وحدت نیوز(کراچی) دہشت گردی ، مہنگائی ، توانائی بحران ، شیعہ نسل کشی اور ہزاروں بے گناہ مسلمانوں کے قتل عام میں ملوث طالبان دہشت گردوں سے مذاکرات کو آج کے اس عظیم اجتماع نے مسترد کر دیا ہے ، حکومت اپنی ناقص حکمت عملی پر نظر ثانی کرے ، طالبان سے مذاکرات عوامی رائے کے خلاف ہیں ، قوم دہشت گردوں کے خلاف ریاستی طاقت کے استعمال کے خواہاں ہیں ، نواز حکومت طالبان کو گلے لگانے سے پہلے ان ماؤں ، بہنوں ، بیٹیوں اور بیواؤں کی آہیں اور سسکیاں سنیں جو ان سفاک درندوں کی بربریت کا نشانہ بنے ان خیالات کااظہار مجلس وحدت مسلمین پاکستان صوبہ سندھ کے سکریٹری جنرل علامہ مختار احمد امامی نے نشتر پارک کراچی میں منعقدہ عظمت ولایت کانفرنس سے خطاب کرتے ہو ئے کیا ، ان کا کہنا تھا کہ وادی مہران کے غیور اور محب وطن فرزندوں نے آج اس تاریخی اجتماع میں لاکھوں کی تعداد میں شرکت کر کے یہ بات ثابت کر دی کے ہم مادر وطن کے دفاع اور استحکام کے لئے کسی قربانی سے گریز نہیں کریں گے ، پیروان ولایت کے اس عظیم اجتماع نے نظام ولایت سے اپنی والہانہ عقیدت اور عشق کے اظہار سے امیر المومنین (ع) سے تجدیدعہد کیا ہے ، پاکستان کو مشکلات اور مسائل سے نجات دلوانے کا کام فقط پیروان اہل بیت (ع) ہی کر سکتے ہیں ۔