وحدت نیوز(لاہور) مجلس وحدت مسلمین کے صوبائی سیکرٹری جنرل سینٹرل پنجاب علامہ عبدالخالق اسدی نے میڈیا سیل سے جاری اپنے بیان میں کہا کہ رمضان المبارک کے قریب آتے ہی مہنگائی کا طوفان آ گیا ہے۔ اشیاء خوردنوش کی قیمتوں میں مسلسل اضافے نے غریب عوام کی کمر توڑ دی ہے ، پنجاب حکومت کی پرائس کنٹرول کمیٹیاں فعال نظر نہیں آ رہیں جس کی وجہ سے بازاروں میں ناجائز منافع خوروں نے مہنگائی کا مصنوعی طوفان کھڑا کر کے غریب عوام کا جینا محال کر دیا ہے۔
انہوں نے کہا کہ وزیر اعلیٰ پنجاب رمضان میں غریب عوام کو ریلیف دینے کے لئے ٹھوس اقدامات کرے اور گرانفروشوں اور ناجائز منافع خوروں کے خلاف کریک ڈاؤن کر کے ماہ مبارک صیام کے تقدس پامال کرنے والوں کو عبرت کا نشان بنائے۔
انہوں نے کہا ہے کہ یوٹیلیٹی اسٹورز پر اشیا خوردنوش کی کمی بھی ایک قابل تشویش عمل ہے جس پر حکومت ایکشن لے اور عوام کو مہنگائی کے طوفان سے بچایا جائے۔ علامہ عبدالخالق اسدی نے مزید کہا کہ رمضان المبارک احساس اور ہمدردی کا مہینہ ہے امید ہے پنجاب حکومت غریب عوام کا احساس کرے گی اور ریاست مدینہ کے دعووں پر عملدرآمد کیا جائے گا۔
