وحدت نیوز(حیدرآباد) کالعدم تحریک طالبان کی جانب سے صحافی برادری اور ایف سی اہلکاروں کے ساتھ جو سلوک کیا گیا اس سانحہ نے عوام کے دل کو دہلا دیا ہے اور عوام کے دل میں خوف پیدا کردیا ہے ۔حیدر آباد پریس کلب پر شہداء کی یاد میں منعقدہ چراغاں سے خطاب کرتے ہوئے سیکریٹری جنرل مجلس وحدت مسلمین ضلع حیدرآباد علامہ امداد نسیمی نے کہا کہ ہم اس واقعہ کی پر زور مذمت کرتے ہیں اور حکومت سے ان دہشت گردوں کے خلاف فوری آپریشن کا مطالبہ کرتے ہیں۔ علامہ امداد علی نسیمی نے مزید کہا کہ دہشتگرد اتنے آزاد ہوگئے ہیں کہ حکومت نے گھٹنے ٹیک دیئے ہیں اور بات مذاکرات کی ہورہی ہے، کیا دہشتگردوں سے بھی مذاکرات ہوتے ہیں، کیا حکومت اسی مذاکرات کے پلیٹ فارم سے کہیں عوام کو یہ تو پیغام نہیں دے رہی یا عوام خود نتیجہ نکالے کہ دہشتگرد اتنے طاقت ور ہیں کہ سنبھالے نہیں سنبھلتے یا ایوانوں میں بیٹھنے والے حکومت کے کچھ لوگ طالبان کو سپورٹ کررہے ہیں۔
انہوں نے کہا کہ ہم نے کئی مرتبہ حکومت سے مطالبہ کیا ہے کہ ان لوگوں کو فوراً حکومت سے نکالا جائے جو ان طالبان کی سپورٹ میں ملوث ہیں، اگر حکومت دہشتگردوں کے ساتھ طاقت کی زبان استعمال کرے تو پاکستان کی عوام امن کے قیام کیلئے حکومت کے ساتھ مکمل تعاون کریگی، نا اہل حکمرانوں نے عوام کو دہشتگردوں کے حوالے کردیا ہے، ہمارے ملک عزیز پر اسلام کے نام پر شیطان اور اس کے پیروکار حملہ آور ہوچکے ہیں، ملک کو صرف اور صرف اتحاد کے فروغ سے شیعہ اور سنی مل کر بچا سکتے ہیں۔ علامہ امداد نسیمی نے مزید کہا کہ دہشتگردوں کے خلاف آپریشن کے بغیر ملک میں امن کا قیام ممکن نہیں، پاکستان کو عالمی سطح پر خطرناک ملک قرار دلوانا شدت پسندوں کا حدف ہے، پولیس، رینجرز، آرمی، ایف سی اور سول سوسائٹی کی اہم شخصیات کو دہشتگرد اپنی گولی کا نشانہ بنارہے ہیں اور ہمارے حکمران مذاکرات میں الجھے ہوئے ہیں، طالبان کے ساتھ ان کی ہمدردی سیاسی جماعتیں بھی ان واقعات میں پوری طرح ملوث ہیں۔
