وحدت نیوز(اسلام آباد)مجلس وحدت مسلمین ضلع اسلام آباد کے صدر اسداللہ چیمہ کی سربراہی میں وفد کی رہنما تحریک انصاف ایڈووکیٹ شعیب شاہین امیدوار این اے-47 سے ان کے الیکشن آفس میں ملاقات اور موجودہ ملکی سیاسی صورتحال پر تبادلہ خیال۔ اس موقع پر ضلعی صدر اسداللہ چیمہ نے کہا کہ ہمارا پی ٹی آئی کے ساتھ انتخابی اتحاد انتہائی قومی اہمیت کے حامل اصولوں کی بنیاد پر ہے جن میں آزاد خارجہ پالیسی و داخلی خود مختاری سمیت مضبوط معیشت اور آئین وقانون کی بالادستی سر فہرست ہیں، اظہار رائے کی آزادی، بنیادی انسانی حقوق کی فراہمی بھی اشتراک عمل کے بنیادی نکات میں شامل ہیں۔ ضلعی صدر نے مجلس وحدت مسلمین ضلع اسلام آباد کے تمام کارکنان کو اسلام آباد کے تینوں انتخابی حلقوں میں پاکستان تحریک انصاف کے نامزد امیدواروں کو ووٹ دینے اور ان کیلئے ڈور ٹو ڈور بھرپور کیمپین کی تاکید بھی کی۔ آخر میں ایڈووکیٹ شعیب شاہین نے مجلس وحدت مسلمین ضلع اسلام آباد کے وفد کا شکریہ بھی ادا کیا۔