العمل فاؤنڈیشن نے شہر میں شدید بارش سے متاثرہ علاقوں میں امدادی سرگرمیاں شروع کردیں، متاثرین کی محفوظ مقامات پر منتقلی کا کام جاری ہے جبکہ بڑی تعدادمیں متاثرین کے لیے افطاراورکھانے کا بھی انتظام کیا گیا۔ کھوکھراپار اور امروہہ سوسائٹی میں ریلیف کیمپس بھی لگا دئیے گئے ہیں جہاں عوام الناس سے متاثرین کی مدد کے لئے کپڑے ، دودھ ، خشک غزائی اشیاء ، صاف پانی اور نقد امداد جمع کرانے کی اپیل کی گئی ہے ۔

وحدت نیوز ( اسلام آباد) قائد ملت جعفریہ پاکستان شہید علامہ سید عارف حسین الحسینی (رہ) کی 25ویں برسی آج ملک بھر میں انتہائی عقیدت و احترام کیساتھ منائی گئی۔ مجلس وحدت مسلمین کے سربراہ علامہ راجہ ناصر عباس جعفری (حفظ اللہ) کی ہدایت پر ملک کے مختلف اضلاع و یونٹس میں تعزیتی اور دعائیہ تقریبات اور مجالس عزا ء منعقد کی گئیں ،شہید کو شاندار الفاظ میں خراج تحسین پیش کیا گیا ، مقررین نے شہید قائد علامہ عارف حسین الحسینی (رہ ) کی قومی و ملی خدمات اور ان کی قربانیوں اور ایثار پر روشنی ڈالی۔اس موقع پر اعلان کیا گیا کہ شہید کی برسی کا ملک گیر اجتماع 25 اگست کو اسلام آباد میں منعقد ہوگا۔

واضح رہے کہ علامہ سید عارف حسین الحسینی کو 5 اگست 1988 بروز جمعہ پشاور میں ان کے مدرسہ جامعہ معارف الاسلامیہ میں نماز فجر کے موقع پر اسلام و پاکستان دشمنوں نے فائرنگ کرکے شہید کر دیا تھا، شہید علامہ عارف حسین الحسینی نے اپنے ساڑھے چار سالہ دور قیادت میں ملک و ملت کیلئے بھرپور خدمات انجام دیں۔ آپ پاکستان میں اتحاد بین المسلمین کے بانی شمار ہوتے ہیں۔